أجزم وعلى قولة أخواننا المصريين ( أكاد أُقزم ) بأن مشكلة مطار الملك خالد الدولي بالعاصمة الرياض ليست مادية لا فنية ، بل وكما يظهر لي بأنها إدارية بشكل كبير ، في الواقع أنا لا أعرف اسم مدير المطار ولا أعرف مرجعية المطارات إلى من ، لكن أعرف بأن واقع مطار الملك خالد ( مأساوي ) ومأساوي بشكل كبير رغم أنه يعد أفضل المطارات في المملكة .
من الظلم أن تدفع الحكومة مبالغ طائلة وكبيرة لبناء مطار دولي بهذا الحجم وبهذا المستوى من البناء ، ثم في النهاية تنسف الجهود بأساليب إدارية بيروقراطية يبدو أنها لم تسافر مطلقاً لترى كيف هي أحوال مطارات العالم ، العنوان الأول للزائر هو سير الحقائب البطئ الذي لا يوجد ماهو أبطأ منه في كل دول العالم وربما يجدر بك البقاء لأكثر من ساعة ونصف حتى تصل حقائبك من الطائرة في ظل تنظيم سئ يتجمهر المسافرون خلاله حول السير في ظل إضاءة وتهوية سيئة جداً ، وعندما تخرج من الصالة وتختم جوازك فأنك لن تشاهد أي خدمات أخرى ، ربما باستثناء معرض أو اثنين إلا أنك لن تحظى بعدد من خدمات الفنادق وسيارات التأجير إلا من خلال محلين أو ثلاثة (أسعارهما نااار ) ، كما سيتلقفك أصحاب سيارات النقل غير النظامية حيث يشدونك من اليمين ومن اليسار كلٌ يدعوك للركوب معه وكأن حالك أشبه بحال الفريسة ضعيفة الحال والتي تحاول الهرب من قطيع الأسود في الغابة ، يخيل لك أنه لا يوجد نظام وأصحاب التكاسي يتجمهرون حولك .. إلى هذه الدرجة والحال فوضى !!
نسيت أن أتطرق إلى جانب آخر .. عند الرغبة في السفر تأمل كيف تقف الصفوف لقص ( البوردنيج ) في ظل مساحة ضيقة (جداً ) وغياب للتنظيم وسوء معاملة (في الغالب ) من الجالسين خلف الكونترات .
يبدو أن مشكلة المطار هو في المكتب التنفيذي هي أن كل المسؤولين والمشاهير والـ VIP لا يسافرون مطلقاً من خلال الصالات العادية حيث تخصص لهم صالة يطلق عليها مسمى (المكتب التنفيذي ) وهي أشبه ماتكون بنظام الفنادق ، لذا فلن يعرف ماذا يدور في الصالات الأخرى التي قد لا يتوفر فيها حتى (دورات مياه ) في ظل بقاء الوضع كما هو عليه .. في ظل صمت إعلامي غريب رغم فتح باب النقد للجهات الحكومية في الاعلام خصوصاً في الأعوام الثلاث الماضية إلا أنه لم يكتب أي تحقيق (عليه القيمة ) حول مأساة المطار !
View Comments
وهي جايه على المطارات ...تلاقي اللي ماسك ادارته يحمل شهاده بتخصص إحياء ولا رياضيات
كذا احنا خريجه كليه الاقتصاد المنزلي تشغل وظيفه ماليه في احد البنوك ... ومدرسه الدين مرقينها تصير مديره مدرسه...
لا وخريج معه ماجستير حيوان مشرف للآثار في المنطقه وهلم جرا....
على طاري التحقيق تدور في بالي عده مواضيع اجتماعيه كنت سأحقق عنها لتنشر في جريدتكم الغراء ولكني لم أمتلك الشجاعه ....
الناس عندنا بطرانه .... يتشكون من زحمة مطار دبي و مطار بوظبي
لو شافوا مطار الملك خالد شو بيقولون؟؟
آآآآآخ من منطقة البوردينغ (وجه يصيييييح)!!
آخر سفرة لي كانت عن طريق (طيران الخليج)، حالة صعبة والله في صالة الخطوط الأجنبية!
بشر من كل الأجناس.. عمال .. شغالات .. موظفين .. أجانب.. سعوديين.. وما فيه أي أثر لطابور، أو شي يشبه الطابور على الأقل..
وصاحبنا اللي يفتش العفش قاعد ينقش أسنانه، وحاط يده على كرشه، غير أنه رافع رجوله على الطاولة اللي قدامه (بدون مبالغة هذا اللي صاير).. إلى ما قال له واحد: "يا ابن الحلال انجزوا.. الناس تبي تسافر!" رد عليه : "عمرهم ما سافروا" .. وانفجر ضحك هو واللي معه!
أول كنت أحس مطار الملك خالد أوسع مطار.. وأنظف مطار.. وأشرح مطار.. بس الحين صار يسبب لي كآبة، وضيقة صدر.. خصوصاً لما أكون راجعة من سفرة حلوة!
هلا اخوي احمد
والله كل مطاراتنا حالتها حاله على الاقل الملك خالد يهون عند مطار الملك عبدالعزيز في جده انوااااااااااع اللخبطه الي ماادري وش تبي
قسم بالله مايضيق صدري الا اذا تذكرت اننا دوله غنيه والخدمات عندنا اقل من المستوى والله مطار يجيب الهم ماأستانس في المطار الا اذا شفت حقين خطوط ال bmi يدورون يدورون ركابهم تحس انهم يحترمون الركاب
ياليت بس يأخذون عندنا كل مدراء المطارات ويرسلونهم لمطار هونج كونج ويشوفون وبتعلمون
تحياتي واشواقي>>>>>> توه طاف فيها
السلام عليكم
بالنسبة لمشكلة الموظفين ماراح اعلق عليها لان الوضع معروف في جميع الدوائر الحكوميه .
, لكن بالنسبة للمطار طبعا لايخفى على احد انه يعتبر تحفه معمارية ،مصمم المطار ومقره في نيويورك يقول ان هذا المشروع ما قد مر علي مثله في حياتي لانة كان بميزانية مفتوحه (طبعا ايام الطفره) , المشكله الحالية الان بتكاليف الصيانة المرتفعه جدا ( قد توصل لقيمة التكلفه للمطار ككل في غضون سنيين قليله ) ، فالي صاير الان ان الصيانه لاتتم بشكل كامل 100% والدليل اذا دخلت المطار ارفع راسك وشوف البقع على السقف ( هذي فتحه التكييف الراجع )مهمله من سنين وباين عليها بقع الغبار .
لكن حرام نقلل من قيمة المطار كشكل وتصميم على الاقل من برا :) .
يا خالي المطار هذا ماعاد تبي تطير منه ..
والله النظام سيء خصوصاً مسألة قص البوردينغ اللي تشيل همها بشكل كبير
يمكن الحين تحسنوا شوي بعد ما استلم مهمة الخطوط السعودية الملحم
بس مهما كان التنظيم سيء .. والله يعينا على الرحلة الجاية ..
لأني اخترت اسافر على خطوط الامارات مع انها اغلى شوي بس
اهم شي احس بخدمة زينه لا طرت معهم :) ..
بصراحة حالة المطار عندنا من سيء لأسوء ,
ولا حتى وقفت على المطار ,, موقعهم على الأنترنت يفشل بقوة من جد ,
الاهمال الحاصل في مطار الملك خالد ليست وليدة اللحظه انما هو استفادة بعض المحسوبين عليه من الفوضى القائمه الان
عموما نحن موظفين المطار نعرف ما لا يعرفه عامه الناس من سؤء الصيانه وقلة الاهتمام واهمال كل ما من شأنه خدمة مرتادي المطار علاوة علا اخلاق موظفيه المشينه واستغلال لهم لمواقعهم لخدمه الذات وعلى قول المثل لا تشكي لي ابكي لك ... لكم مني كل الحب .. للحديث بقيه..
**********
FATOOO
**********
لو اللي ماسكه مامعه الا الابتدائي ، لازم يكون فيه رقابة ومتابعة ومعرفة أماكن الخلل بس الواضح أن الأمر في المطار متروك والدليل راعين هالتكاسي اللي عارفين أن المطار مافيه لا رقابة ولا متابعة ...
*********
إيمان
**********
بيقولون الله يرحم حال آهل الرياض :)
**********
هديل
**********
أنا أفكر بمشروع توفير عمالة مقابل مبلغ معين يعني يتعدى 100 ريال ، ياخذ شناطك ويروح المطار ويقص البوردينغ ويحمل الشنط .. ويجي يعطيك البوردينغ وانت مرتاح .. والله لو يصير فيه مشروع كذا يمكن أعطيه 200 ريال مهوب 100 :) بس يفكنا من التنظيم والنفسيات الزفت اللي تدمر السفرة من أولها ، واذا اكتملت الرحلة في وجود طيارة للهند ولا باكستان او بنجلادش .. ادمممرررري
**********
فاضي جدا
**********
يابن الحلال .. والله قهر :) .. بس عاد وش تسوي ، تدري المفروض أن المطار يدخل ملاييين لو فتحوا مجال الخدمات والمحلات والتأجير .. بس جيدين في علبة عصير بسبعة ريال وفطيرة جبن بستة مدري بكم !
**********
مهند
**********
ياخي وش هالصيانة اللي مو قادرين على تجيهز دورات مياة .. التصميم والشكل حلو ما قلنا شي ..ولا تكلمنا فيه :)
**********
مشغول
**********
يرجال يكفيك المساحة .. عشرة متر مدري في ستة متر .. شف المطارات الدولية الباقية .. مساحة مفتوحة رحبة ياخي يمديك تتنفس فيها وتاخذ راحتك في الكلام .. مهوب كنك صاف عند مخبز تميس :D
**********
thekra
**********
حلو .. لهم موقع ؟ .. ولا وصرنا متطورين :)
**********
موظف مطار
**********
حياك الله اخوي والله مداخلتك في الصميم .. إلا منهو المدير وكم سنة متعين :) ؟
كنت أعتقد أنني الوحيدة التي أعاني في مطار (جدة) المتهالك
وربما من الخطأ تسميته (مطار) فهو أشبه بـ (حلقة خضار) للأسف!!!
لا المكان ولا الشكل ولا الأثاث ولا الخدمات ولا الإدارة ولا شيء فيها يدل
على أنها ( مطار ) سوى بوابة الخروج لأنك سترى الطائرة أمامك!!
ومن الطبيعي أن تكون في مطار... حتى ولو كان مجرد تسمية!!
كثيراً ما نعاني ونتكلم..
لكن هل من مستمع؟
وهل من ردة فل بعد الاستماع؟!!
خلونا ساكتين أجل ولا تحرقوا قلوبكم :(