برافو سامبا
قبل نحو اسبوعين ، توجهت لفرع سامبا النخيل لتزويدهم بتعريف (للراتب) لأجل موضوع الفيزا ، تنقلت من شخص لآخر وبقيت في الفرع مدة نصف ساعة وحينما وصلت للشخص الأخير المتخصص في بطاقات الفيزا كما تقول اللوحة التي فوقه أفادني بأن شؤون الفيزا موقفة لديهم وأن علي التوجه لفرع آخر ، هذه الإشكالية أثارت حنقي لإهدار نصف ساعة في كراسي انتظار دون فائدة وفي النهاية تكون النتيجة (لاشيء) ، عدت للمنزل ودخلت موقع سامبا وكتبت شكوى لتفريغ غضبي على البنك ، لم تكن شكوى بالمعنى التقليدي بقدر ماكانت احتجاج مؤدب على ماحدث لي .
صباح اليوم التالي تقليت اتصالا من موظف سامبا يؤكد تلقيه الشكوى وأنها ستكون في المتابعة خلال هذا الاسبوع ، في اليوم الذي يليه تلقيت اتصالا اخر يؤكد بأن الشكوى بدأت في أخذ طريقها رغم تأكيدي أكثر من مرة له بأنها ليست شكوى وأنا لست بحاجة لرد ، في اليوم التالي اتصل بي مدير فرع حي النخيل في اتصال مهذب وأكثر من رائع حقيقة وأحرجني جدا باسلوبه واعتذاره عن الإشكالية التي حدثت ، بعدها بربع ساعة اتصال موظف في مكتب مدير إدارة الفروع مواصلا توضيح ماحدث ، وبعدها بعشر دقائق اتصل موظف آخر يسألني هل أنا راضي بالأجوبة ومدى رضاي عن الاسلوب المتخذ لخطوات الشكوى .. كان يملأ فيما يبدو استمارة .
هذه الخطوة حقيقة جعلتني أحترم البنك أكثر وأحترم طريقة أداءه وموظفيه وتشعر بأنك أمام مسؤول يمكنه أن يتجاهل الشكوى ويضع الورقة كما يفعل البقية في سلة المهملات ، بل أذكر أن مدير الفرع كان يطالبني بأنه سيرسل موظفاً لي لتنفيذ ما أطلب ، بالفعل خطوة رائعة تشكر سامبا عليها .
على الجانب الآخر تفاجأت قبل نحو شهر بتجميد حسابي في بنك (ساب) لسبب غير واضح رغم أني بالكاد لم أكمل عاما واحدا حتى أضع حجة لمن يقول بأن التجميد للمطالبة بتحديث البيانات كما يقولون ، اتصلت بالرقم المجاني الذي طالبني الموظف فيه بزيارة الفرع ، زرت الفرع في اليوم التالي وزودتهم بصورة من بطاقة الأحوال ، رغم مرور شهر لم يحدث على حسابي أي تغير اتصلت مرة أخرى بالرقم المجاني وكانت المفاجأة .. الموظف لم يبد أي حماس وطالبني بزيارة الفرع .. أجبته ( لقد زرت الفرع وأعطيتهم صورة من البطاقة الشخصية ) .. لكنه رد علي رد من النوعية ( الخنفشارية ) .. قال لي ” طيب وش المطلوب أسوي أخوي أحمد ؟ ” .. قلت له أنا من المفترض أن أقول ( وش المطلوب أسوي ؟ ) .. قالي ( برضه رح للفرع 😀 ) .
أغلقت الهاتف ودخلت موقع ساب وبرضه (صكيتهم بشكوى ) – مدهر شكاوي الاخ 😀 – لكن اليوم هو اليوم الثالث دون أي رد حتى ولو كان رداً تلقائياً من سيرفر البنك يؤكد تلقي الرسالة .
كما حييت سامبا على حسن التصرف مع الإشكالية التي حدثت بكل تأكيد درجة ولائي ستميل لهم بلا جدال حتى في الجلسات الخاصة مع الزملاء ، بينما سأنتقد بنك ساب على الدوام لأن تصرف موظف الرقم المجاني (أعماها) … وعموما هم الخسرانين لأني سأسحب الملايين من حسابي لديهم 😀
طيب سلفني 100 ألف أروح بيها أستراليا 😛
تعامل البنوك المفروض يكون على أعلى مستوى وهدا اللي مو راضي يفهموه كثير من الموظفين..
لما أشوف الشكاوى اللي بتجيني من العملاء أحس عملاءنا مدلعين بزيادة! يعني في ظرف 3 أيام عمل لازم المشكلة كلهاتنحل وينكتب عنها تقرير وكيف انحلت….. الخ! والمضحك يا أحمد إنه بعض العملاء ما يبغوا يفهموا قضية اختلاف إجازات الويكند بيننا وبين الدول العربية عشان كدا تصير عندنا مشاكل من تأخير تحويل مبالغ وخلافه..
أتذكر مرة كنت مضطرة أحول مبلغ من هنا على السعودية وكنت متعودة أروح على بنك بعثة الحج الماليزية وخلاص عارفة تعاملاتهم والسيستم تبعهم كيف ماشي.. ميزة البنك هدا انه تضمن مافي شي ينسحب من حسابك وقت التحويل يعني لا فيه أتعاب ولا شي مجرد فرق العملة.. لكن مشكلته الحالية انه مافي فرع قريب من مكان عملي..
المهم.. قلت خلينا نجرب الراجحي خلاص البنك فروعه في كل حتة وأكيد تعامله في السعودية بيكون أسهل وأسرع.. رحت البنك والحمد لله على النعمة! تعامل موظفة الكاونتر أبداًً مو تعامل موظفين بنوك مكشرة وحالتها حالة! سألتها أبغى أحول مبلغ على حساب الراجحي السعودية وبدون نفس تقول لي لازم تعملي حوالة دولية وهاتي رقم الحساب + رقم الجواز + الاسم الرباعي بالكامل…. الخ يعني كأني أحول بالويسترن يونيون!!
قلت والله ماعندي حالياً غير رقم الحساب ما ينفع تعملي زي البنوك الناس وتاخدي رقم الحساب ورقم الفرع وانتهي الموضوع! وبدون نفس قالت لاااااااااع!
شلت عفشي وطلعت ومجرد تلفون على بنك بعثة الحج واتحول المبلغ وصلى الله على سيدنا محمد!
ودحين ما بقي أحد ما قلت له انه تعامل الراجحي هنا يععععع وقرف وغير أخلاقي أبدا 😀
بس اكتشفت شي
.
.
.
.
.
.
.
.
.
.
.
إني لما دخلت الراجحي كنت ناسية أشيل بطاقة البنك حقنا 😀 وبنكنا منافس قوي لهم 😀
على قولتهم فيهم رجا
بصراحه انا غير مرتاح مع سامبا ابدا وفي الجهه المقابله حسابي الرئيسي بالراجحي وانا مرتاح فيه جدا على عكس السمعه الي طالعه عليه , يكفي انه كان سباق في تقديم الخدمات الحكوميه والفواتير عن طريق الصراف , ويكفي ان كثير من الزملاء دائما يطلبون مني خدمات عن طريق صراف الراجحي لا تتوفر في بنوكهم.
ياخي تفكيرك خطير .. انا ما عمري عبيت فورم شكاوي بموقع بنك أو شركة
والسبب اني اتلاعن معهم بالتلفون واريح ضميري 😀
لكن شكلي بصير مثلك اشتكي ع الفاضي والمليان خخخخخخخخ
بعدين دايم تكتب عن البنوك تبي تعلمنا يعني انك كاش وكل يومين رايح تشيك على المليار اللي برصيدك 😀
تدري وش احسن شي؟ ان حسابي في الراجحي (تميز) ومدلعيني خخخخخخ وش رايك في التميلح طالعن كني بنت تتميلح على خوياتها يعني افهمها تراي من كبار العملاء وعندي فلة في هاواي دبلكس ( وجه فقر اجل دبلكس بهاواي خخخخخخ )
على فكرة ليه انا ارد بمدونتك وانت ماترد بمدونتي ( من كثر التدوينات يوم تبيه يرد 😀 )
فتك بعافية
سامبا أجاويد على قولة ابو ناصر
الحقيقه تعاملهم مش بطال
وأفضل من غيرهم
صح عليهم كم حركه غبيه سووها معي
لكن نمشيها
وعلى العموم بعض موظفين البنوك يتعاملون بفوقيه مع العملاء
وهذا أكثر شي يرفع الضغط
جميل جداً منهم إنهم يهتمون بالعميل وشكواه بهالطريقه
فرع النخيل هذا في البدايه كان فاضي ورهيب ( دايم ابو ناصر يمدح هالفرع شكل له نسبه )
ومن تالي ماش .. انواع الطقاق والزحمه كنك في البمبونيرا على قولة الرجال هههههههههه
asma :
العميل دائما على حق .. 3 أيام عمل كافية لبحث أي شكوى اذا كان هناك قسم متخصص بالعناية بالعملاء ومتابعة مايريدونه .. ومثال على ذلك سامبا العملية عندهم ماطولت رغم انها ليست شكوى تقليدية ..
الراجحي حتى في ماليزيا دمار .. بس سبحان الله موفق في كل شي ..
بس وش هالبنك اللي اسمه بنك بعثة الحج ؟
مهند :
والله يقولون ان الراجحي من تالي تحسنت خدماته الالكترونية تحديدا .. بس ماش دخلته مرة وحامت كبدي من سوء تعامل الموظفين كأنك داخل دائرة حكومية وهالتصور الأولي خلاني ألغي اي فكرة للتعامل معه
آهات :
لا لا صدقني ادهر شكاوي وماجاك علي 🙂 .. بيني وبينك هو الاجراء المنطقي في هالحالات لأن المجالد في التلفون مايجيب نتيجة .. انت وهالموظف لحد شاف ولا دري .. لكن الشكوى تاخذ طريقها ..
اقولك شي على طاري كثرة المواضيع عن البنوك 🙂 ؟
ومدير الفرع يكلمني عن الخطأ ويعتذر .. ويا استاذ ويااستاذ .. بيني وبينك خفت يطلب رقم حسابي ويشوف المبلغ ثم ( تحوم تسبده ) اذا درى ان الطرف الثاني مطفررررررر وبقوة ههههه
يزيد :
هلا بك أخوي ( أبو يزيد 🙂 🙂
شف فرع النخيل كان كويس لحد مافتحوا جمبه مبنى حق زين .. وعقبها انواع الزحمة واصلا ماتحصل موقف بحكم ان حقين زين يوقفون في مواقف البنك … بس كل هذا يهون بحكم اني شريك في زين 😀
أشك بالكلام الذي كاتبة بالشكوى لسامبا 🙂
أدرجها هنا لنتحقق أنها براعة في أسلوب الشكوى أم براعة من تعامل سامبا؟؟
صعب الأثنين مع بعض
:-p
____________________________
بعد الدعاء يارب برحمة هديل
بالنسبة للبنوك عندنا حسابك فيه دراهم ابشر بسعدك
اذا مافيه الا كم قرش فصف سرا وانواع اللطعات
لاسامبا ولا ساب ولا راجحي ولا غيرهم اهم شي حسابك كم فيه
واحد من الجماعة كان على مايقولون على قد حاله باع له ثلاث من الابل اللي عنده بقيمة 11 مليون يوم ودعها في حسابه ويدهر البنك (سم طال عمرك ابشر طال عمرك ومن ذا الحكي )واول الموظف يمر من عنده ويناضره من فوق وصف سرا وانواع المرمطه والحين طال عمرك
هههههههههههههههههههه
والله والشكوى بدت تلقى ردود ها الأيام الله يرحم الأيام اللي ما كنت تلقى احد يرد عليها اصلا 😛
وبصراحه انا اعتبر بنك سامبا افضل بنك حاليامن جميع النواحي بس لو يخففون من الزحمه اللي عندهم شوي
وكل شكوى وانت بخير يابو حميد 😀
باغي الشهادة :
الشكوى في اللابتوب حقي .. لعله اضيفه كرد لاحق بإذن الله
رائد :
والله مهوب على كل حال .. هذا حسابي عند سامبا استحي اقوله 😀 وردة الفعل شوفة عينك
coolksa :
صادق .. على الاقل في سامبا لأن البقية ماتدري عنهم
الزحمة تقدر توفرها من خلال الخدمات الالكترونية اللي عندهم .. يعني المفروض ماتروح البنك الا في الحاجات الضرورية مرة
بعثة الحج الماليزية لها مسوية بنك خاص لها عشان الناس يقدروا يستثمروا فلوسهم ويجمعوها للحج.. نحن استغليناها في تحويل الفلوس بما انها فاتحة كمان في مكاتبها اللي في مكة وجدة 🙂
هلا ابوحميد
حبيبي تبي نصيحتي وتجيك البطاقه خذ الرقم هذا حق ساما واتصل عليهم وقلهم الشكوى وماعليك تنحل الامور 4633000
واذا تبي فيزا بسرعه مر الاهلي او الرياض
وتحياتي ياغالي
صباح / مساء الخير
المتابع لآراء الناس يلاحظ احدهم يمدح البنك الفلاني والثاني يسب نفس البنك .. والامر يطبق على جميع البنوك.
يعني بان نسبة كبيرة من اسباب شكاوى العملاء سببها هو تصرف خاطئ الموظف المسؤول عن خدمة العملاء.
وممكن يكون من اسباب استهتار بعض الموظفين هو اهمال مدير الفرع لمتابعة الشكاوى الشفاهية للعملاء والتغاظي عن العقاب او اجراء بعض القرارات الرادعه .. وقد يصل هذا المرض المعدي – الاهمال – للادارة العليا للبنك التي لا ترى من العملاء الا اصحاب المليارات <= حتى اصحاب الملايين ما سلموا.
ثقافة الشكوى امر ضروري يجب تفعيله .. ولا لسياسة التسامح عن كل كبيرة وصغيرة .. ولا لاستمرارية التنازل عن الحقوق.
تابعوا يا ناس الوضع اللي وصلنا له بسبب تنازلنا عن حقنا في قول (لا) .. وصلنا لوضع اخذ الكل يستغل الآخر للوصول لبعض المكاسب المادية .
الكلام كثير ولكن اكتفي بما قلته.
بالتوفيق للجميع …. سلام.
asma : والله فكرة البنك حلوة .. وياحسرة الناس تستثمر وتجمع عشان الحج ، ومكة ماتبعد عنا الا ساعتين بالطيارة وفيه ناس الى يومك ما أدت فرضها ..
كيبورد صريح : لا القضية مو قضية بطاقة .. الحساب مجمد وخبرك فيه 700 مليون 😀
فوضوي : اضافة قيمة اخوي للموضوع .. وبالفعل موظف خدمة العملاء هو واجهة البنك والناس تحكم من خلاله .. لذلك لازم يتم تأهيلهم بطريقة جيدة وبدورات في مجالات متعددة
احمد يبي لك تنزل موضوع وتعلمنا كيف نسوي شكاوي للبنوك وغيره 😀 ..
انت حصل لك موقف مع بنك سامبا وبدأ حبك له يـزيد 🙂 .. وسـاب الله يعينه على لسانك 🙁 ..
انا حصل لي موقف مع ساب وبدأت محبتـه تزيـد عندي .. وباقي البنوك حش 😀 ..
اللي يعطينا وجه نحطه فوق راسنـا تخيل انك ارسلت الشكوى وما احد رد عليك وكانو مشغولين وش راح تقول عنهم ؟؟؟؟؟؟؟؟ .. وترى تفرق من منطقة لمنطقة ..
طب ياخي قل أن صديقي مشغول يشتغل في بنك الحين وبروح احط هالملايين عنده 🙂
اذا بغيت تفتح حساب قلي وانا اجيك للمكان اللي تبي مع انه مو من تخصصي فتح الحسابات بس بجي
عشان الملايين ..
تصدق عاد رغم اني مرتاح في البنك اللي انا شغال فيه .. الا ان لو تحصل نفس مشكلتك أضمن لك انك راح تلقى ردهم مثل رد ساب .. وسلم لي على سامبا كا خدمة ولكن كا منتجات وعيين !
شخبارك .؟
نقطه للتوضيح : بعض البنوك تجمد الحسابات اذا لم يكن فيها حركه لمده سته شهور والبعض سنه ويختلف من بنك لبنك ويعتبرونها شغله امنيه وتحتاج من الزبون التوقيع علي اوراق لاعادة تشغيل الحساب مره ثانيه مع الاحتفاظ بالمبلغ للزبون اذا كان مبلغ يسوي اما اذا اقل من 100 دينار =1000 ريال معناته راح كل شهر ينقص منه مبلغ الي ان يصل للزيرو -الحكمه من التجميد هي خوفا من كون الزبون توفي لا قدر الله فلا يتم التلاعب بحسابه من اشخاص اخرين -اتمني ما اكون طولتها من غير سالفه
سؤال : حسب ما ذكرت في تدوينات سابقه انك تذكر اسمك ووظيفتك او مكان عملك في الشكاوي التي تقدمها علي ما اذكر -الا تعتقد ان ذلك يؤثر علي اهتمامهم بشكواك خوفا من فضيحه الجرايد؟؟ 🙂
هلا احمد
تبي الحق ماني مرتاح مع سامبا ابدا ابدا ابدا
يوم تركت عملي السابق ورحت لعمل جديد مرمطوني لين اكلت تراب وجمدوا حسابي وبطاقاتي ووانا كنت مسافر ومعتمد على الفلوس اللي فيه وتخيل هالموقف عاد , مع انه فيه مبلغ لاباس به يغطي على اللي هم يبون مني ل6 شهور على الاقل قدام بس يقولون اجراءات خخخ لازم نجمد حسابك
وبعدها اجيب لهم تعريف العمل الجديد ومرمطه بعد وكل يوم مشوار ونزل راتبي الجديد عندهم وحسابي مجمد والسبب يقول تعريف الشركة اللي انت جايبه صيغته ماتطابق الصيغه الافتراضيه عندنا
اخيرا رحت لهم للفرع قلت ياعمي اسمع ترى الشركة الجديده اللي انا فيها الحين اقدر اخذ منها تعريف واروح لاي بنك واحول راتبي عليهم وانت خل حسابك مجمد عندك الين ترضى وكلها كم شهر ويخلص المبلغ اللي فيه ثم تجي تترجاني علشان اعطيك فلوسك , قالي ماقدر
قلت خلاص مع السلامه هات تعريفي وماتشوف شر
بعدها بساعتين اتصل علي مرة ثانيه وقال جب تعريفك وتعال وبمشيها لك خخخخ
وفعلا فتح حسابي ولازلت مستمر معهم والغيت بطاقات الفيزا واذا نزل راتبي بعد على طول اروح اصرفه واودعه بالبنك الاهلي وافكر بالانتقال للبنك الاهلي لانه افضل البنوك حاليا حسب وجهة نظري
ونفس حكايتي صارت مع بندر بعد
سامبا زينين وانت بعيد عنهم بس اذا جيت تبي منهم شئ تكرهم كره العمى هذا هم وبنك الرياض
لذلك اتوقع التوقيع اللي انت حيطته بنهاية الرساله هو اللي خلاهم يرتبكون والا ماخليت من الشكاوي انا شئ وحتى الان ماوصلتي اي رد نهائيا
تحياتي لك صديقي
مرحبا..أنتبههههو لاأحد يغلط ع هالبنك تراني موظفه فيه ومااسمحلكمش ابدا…ولابصفر رصيدك احمد..ممكن سؤال .؟وشلون اسجل اسمي كل ماأكتب نك يقول غلط شوو أعمل؟ ارجو الرد..وشكرا.
أحمد الشمراني : قصدك كورس 😀
بالفعل تقديري زاد لسامبا بعد هالحركة .. لكن عادي ترى مالي ولاء يعني يمكن بكرة تشوفني أحشهم :):)
ولا اتوقع تفرق من منطقة لمنطقة على قولتك لان خدمات العملاء عادة مركزكم شامل ، يعني مثلا تحصل المركز في المنطقة الشرقية بس لكن يغطي كل المملكة
مشغول :
هلا وسهلاااااااا
ودي اجيبكم بس تخبر انا فاتح 3 حسابات وكل ملاييني متوزعة .. لدرجة ان الاهلي حسابي فيه 3000 🙂 ، لو فتحت رابع راح اسحب الف من الاهلي والف من سامبا والف من ساب .. هههههههه
ورى ماتسير يبو ؟
layal :
الحساب فيه اكثر من 6000 ريال
<<< قالك رقم خيالي يعني 🙂
واجري فيه حسابات كل وقت والثاني .. يعني اساس التجميد ماله اي صحة على الاطلاق ولو اننا في أمريكا كان رفعت عليهم قضية
ممكن كثير ان التوقيع يؤثر في العملية .. وبيني وبينك هو التفسير الاقرب للي صار !
TMT :
هلا والله وسهلا 🙂
وش هالكلام .. وش دخل الانتقال من عمل لاخر في تجميد حسابك ؟ … ياخي كان قلتي اصكهم بشكوى يحبها قلبك 😀 ..
لا والله حركتهم غريبة ومالهم صلاحية ابد في هالشي .. افرض انك عاطل مثلا .. إلا لازم تعريف وخربطة ؟
الاهلي كويسين بصراحة – حتى الان – وانا فاتح عندهم حساب ومطلع فيزا برضه ، خدماتهم الهاتفية مميزة وسريعة التجاوب
التوقيع يمكن هو اللي مسوي شغل مافيه شك ، بس تدري جربته مع ساب وكتبت لهم ايميل وقلت انه جمد حسابي وتمت مطالبتي بزيارة الفرع ورحت للفرع وماصار شي .. شف ردهم :
عزيزي العميل
تحية طيبة …. وبعد
شكرا لمراسلتنا ولتعاملكم مع ساب ,نفيدكم بان عملية تنشيط الحساب تتم فقط من خلال الفرع
يرجى زيارة الفرع لتنفيذ طلبكم و لنتمكن من خدمتكم بشكل افضل .
مع اني قايل لهم اني مريت الفرع .. وكاتب نفس التوقيع بس مافرقت معهم 😀
انجل :
ماغلطنا .. كان انتقاد بسسسس .. بعدين دامك موظفة كان لازم تعطينيا خبر ليه تجمد الحسابات 🙂 ؟
المدونة مافيه تسجيل اسامي .. ليه يقول غلط ؟؟
أأأأ هاااااه تجميد >>رحت فيهاوشلون ارد عليه أنكشفت الكذبه اناأمزح مو موظفه ولاني بفهم بهاالخرابيط وأزيدك من الشعربيت ماعندي حساب ابد مريحه..هذا أولا.. ثانيا:انامدري وش تقصد بالمدونه ولكن انا جديده وما ادخل ألا على سوالفك واليوم مريت على ذي..ولكن مرت عليها تبع تسجيل الاسم والرقم السري سجلت قالي خطأ.ليه؟؟أعتقد انه مش في المدونه ألي انا مدري وش هي..آسفه ع الإطاله بس فرحت يوم شفت ردك أشكرك.
أخوي أحمد تدري وش أكثر شي يعجبني فيك ,,(وأنا أكتبها ,,جلست ادندنها)
أنك تستخدم كل الطرق المشروعة لوصول شكواك أو وجه نظرك للمسئول وأستخدام مواقع الانترنت للارسال
أعجبني في مقاله سابقة لك عندما راسلت شركة الاتصالات من أجل الثناء على أحد موظفيه
—
تعقيبي على هذه الموضوع
سامبا رائع من خلال تعاملهم معي
أنتهت بطاقة الهوية عندي وكذلك بطاقة الصراف
فكان المفترض منهم أن يجمدوا حسابي
لكن الذي فعلوا أرسلو لي بطاقة جديدة ولم يجمدوا حسابي
—
أحيي البنك على اتصالهم بك فوراً ومعرفة شكواك وأن يتم حلها بأسرع وقت
شكراً أحمد على تدويناتك الرائعة ,, من متابعينك
من واقع تجربه
البنوك . . معاك فلوس تدوس . . واللي مامعاه ياخذ على قفاه
كلن منغثين من البنوك وسؤ معماملتهم…قيمتك عندهم تساوي المبلغ اللي بحسابك…اخلاقيات عمل واحترام للإنسان كإنسان …غير موجوده على الإطلاق..
مانقول الا حسبنا الله …
صراحه انا اصدمت سامبا يسوي كذا !!
البنوك للاسف ما اشوف الى الان تفهم خدمة العملاء بشكل صحيح و السبب ماهو معروف, هل هو موظف او مدير او ادارة او ما تعرف
بس الي سار لك مع سامبا شي يحمس حقيقة. ان شاء الله تجينا اخبار اكثر عشان الواحد يبدأ حط الفلوس عندهم 😀
على فكره انا الحين على التلفون استنى خدمة العملاء حق البنك الاهلي يرد. المكاملة وصلت 15 دقيقه الى الان ^_^
لا أميل الى بنك دون الاخر الا بحسب الذي يفيدني وارتاح في التعامل معهم ..
خدمة سامبا تُشعرك بأنك عميل لديهم وانك مهم وان معاملتك هي الاولى من اي عمل أخر، على النقيض (الأهلي) ان لم يكن في حسابك مبلغ وقدره فأنت المنبوذ وعليك اللعنة الى يوم الدين ..
حصل لأختي موقف في الاهلي ( لاحظ اني لست عميلة عندهم 😀 ) قامت على أثره بتقديم شكوى لـ سوء معاملة وضيق اخلاق مديرة الفرع و اعتقد ان أحدً لم يتطلع عليها !!
جعلت نصيحتي لاي انسان يستحق معاملة أفضل وعيش كريم هو سامبا و فرّ بجلدك عن الاهلي و الراجحي ..