جزءٌ سلبي متهرطق

كثير منا يقوم بسلبيات لا أول لها ولا آخر، وكثير منا يحمل عشرات الأسرار التي ربما لا يعرفها سواه، مهما بدت الطيبة على وجوه الأشخاص والمحيطين حولك .. لديهم عشرات القصص ولديهم عشرات السلبيات التي قد تفاجئك، بالنسبة لي لم أعد أندهش من بعض الأفكار الغريبة خاصة لأشخاص أسافر معهم .. وفي الحقيقة السفر كثيراً مايفتح صفحات كانت مغلقة .
أحاول قدر الإمكان أن لا أكتب تدوينات تظهرني بالشخص المثالي الذي ينتقد سلبيات المجتمع ويطالب بتصحيح هذا الوضع أو تعديل ذاك، ولعلكم تتذكرون أني كتبت موضوعاً حمل عنوان(مدونون .. فاسدون-مرضى نفسانيون)، حكيت هذه الأفكار للصديق (أبو نواف) والذي طرح علي فكرة كتابة تدوينة أطرح فيها بعضاً من السلبيات التي قمت بها خلال شهر مثلاً، بالنسبة لي لا يوجد ما أخجل منه لذلك سأحاول أن أجمع بعضاً منها : 🙂
* يسكن بجانبنا شخصية نافذة .. وهذا المصطلح كبير ومطاط لكني متأكد بأن القارئ سيفهم معناه .. ماعلينا .. أقول بأن جانبنا يسكن شخصية نافذة ونعاني كثيراً بأن العمالة لديه يقومون بري الحديقة وغسل الساحة الخارجية لمنزله يومياً مما يجعل الشارع يغرق بالمياه، البلدية أو الجهة المسؤولة لا تجرمه على هذا الفعل مقارنة بنا مثلا فيما لو قمنا يوماً بغسيل المنزل وحدث تسرب للماء للخارج.
.. لكل فعل ردة فعل .. لذلك قررت الاسبوع الماضي عندما أجد الشارع مليء بالمياه أن أزيد من سرعة سيارتي حتى تتأثر السيارات الفخمة الواقفة بالخارج (أمام منزل النافذة 🙂 ) بالمياة المتسخة التي ملئت الشارع .. حركة انتقامية وجدت لها طعماً لا يوصف 😀 ، عندما أتأمل حالي في مرآة السيارة وأني بكامل (التشخيص) ومرتدياً النظارة الشمسية ورابط لحزام الأمان أضحك على حالي أو كما يقول صاحبنا الفيلسوف (الذي يضحك هو الطفل الصغير الذي بداخلك)، بل مرة قمت بالدوان داخل الحي مرة أخرى وعدت أكرر العملية (جازت لي)
* قبل نحو اسبوعين أشركت في لجنة لاختيار موظفين لإدارة أخرى لا أعمل بها، للأسف كانت نظرتي قاصرة فبينما كان البقية يتأملون السير الذاتية ويقرأون الخبرات كنت أعتمد على حاسة (النظرة الأولى)، وكما يعلق أحد الزملاء (انت شكلك جاي تحب مو توظف) ، لكن بالفعل كانت النظرة الأولية تعطيني الانطباع حول الموظف الجديد .. هيئته .. نظراته .. طريقة حديثه، لم أذكر أني سألت عن شهادة أو تقدير أو حتى معدل، أحمد الله بأنه لم يكن لرأيي سوى صوت بسيط في ترشيح الموظفين لأني لن أغفر لنفسي هذه السلبية التي أقع فيها دائماً فيما لو حرمت شخصاً لأن زيه (عبثي)، أذكر هنا ولله الحمد بأن من كان لي دورٌ في اختيارهم في المنشأة التي أعمل بها يعدون موظفين (من ذهب) وكثير ما أتلقى الإشادات عنهم من زملاء في أقسام آخرين من منطلق (يخوي من وين جبتوا موظفينكم 🙂 ).
مفهوم الانطباع الأولى سلبية دائماً ما أحاول أن أخلص نفسي منهما ، وفي العموم يصدر حكمي على الشخصية التي أقابلها (سواء لوظيفة أو غيره) من الدقائق الخمس الأولى، وحتى أكون صريحاً أكثر هناك أشخاص أنفر منهم وأنظر لهم بسلبية ولكن بعد عدة لقاءات أكتشف الجانب المضيء في شخوصهم ومنهم من أصبح صديقاً لي.
* عجّاز بنمرة واستمارة، مفردة (عجّاز) توصف للشخص الذي يؤجل أعماله يوماً بعد آخر تهرباً .. ويبدو لي أنها مأخوذة من (عاجز يعجز عجّاز 🙂 ) ، كثيراً ما أؤجل أعمالي يوماً بعد آخر وأحياناً بلا سبب، بالأمس كلفني العجز نحو قرابة ألفي ريال أجور تصليح لسيارتي لأني كنت أؤجل استبدال قطعة بأخرى منذ أكثر من شهر .. كل يوم أقول غداً .. بعد غد .. وفي النهاية كامل القطعة تعطلت، عطري نفذ من نحو اسبوع وفي كل يوم أقول سأشتري آخر لكنني (أتعيجز 🙂 ) ،منذ بدء التحول لارتداء الثياب الملونة وأنا أفكر بجزمة بنية جديدة بديلة عن القديمة التي أصابها (العجز وكبر السن 😀 ) .. وفيما يبدو لي أن الشتاء سينتهي وأنا لم أقدم على تلك الخطوة ، والمثير بأن هذا العجز يقابله العكس تماماً في بعض الحالات ، تخيلوا في أيام أقوم بتنفيذ 4 أو 5 مشاوير خلال ساعتين أو ثلاث .. تجدني في سوق الكمبيوتر في العليا ثم انتقل لاكسترا في السليمانية .. واتجه لشراء شماغ أو غترة من حي الورود مثلا .. وبعدها التقي بصديق ونذهب لحي الشميسي العتيق لمحلات (القرصنة 🙂 ) الشهيرة لتغيير سيديات السيارة .. قد ينتهي المشوار في بعض الأحيان إلى التوجه لتنفس جزء من هواء الثمامة أو أي منطقة خارج النطاق العمراني .. مزاجيات غريبة .. أليس كذلك ؟
على طاري (عجّاز) .. أتذكر أن المؤسسة التي أعمل بها حالياً منذ نحو 10 سنوات .. أول مابدأت كنت أعمل تجريبياً لثلاثة أشهر قبل توقيع العقد الرسمي، كان عملي في ذلك الوقت يبدأ عند الخامسة مساءً وحتى منتصف الليل، الشاهد أن مدير شؤون الموظفين أرسل لي خطاباً يطالب بتواجدي الساعة التاسعة صباحا في أي يوم من أجل التوقيع، (العجز) لعب لعبته معي لأني كنت (متعيجز 🙂 ) أقوم الصباح .. وبقي الحال لمدة اسبوع وكل يوم أقول لنفسي .. غداً سوف أصحى باكراً وهكذا حتى انتهى الحال بوجود خطاب تهديدي مضمونه(إن لم تحضر للتوقيع الرسمي غداً فإن المؤسسة ستسحب العرض ولن تكون مطالبة بدفع أي رواتب سابقة).. غنيٌ عن القول بأني واصلت ولم أنم حتى صباح اليوم التالي ووقعت عقدي مع دخول المدير عند الثامنة والنصف صباحاً .. أذكر أنه علق بعصبية (ناس ماتجي إلا بالعين الحمرااااااء )، علمت حينها أن اسمي بعد كل هذه السنوات أصبح مضرب مثل .. فكلما يقال لموظف جديد (تعال وقع) .. كان مسؤول التوظيف يعلق (انتبه لا تسوي سواة أحمد)

(برايفت .. أبو ناصر ويزيد بقرار 1860 الصادر من مجلس الأمن يمنع تواجدكم في التعليقات) .. والوعد خيمة الحرية.. إرمييييييييي 😀 ( هذا في البلاغة يسمى طباق مدري جناس .. يعني جالس أقول خيمة (الحرية) .. ثم أقول يمنع تواجدكم .. منع وحرية .. ولا ياصاحب 😀 )

27 فكرة على ”جزءٌ سلبي متهرطق

  1. تدوينة إنتحارية بعد منتصف الليل !
    ياخي أنت مخاوي جن ؟ ما تكتب الا تالي الليول الله يهديك

    للأسف أحمد ،،
    أكتشفت أن هناك كثير من الشبه في شخصياتنا 🙂 ، و العجز بالتحديد أحد الصفات المشهورة عني 😦

    متى يجي اليوم اللي نصير أنا وياك ما نأجل عمل اليوم إلى الغد !!

  2. – انتقامك من الشخصية )النافذة( عمل صبياني :p
    – طيب ماينفع اقول اني كسلانة ياخي بيخرب البريستسج :p
    التسويف والكسل دايما اوقع فيه حتى في العمل صرت معروفة فيه خخخ وما اسوي الشي اللي لما يكون لي مزاجولو سويته غصباً عني بيكون اي كلام ومليان اخطاء بينما لو كان لي مزاج اسويه من قلب وتركيزوشغل مية المية ويرضيني ويرضي ضميري ويبسط رئيستي
    حتى الاسبوع اللي راح كان عندي عطل في برنامج كشف حسابات العملاء وزميلتي من يوم الاتنين تقول لي خبري الIT وانا بس اصرفها واتفرج فيلم او اقرأ رواية الين ما اخدت على راسي وجاني عميل رفيع المستوىالمستوى طلب كشف حسابه وانا كنت وحدي عاد أم اللبخة والهجولة ومن جهاز لجهاز وقتها بس حسيت على نفسي وراسلت الIT
    – الحكم على الناس من النظرة الأولى من جد هي اللي امشي عليها ودايما الجلسة او اللقاء الأول هو اللي يحدد مدى طول العلاقة بيني وبين الطرف التانيوالحمد الله ماعمري ندمت على دا الشي الا مرة وحدة خلال 8 سنوات هي مدة جلوسي في ماليزيا وفترة النضج الحقيقي (حتى اولادي حبيتهم من اول نظرة<< مدروخة خخخ)
    -من اكتر السلبيات اللي في واللي بحاول اعالجها هرجي الكتير في الاماكن اللي تعجبني او في المواضيع اللي تروق لي ماتلاقيني الا متكلمة وداقة 120 ومسوية ازعاج وما استوعب الا بعد فترة
    – شي تاني اللي هو المزاجية في حياتي زي ماكتبت فوق زيادة على كداسرعة تقلب مزاجي تلاقينيني مثلا اسمع فيروز شوية اقلب علىازعج شي في الدنيا!

    يلا خليني ألملم عفشي وفضايحي هرجت كتير كالعادة وربك يصبرك علي وعلى المحشات خخخ

  3. لاهي طباق ولا جناس 🙂

    ممكن كناية ؟!

    أشاركك كثيراً في العجز 😦 ، مع أني أشهر ممتر في الرياض كل يوم ، لكنني وجدت حلاً لها

    أن أقضي مشاويري مع أحد الأصدقاء النشيطين 🙂 ، فما عنده مشكلة يقعد نص ساعة في محل أحذية وممكن ياخذ حذاء معك لو شاف شيء أعجبه !

    ومن هذا المنبر وانطلاقاً من قرار الأمم المتحدة، أعلن تضامني معك في أي مشوار لو كان وقتي يسمح طبعاً 🙂 >> شخصية نافذة صغيرة 😀

    تدوينة جميلة أفكر ان أكتب مثلها قريباً ..

    صباحك مشرق أيها العجاز

  4. ياخي مشكلتك الى اعرفها عنك عجاز
    عاد انا اشترك معك بهالصفة يا احمد
    بس على الاقل انا احسن منك ..
    احس اني اطلع واروح واجي .. انت طريق الملك
    فهد من جهة الشمال وبس .. سردادي مردادي على الجريدة ..

    لكن تصدق .. على طاري النظرة الأولى .. أسويها احيان بالبنك
    اعرف هل العميل هذا ممكن اكون معه علاقة بنكية بحيث اقدر
    ادخل معه في مواضيع ثانية واكسب ثقته .. او اني اخدمة بالشي
    اللي يبيه واسكت .. احيان فيه عملاء وده بخدمات ثانية بس يخاف
    انه يطول أو محد يعطيه بال ..

    أحمد .. منهو اللي علمك .. أرميييييييييييييي .. لايكون ابو سعد ؟

  5. يقول ميسي:

    آسف مستر احمد ،ولكن لاحظت كثيرا زهوك بنفسك ،،هذا اولا …ثم قصة الانتقام من جارك ماذا حدث بعدهاهل لاحظ ام انه لم يكترث،،،ثم هل غيرت على دورس اللغة العربية ،ام هذه نفحة الغرور ؟؟هل ستقى ليلي وطوطي الهوا؟

  6. @ عبدالله أبا حسين :
    انا قلتها .. زي الشعراء يقولون شيطان الشعر .. برضه للكتابة شيطان .. وشيطان الكتابة لا يظهر إلا بعد منتصف الليل

    التعيجز صفة من صفاتنا نحن السعوديين وأحد أسباب تأخرنا .. كلنا عجازين 🙂

    قبل يومين (التي بوي) في الدوام كسر كوبي جعله مانيب قايل .. واتوقع اني ماراح أجيب كوب جديد إلا بعد اسبوعين ..

    @ asma qadah : هلا بك بنت قدح ..
    العمل الصبياني مو معناته شي سلبي .. بالعكس يمكن يكون ايجابي 🙂
    – الهرج الكثير على قولتك مو شي سلبي لانه هو أصل المرأة .. يعني المرأة اللي ماتتكلم كثير معناته فيها بلى 🙂 .. فما أشوفها سلبية
    – المزاجية هي الحالة الصعبة صراحة والله يكون بعونك .. الحال هذي تمر علي يمكن مرة في الاسبوع وأكرهها كره الويل .. بس اشوى انها ماتطول

    @ صاحب القلم :
    لا طباق ولا جناس .. أجل شكلها مطبق ؟
    عاد تدري .. أكره شي اني اتسوق ويكون معي واحد .. ماعررررررررف ابد .. آآخذ همه .. كل ماجيت أدخل محل ولا أغير آخر همه واقول اني مسوي له قلق وكذا .. لذلك انا اسرع متسوق في العالم وهذي راح يكون لها تدوينة لاحقة ..
    خلنا نشوف ياباشا هاليومين .. بس انا اللي بحاسب صدق 😀

    @ مشغول :
    حلوة سردادي مردادي .. وش عندك طايح بمصطلحات جديدة .. من جالس تماشي 😀

    برضه جازت لي علاقة بنكية .. مع اني لما قريتها اول مرة كانت تشير الى شي ثاني بعععععععععيد

    اللي عملني إرمي .. معلمي ومبجلي (شؤ شؤ) غفر الله له 😀

    @ ميسي :
    لا تكفى ياميسي .. وين زهوت بنفسي .. حرام عليك والله مازهوت مدري مازهيت ابد .. قل لي في أي سطر عشان امسحها ، جارنا ما ادري عنه بصراحة واصلا انا ماقد شفته ( الشخصيات النافذة ماتنشاف) .. بس الحركة ذي طيحت اللي في راسي .. لا اكثر ولا اقل .. طبعا الجار لن يكترث لانه ماراح يدري .. اللي بيكترث هم العمالة

    بعدين دروس اللغة العربية انا اتكلم من واقع خبرة وليس نفحة غرور .. يعني المفروض أصير خبير لغة بس الله ماكتب 😀

  7. يقول ليلى:

    اهلا..اما حركتك بالسيارة اعجبتـــــــــــــــــــــــــــني بس موب داري عنك .. الله يعين كومار على التمسيح..ليه ماتروح لابو الجيران وتقوله ياخي مالك داعي زيك زينا وبالمرة عشان تشوفة يمكن يصير وزير وتستفيد منة.

    وبالنسبة للاخ في الأعلى اللي ذكر الزهو .. والله معه حق أنك مزهو بنفسك بشكل.. وفيك صفه ما اعرف اذا ميزة او عيب انك ماتحقر روحك يعني تحس حالك مو زي البقية.

  8. _ شوف أحمد بالنسبة للسلبية الأولى أجدها ردة فعل طبيعية وَ تبغى الصراحة هذولي ناس ما يجون إلا بالعين الحمرا .. بس نصيحة المره الجاية إذا نويت تُقدم على مثل هالخطوة وَ تتهور تأكد إن مافي أحد منا وَ لا منا ما تسوى عليك يجيبون خبرك عند ذا الشخصية النافذة وَ تصير وقتها عبره لمن لا يعتبر وَ سيرتك على كل لسان 🙂 .. إلا ع الطاري ذا الشخصية النافذة ما عنده كراج يوقف سياراته فيه 🙂

    _ سالفة من النظرة الأولى تحكم ع الشخص و الله مشكلة خصوصاً إذا كانت في شئ مصيري أحسها ظلم .. بس على فكرة كثيرين أعرفهم عندهم نفس هذي السلبية وَ دائماً أقولهم لا تحكمون ع الأشخاص بهذي الطريقة لأنها راح تظلمه وَ تؤثر على مستقبله ( عاد أنتوا وَ ضميركم يا راعيين النظرة الأولى 🙂 )

    _ اختبار لإكتشاف إنك عجّاز وَ لا لا : إذا وقفت عند بقالة أو مطعم تزمر وَ تهورن وَ تسوي حفلة ما بعدها حفلة عشان يجي واحد من البقالة أو المطعم وَ ياخذ الطلب , وَ لا تنزل بدون ما تسوي كل ذا الصجة ؟

    سؤال قبل لا اضغط enter وش معنى ” متهرطق ” ؟ 🙂

    دمت بود

  9. يقول nOuf.a.s:

    مرحبا أخ أحمد ..
    سأحاول أن أكون مهذبه نوعاً ما 😛 !

    في النقطة الأولى .. هل ردة فعلك كانت تجاه اللي يسويه الجار من ملئ الشارع بالمويه ؟ أو تجاه اللي تسويه البلديه من سكوت له و ” عدوان ” عليكم ؟
    بعدين حدد موقفك .. هذا الفعل تعتبره سلبي وإلا ايجابي ؟؟ لأن في ردك على بنت قدح ناقضت نفسك يا خوي 😛 ..

    النقطة الثانية .. الزهو الزهو هههههههههههه
    أجل سلبي بعدين تقول : ” أذكر هنا ولله الحمد بأن من كان لي دورٌ في اختيارهم في المنشأة التي أعمل بها يعدون موظفين (من ذهب) وكثير ما أتلقى الإشادات عنهم من زملاء في أقسام آخرين من منطلق (يخوي من وين جبتوا موظفينكم 🙂 ) ”
    هذا هو الزهو اللي يقولون عنه ..

    والعجز هذا ختم الله يسلمك عادي لا تعده من السلبيات !

    حاولت بقدر الإمكان إني أكون polite 😛 !!
    والله ما كنت أبي أرد .. بس رد ليلى حفزني هههههههه ..

  10. يقول yam2020:

    انا كنت ناوي اضرب في المليان لو ما لقيت تدوينة هذا اليوم … صار لنا فترة من بداية العام وها2009 تطلع لي كل شوي … بس الله فكك
    انت مغرور ؟!! لا ما اتوقع بالعكس انا اعتبرك واثق باستحقاق (الحقوق محفوظة)
    نرجع للعجز والكسل وهذي صفة سائدة (على وزن شخصية نافذة) لدينا يا عربستان (اسماء!!) وخاصة التسويف وكله بكرة او بعدين. الى درجة ان البعض يسوف في كثير من القرارات المصيرية الهامة عجزاً (كاكمال الدراسة والزواج مثلاً)…
    اما بالنسبة للانتقام من النافذين بهالطريقة الاعنيفة فهذا حقك في التعبير عن رفضك لكل الهدر والارباك الذي يسببه عمال معالي الجار المصون ولا ارى بأس في هذا .. والله اعلم.

    كتب هذا السفر قبل عشاء يوم الاحد الرابع عشر لعشر سنوات خلت واربعمائة بعد الالف من هجرة الحبيب صلى الله وعليه وسلم.

  11. يقول جوري:

    هذا وانت متعجيز مشالله مدونتك كل يومين تكتب اجل لو انت نشيط يمكن مالحقنا نقراء

    مشالله مشالله
    مافي احد خالي من العيوب لو احد قال مافيني ولا عيب هذا اكبر عيب عدم الاعتراف
    مدونه رائعه رغم انك ترفع ضغطنا بعض الاحيان بس اختلاف الاراء لايفسد للود قضيه

  12. @ ليلى : صح مهوب داري عني بس مثل ماقلت .. طيحت اللي في ررررراسي ، بعدين ابو الجيران ماقد شفته عشان اكلمه ، بعدين سالفة الزهو .. خلاص .. زاهي زاهي .. براحتكم 🙂

    @ light : هلا بالليدر .. ، الشخصية النافذة ترى مو بيتهم قصر كبير يعني لا يروح بالكم بعيد … يعني حاجة يمكن الفين متر بس 😀 والسيارات اللي توقف برا هي السيارات اللي ماقدروا يدخلونها جوا من الزحمة ..
    سالفة اني أوقف عن بقالة وادق بوري عشان العامل يجي .. لا والله هذي اشوفها عيب وعيب مرة واحتقر اللي سويها ، إلا والله انزل وانا ماشوف الدرب

    متهرطق مدري .. جاية من الهرطقة ..

    # nOuf.a.s :
    هلا باللي تحاول تكون مهذبة ..
    ردة فعل تجاه مايفعله الجار .. ولا البلدية ماعلي منهم ولا كان جلست ادور عندهم وارش مواترهم بالموية
    بعدين ردي على سليلة عائلة آل قدح مافيه أي تناقض .. ابد ابد .. أنا قلت عن العمل الصبياني بشكل عام انه مو شي سلبي واحيانا يكون ايجابي ..

    بعدين وانا صادق .. يمكن نظرتي ثاقبة ولا فيه زيها 🙂 .. ووين الزهو في الموضوع
    الحمد لله كل اللي توظفوا وانا لي علاقة بتوظيفهم هم أنجح الأشخاص حتى الان، مو بشهادتي بل بشهادة كل موظفي الدوام الكبارين 😀 والدليل الان انهم صاروا يضموني ان كان فيه اختيارات اخرى حتى لأقسام ثانية .. هذا الزهو ولا بلاش 😀

    ويلكم باك ياراعية حايل .. ولاهوب لازم ليلى ترد ..

    @ yam2020 : حلو حلو .. اي يابن الحلال هذي الردود .. وينك من زمان .. ذلوني في الردود اللي فوق بسالفة (الزهو)

    أما سالفة كتب هذا السفر قبل عشاء يوم الأحد .. حسيت اني رجعت للعصر الأندلسي مدري الأموي .. تخيل كان عندهم مدونات هذاك الوقت وشلون بيصر الحال

    @ جوري :
    اي متعيجز وانا الحين كملت 11 يوم ماكتبت .. أحييك على هالمداخلة رغم اختلاف الآراء على قولتك 🙂

  13. هلا أخوي أحمد ،

    من منا لا توجد لديه سلبيات ولكن الجميل الشجاعة التي تمتلكها لتتحدث عن سلبياتك ..

    إذا حسبناها معادلة رياضية على شاكلة القاعدة التي تقول !ذا كان س = @ فإن ص =@ هذا يؤدي بل يظهر أنك تمتلك شخصية واثقة ..

    جميلة التدوينة وسلس طرحك ..

    ببالتوفيق ،

  14. يقول العنود:

    أن يصارح الانسان نفسه بأخطائها هذا بحد ذاته شجاعة فمابالك
    أمام الاخرين أحييك على هذه الجرأة
    أما النظرة الأولى فهي أكثر ماأعاني منه ودائما أتوعد نفسي بعدم اتباعها
    ولكن هذا موجود بالنفس البشريه فكل ا نسان يبني رأيه على أساس شخصيات يعرفها من السابق
    ومن ثم يبدأ المقارنة على أساس الشبه <<صفقوني اذا كنت فاهمه شي من فلسفة علم النفس بس كذا قال الدكتور
    واتذكر بعد بمطعم بالخارج يحاول يلغي الاعتماد على هذي الحاسة ومحاولة الاعتماد على حواس أخرى
    أول ماتدخل المطعم كله ظلام ومعظم العاملين بالمطعم فاقدين البصر
    وبس

  15. فكرة الاعتراف بالسلبيات جديدة.. بالنسبة لي
    مو بعيد استلفها..
    الله يستر من اللي بيطلع!
    🙂

  16. أهنيك يا أحمد على الصراحة والجرأة في ذكر بعض الأمور الشخصية لك ….

    بالنسبة لي ما اعتبر كلامك غرور أو زهو بنفسك , بالعكس أنا أراها ثقة …

    مشكلتنا مانقدر نفرق الخط الفاصل بين الثقة والغرور , الناس يرونها من خلال نافذة العقل فلذلك نختلف دوماً في تقدير الموقف إلا الشي الواضح عاد مايبي له كلام ..

    أم اسالفة النظرة الأولى شكلك تطبق حكمة : الحب من أول نظرة

    وأنت مسويها 🙂

    عموماً جائما النظرة الأولى أو الجلسة تعطيك تصور كبير عن الشخصية , وصار لي قبل أقل من شهر واحد أنه واحد مقدم وظيفة وكنت أحد أعضاء اللجنة , والله يمكن ماكمل 5 دقايق وعرفت أنه مهايطي ومسوي نفسه أبو الشبكات والعلوم :p

    دمت لنا مبدعاً

  17. يقول جويريه:

    اتفق معهم انها ثقه مو غرور :/ .. ما ادري ليه صنفوها غرور

    عمرما نرجع للموضوع

    ومافيه احد يخلوا من السلبيات .. والعجز فينا فينا ما اتوقع سعودي مو عجاز الا ماشاءالله منهم
    اعجبتني حركتك لجاركم .. أهم شيء طيحت الحطب اللي براسك

    بالنسبه لي كاثره سلبياتي للأسف >< ليه مدري عني 😦

    بالتوفيق

  18. يقول ميسي:

    والله خفتك تزعل من كلامي لانه من العياري الفسفوري ،،بس غرورك انا اعرف انها تسمى فراسة تلك الحاسة عندك بس هذا من فضل ربي ،على فكرة دروس اللغة العربية لست معترض عليها لاني ممن يهوى حتى النخاع العربية ،،،ملاحظة لك وليست مجاملة رحابة صدرك تروقني جدا

  19. يقول nOuf.a.s:

    >> توضيح ..

    لما علقت على نقطة الزهو ما كنت أقول إنك مغرور أو غيره ..
    انت اعتبرت ( حاسة النظره الأولى ) شي سلبي وبعدها وضحت إن الموضوع ماشي معاك .. فهذا يدل إن اللي عندك ( يعتبر ميزه ) مو العكس !
    فلما تقول إنك بتذكر سلبياتك بعدين تمدح نفسك فيها .. هنا ((( الزهو 😛 ))) ..

    عموماً هذا الرد لحضرتكم ولا أفضل اظهاره للشعب ..
    بس شفت ان العالم بدت تدافع .. فقلنا نوضح !

  20. لا يوجد انسان خالي من السلبيات!
    هناك من يحترم ويقدر ذاته بالرغم من وجود بعض السلبيات ويحاول تلافي هذه السلبيات!
    وهناك من يهمش ويحطم ذاته بسبب هذه السلبيات أو بسبب الحب الجنوني للمثالية!

    أعاني من “العجز” وبشدة!
    لو أقول مثالين بس جان قلت انت “الحمدالله الذي عافانا” 😛

  21. أستخدم الطريقة الأولى كثيرا حتى الآن مع مديرتي .. ولست آسفة على ذلك 🙂
    نعم سلبية، مغ سبق إقرار وترقب أنت تشيط غيظاً مني وأكون (طيحت اللي براسي وراسها) ..
    ورب ضارة نافعة 🙂
    .
    .
    .
    لا أدري لماذا كان الحديث عن اللغة .. أجدها جميلة ومتمكنة بحق!
    (ما شاء الله)

  22. تعديل: مع سبق إقرار وترقب .. وأن تشيط غيظاً مني وأكون (طيحت اللي براسي وراسها) ..

  23. يقول ليلى:

    مرحبا,
    اذا يهمك رأيي كمتابعه..اللوقو اللي فوق موب حلو القديم كان احلى ومعبر أكثر…وماالسر بوجود برج ايفل .. هل هو يرمز لشئ معين يخدم المدونة

    أراء لا اكثر إن لم يرق لك شئ منها لاتسمح بظهور الكومنت

  24. @ خالد : هلا بك خالد .. والله عاد تراها مهيب شجاعة كبيرة 😀 ياما تحت السواهي دواهي .. لا تخليني أتحمس ثم أجي اكب العشا

    @ العنود : فعلا انا اشوف الكثير يعاني من اشكالية الحكم من النظرة الأولى .. لكن أشوف انه مو عيب كبير اذا منح الطرف الثاني فرصة لإبراز نفسه .. يعني مو خلاص النظرة الأولى مو كويسة نسوي ديليت 🙂 ..

    @ فضاء : ههههههههه اجل شكلنا بنخليها حملة في كل المدونات 🙂

    @ بدر الشايع :
    هلا بك يا (العالمي 🙂 ) ..
    كويس اصوات المعارضة للزهو كل شوي تزيد .. رووووووح ادعسسسس

    تبي الجد .. المهايطية وانا اخوك يبانون من اول نظرة .. تدري مرة واحد جاب لنا سيرة ذاتية طويلة عريضة ومن بين المواهب اللي كاتبها (القدرة على تحميل البرامج من الانترنت) .. ووش رايك بالله 😀

    @ جويرية :
    شوية طيحت الحطب .. إلا من جد انبسطت على الحركة وصرت كلما شفت الشارع مليان دعست زود .. والظاهر يوم السيارة بتهج واخش في وحدة من السيارات الواقفة ههههه
    على طاري جويرية .. ترى البيت ماهنا بعد عن شارع جويرية بنت الحارث 😀

    @ ميسي :
    وش دعوى .. انت عزيز وغالي يكفي طلتك سواء هنا ولا مع الفريق 😀
    سعيد بتواصلك .. وافتخر بذلك 🙂

    @ nOuf.a.s :
    آآهااااااااا .. أهووو كداااااا
    من حقك التوضيح وحتى من أجل الشعب .. كفو ياراعية حايل 😀 .. كيف الشبة 😀 😀

    @ كيفي كويتية :
    بالضبط .. اللي يدعي بأنه خالي من السلبيات على وزن خالي من الدسم .. هذا يصنف مهايطي بنمرة واستمارة ..

    مايمنع ناخذ المثالين حقت العجز .. بس وش دعوى الكويت هذا كبرها .. يعني كل شي حولك حواليك .. الظاهر يمديك تطلعين المولات مشي 😀

    على طاري الصغر .. مرة رحت قطر وسألت عن مكان وانا عند الشيراتون .. رد علينا مصري وقال (ياااااااااه … ده في آخر البلد في الناحية التانية) .. المهم عقبه وقفنا تاكسي وطلبنا المكان .. والله ماكملنا 7 دقايق الا حنا واصلين ، قلت لزميل قطري بعدين (لو اني مكانك كان من النوع اللي أخلص كل مشاويري الظاهر في نص ساعة) .. لا وعلى رجولي بعد

    حياك 🙂 أو بمعنى أدق .. حياج الله وشاكر لج <<< من زمان وهي على لسانه 🙂

    @ ود : كيف الطريقة الأولى .. حركة السيارة ولا قصدك النظرة الأولى 🙂 ؟

    @ ليلى : التجديد شي مطلوب بين وقت وآخر .. وأنا أشكر الصديقين العزيزين اللذان ساهما في إضافة لمسات جديدة .. برج إيفل لا يرمز لأي شي بل أن الصورة أعجبت المصمم ونفذها

  25. أبد “بطاقتي المدنية” ضايعه صار لها يمكن سنتين واكثر ولا طلعت وحده بدالها ولا حتى خذيت بدل فاقد 😀 حاليا الجنسية هي اثباتي الوحيد 😀 اخذها في مراجعاتي للبنك أو اي مكان ثاني! مادري صراحة متى بطلع بطاقة يديده ؟ يمكن اذا ضاعت الجنسية بعد 😀
    سبق وضاعت بطاقتي قبل هالمرة .. على ايام الجامعه وطلع لي الوالد الله يطول بعمره وحده .. ولما ضاعت مرة ثانيه قالي انه ماله شغل بالموضوع 😀 !!
    ثاني مثال 😀
    قبل عيد الفطر فتحت لي حساب يديد .. قالولي تعالي استلمي البطاقة بعد اسبوع .. مر اسبوع اسبوعين شهر شهرين .. دزوا مسج عزيزنا العميل 😛 وعمك أصمخ 😀
    وتأكيدا على معلومة ذكرتها 😀 بينا وبين فرع البنك شارعين 😛

  26. العجز شي لاصق بكل سعودي وسعوديه 🙂

    يعني مافي مفر منه ابد ..

    مثلي طقيت 4 شهور اقول بروح اجيب بخاخ ينظف الاب بس العجز لمين نخليه 🙂

التعليقات مغلقة.