أخاف عليك من العين

 

عندما اختتمت موضوعي السابق بسطر قلت فيه بأني أمر بحالة غريبة تنتابي للمرة الأولى منذ أن فتحت المدونة في فبراير 2005 تمنعني من تحويل أفكاري إلى كلمات ، حتى تلقيت رسالة SMS من مدون عزيز ورسالتين أيضاً عبر الايميل تفيد بأن الأمر قد يكون (عين) – من زين مواضيعي الحين- وان كان في الأمر شيء من التهكم .
تذكرت هذه الكلمات حينما كنت أدرس في الجامعة محطماً أرقاماً قياسية في الرسوب وحمل المواد والحرمان ، كنت حينها أمثل الوجه الأسوأ للطالب الجامعي بكل ماتحمله الكلمة من معنى ، كان أحد الأصدقاء يصر حينها على الذهاب بي لشيخ في مدينة صغيرة قرب القصيم من منطلق (ان فيك عين) وذلك بعدما ذكرت له أني كنت طالباً متفوقاً في السنوات السابقة – ماقبل الجامعة – وان معدلي كان لا يقل عن الممتاز حينما كان لا يسجل هذا التقدير سوى طالبين أو ثلاثة في الفصل الواحد – وليس كل الطلاب كما هو الحال في الوقت الحالي – ، رفضت الدعوة بكل تأكيد لا لأني لا أؤمن بالعين فهذا موضوع آخر ، بل لأني أعلم في قرارة نفسي بأن العيب مني ، لم أكن أذاكر على الإطلاق ولا أدرس وكنت أقضي كل الوقت على شبكة النت وكانت للتو قد وصلت للمملكة في ذلك الوقت ، كنت أقول له بأن تفوقي في الابتدائي والمتوسط راجع إلى اعتمادي على الذكاء (منتب عاقل ياانشتاين) .. على فكرة من حقي أن أدعي الذكاء 🙂 .. أقول كنت أعتمد على الذكاء وسرعة البديهة والذاكرة التي كانت خالية من أي شيء في ذلك الوقت ، ببساطة عندما درست في الجامعة وعملت في الفترة المسائية صحفيا وبدأت أقضي ساعات طوال على الانترنت امتلأ العقل بالهموم والأفكار والتطلعات .. كنت أسهر الليل بجانب كتاب لتعليم البرمجة بـ (الفيجوال بيسك) وصفحات مطبوعة من موقع لتعليم برمجة CGI العتيقة وفي الصباح أذهب لدراسة لغة إن وأخواتها وكان وصديقاتها والاستعارة المكنية وقصص (الدشير) امرؤ القيس وأبو نواس ومغامرات عمرو بن أبي ربيعة أكبر (صايع) في وقته حينذاك.
أسوق هذه الكلمات معتبراً بأننا نعيش في هذا العصر مرض نفسي اسمه (فوبيا العين) ، فأصبحنا نسقط على العين والحسد كل أمرٍ سيء حتى في أمور تافهة .. بل أحيانا أشاهد أطفالاً صغارا يخسرون مباراة في (البلاي ستيشن) ثم يبررون الخسارة بأنها (عين أصابتهم ) .. أو كما يقولونها باللهجة المحلية (صكوني بعين) .
الآن .. أي شخص يشتري سيارة جديدة ثم يعرضها لأصدقائه وبعد أيام يتعرض لحادث مروري فإنه مباشرة يبرر ذلك بأنها (عين) .. لدرجة أني أصبحت أتحاشا أن أشيد بأي سيارة لأي صديق حتى ولو من باب المجاملة لأني أخشى أن يتعرض لحادث مروري حتى ولو كان بسيطا ثم يقول لأصدقائه بأني صدمت بها بعد أن مدحها أحمد .. وهكذا ، بل حتى أني وقفت على عدد من الزملاء يتلافون المدن والمناطق التي سافروا إليها حتى لا يصيبهم (عين) .. بل أن أحدهم حدثني أنه سافر إلى لندن في الصيف الماضي .. وفي جلسة مع زملاء آخرين سألوه أين قضيت الصيف فأجاب (أبد .. طلعت دبي 4 ايام ) ، وعندما سألته هل أصبح ذكر لندن مخجلاً أمام الناس فأجابني ( ياخي مابي أحد يصكني بعين ) .
بالفعل تحول الأمر إلى (فوبيا) ، بالأمس قرأت في إحدى الصحف أن سيدة وضعت إعلانا تؤكد فيه أنها تجمع (بقايا مشروبات النساء) في المناسبات وأنها تملك بقايا لكل سيدة في الحي أو مايسمونه بـ ( الغسال) لبيعه لكل إمرأة تعتقد بأنها محسودة أو مصابة بالعين .
أكرر .. أنا هنا لا أنفي وجود العين أو الحسد بل أن مع الاستعاذة الدائمة من (شر حاسدٍ إذا حسد) ، لكن في الوقت ذاته لا أتفق مع إساقطها على كل حدث سيء ، احترق المنزل .. عين وأصابتنا .. إمرأة تصاب بسرطان في الرحم .. عين أصابتها كثرة إنجابها ، فلان انقلب بسيارته الجديدة .. عين ماصلت على النبي ، علتان سرق جهازه المحمول .. عين جته !.
زوروا دولاً عربية مثل مصر – أنا أسوق البلد تمثيلاً فقط – وشاهدوا كيف تحولت هذه الفوبيا إلى تجارة رائجة جعلت كثير من الناس يلجأون إلى عقد وسبح وأساور توضع في المنزل والسيارة وحول العنق اتقاء شر العين .. والله أني كلمت تأملت هذه المناظر تيقنت سبب تخلفنا نحن العرب .
أخيراً أقول – للمرة العاشرة 🙂 – أنا لا أنفي وقوع العين والحسد

32 فكرة على ”أخاف عليك من العين

  1. العين حق والله يكفينا من العين وشر الحاسدين ..
    مع اننا ما نملك شي يستحق اننا نكون محسودين
    بس يلا على قولتهم يخافون (يحسدون الفقير على موتة الجمعه) ..

    شخبارك ؟ 🙂

  2. والله العين حق يااحمد .. محد يقدر ينفي هالشي ..
    وفيه اشياء كثيرة تصير لي ، والي حولي يقولون “عين” ، عاد أنا أنفي هالشي(أخاف على نفسي) ، وفي الأخير يطلع الكلام صح ، بعد ما”تسحبني” الوالدة لشيخ 😀
    عليك بالمعوذات ،والتحصين اليومي ، وان شاءالله مابتشوف الا كل خير .. (صدّقت إنه عين) 🙂

  3. و الله صادق اصبح عند الناس هوس ..كل ما قد يحصل لهم يصبح عين ..

    و العين حق بس مو بكل شي .. اذا طاحت الوحده ولا ما نجحت بماده صارت عين ..

    و بعد هذا ما يمنع الشخص من انه يحصن نفسه بالمعوذات ..

    اشكركـ ع الطرح الرائع

  4. يقول جوري:

    اقتباس:
    والله أني كلمت تأملت هذه المناظر تيقنت سبب تخلفنا نحن العرب
    كلما تاملت وليس كلمت”الظاهر انك انك صكيت نفسك عين وكتبت غلط لانه محد عندك وانت تكتب المقال الظاهر
    كالعاده لااقول الا انك مبدع ورائع مشاااااااااااااااااااااااءءءالله عليك<<عشان لاتقول حسدتني

  5. هو أمر العين واقع ما ننكره بس أحياناً ناس يبالغون وَ بقوة بعد .. وَ أحياناً في ناس ما تلومهم

    بقولك سالفة صارت لأخوي يوم كان يدرس بالقصيم السنة اللي مضت ( الله لا يعيدها من أيام ) , ذاك اليوم راح لمكتب العقارات حتى يسلم مفتاح شقة كان مستأجرها , المهم دخل واحد ورا اخوي للمكتب وَ قال ميد السيارة ( المزيونة اللي واقفه بره تبع مين ) , قال أخوي : ( أي وحده .. ملقوف ليش يسأل ) , قال : البيضا . قال أخوي : حقتي ( فرحان بعد ) . قال : وش هي ؟ . قال أخوي : انفينتي … انتهى الحوار ( تخيل انتهى الحوار و لا قال ما شاء الله 😦 ) وَ طلع أخوي من المكتب عشر دقايق وَ صار معاه الحادث ( الحمد لله طلع منها سليم .. جرح بالراس , اليد و الرجل ( كل هذا سليم ) .. مسكين عين وَ صابته 🙂 ( خنت حيلي ) .. تخيل ما كملت حتى سنه معاه ..

    http://www.flickr.com/photos/26239650@N03/2583984997/

    أحمد بعد هالسالفة وش تعتقد ؟ ..

    أما سالفة الجامعة بصراحة شئ يعني الحمدلله طلعت منها بسلامة 🙂

    على العموم دمت بخير بعيداً عن أعين الحاسدين

  6. يقول إيمان:

    يمكن من شي ثاني !! مش شرط عين !!

    فيه حركة ناس ساكنين عدال بيتنا مسووينها عن الحسد … تنفع تطبقها في مدونتك

    هم كاتبين بالخط العريض على بوابة البيت … ” ما شاء الله ” … طبعا اللبيب بالإشارة يفهم

    ليش ما اتسوى شراتهم ؟؟ 😉 بتغصب اللي فيه عين إنه يذكر الله و ما تصيبك عينه 😀

  7. يقول ريــم:

    العين حق ..
    بس احيانا نقرا على انفسنا ونشرب ماء زمزم مو لاننا نحس اننا انصكينا عين ماصلت على النبي
    بس لاننا عارفين ان محد بيشفينا الا ربي
    .
    .
    بس عاد هوس .. فلان صكني عين .. تراه مثل هوس الشهرة .. وده يحس ان عنده شي الناس ماعندها زيه وانه غييير عن الناس
    أما عاد الواحد كل ما كح والا انقطعت جزمته بيقول عين فهذا يبيله علاج نفسي

  8. كلامك واضح وعين الصواب .
    ” بالأمس قرأت في إحدى الصحف أن سيدة وضعت إعلانا تؤكد فيه أنها تجمع (بقايا مشروبات النساء) في المناسبات وأنها تملك بقايا لكل سيدة في الحي أو مايسمونه بـ ( الغسال) لبيعه لكل إمرأة تعتقد بأنها محسودة أو مصابة بالعين .”
    ضحكني الاعلان كثير واعتقد ان هذه السيدة ذكية لأنها استطاعن أن تستغل نقطة الضعف المتاحة في مجتمعها لتحقق مكاسبها ..
    وكالعادة أنت في الموعد ..

  9. يقول مهند:

    السلام عليكم ….
    زماااااااان عن مدونتك يا احمد
    انا دايم اقول ان العين الناس يستخدمونها اذا ما عرفوا وش السالفه
    يعني يا يصير عارف ايش العله بالضبط والا يحطها بالعين علطووووول مستحيل يقول ما ادري!!!!

  10. @ مشغول : هلا بك مسيو .. من جد مانملك شي ، يعني لدرجة ان الواحد ماصار يعلم وين سافر هذي من جد مشكل كبير

    @ photon : بلاك ما انصكيت عين للحين على هالطبخات اللي تبكي ( يالله فرصة ان جاك شي قولي احمد صكني بعين 😀 )

    @ نقطة : هم الحين الفاشلين – أمثالي 🙂 – لقوها فرصة .. كل ماصابهم فشل قالوا والله جتنا عين ولا أول وش حليلنا

    @ جوري : هههههههه لا كويس ما انتبهت للغلط .. اصلا انا متعمد الغلط عشان ماتجينا عين يقولون ذا مايخطي أبد

    @ light : انا قلت اني ما انكر وقوع العين ابد ، تصير .. بس عاد شكل اخوك يدرس بالشماسية 😀 .. الحمد لله جت سليمة على قولتك 🙂 ، بعدين مين قال اني طلعت منها .. عقب هالخربطة واطلع وش هالكلام 😀

    @ خاطرة بيضاء : جوي بارد ، مافهمتك ترى

    @ إيمان : من ناحية اسوي شراتهم .. ما افكر ، لان ماعندي شي يسوى العين .. شين ومواضيعي زي وجهي ومنكرف في الدوام وعايش في الرياض يعني جمعت المجد من اطرافه

    @ ريم : والله بديت اشك انك وكيلة لموية زمزم في الرياض .. كل رد لك في شي عن ماء زمزم .. شوووو الرمسة 🙂
    نظراتي الشمسية انكسرت اليوم .. صح يمكن انها عين وانا مدري

    @ خالد : كويس انت شفت الاعلان كيف 🙂 .. هالنوعيات راح تنافس بيل جيتس من كثر مدخولها ماشاء الله تبارك الله

    @ مهند : وين لميس 😀 (ولا نور 🙂 ) – مدري اي وحده فيهم –
    المشكلة الحين تصير مصايب ناتجة عن اهمال .. زي اللي يطلع مثلا ومخلي الكواية تشتغل مثلا .. يشب البيت ويحترق ولما يرجع يقول والله جتني عين ، كيف جتك عين وانت مهمل

  11. يقول توتو:

    بختصار لا يجيك شي وتحرمنا من مدونتك عين ما عين احنا نبيك سالم علشان تكتب اكثر وتمتعنا اكثر وما شاء الله عليك

  12. نحب ان نعلق كل الاخطاء علي غيرنا، و هذا شئ نتعلمه منذ الصغر. عندما يقع الطفل الصغير اري بعض اقاربي يضربون الارض و لا يلومون الطفل، و تنشأ معه هذه العادة السخيفة، فاذا كان يمشي و صدم الطاولة، قال ان مكان الطاولة خطأ، فهو ليس بالمخطئ ابدا، و تري ذلك في تصرفات عدم الاعتذار من الاشخاص في مجتمعنا، فقد كبرو علي انهم علي حق و كل ما ضدهم علي خطأ. احييك علي اعترافك انك لم تكن تذاكر و لهذا درجاتك كانت غير جيدة، غيرك قال و يقول ان عين اصابته او دكتور يكرهه.

    اما عن العين، فالعين حق و كل ذي نعمة محسود، و لكن، هناك ايضا ما يسمي بself fulfilling prophecy ملخصها انك لو اتعتقدت ان شيئا ما سوف يحصل لك، فسوف يحصل، و قد قالها الرسول صلي الله عليه و سلم، تفائلوا بالخير تجدوه، و قال ايضا لا تتمارضوا فتمرضوا فتموتوا.

    والله يحميك من كل مكروه، قول امين

  13. أهلاً يا صاحبي

    موضوع العين يختلف من منطقة لأخرى ، يعني في بيئة متدينة يمكن العين صعبة شوي لأنهم يذكرون الله دايم! ، فيه كثير من الأماكن وأنت تعرفها زين وتطلع عليها الشمسسسس دايم >> احمد يا رب تفهمها لا تفضحني 😀

    تلقى العين عندهم منتشرة !

    بالنسبة لي ، أنا أؤمن بالعين .. في ظرف فترة وجيزة اكتشفت ان اثنين من اخواني ولحقتهم اختي مصابين بالسكر! فجأة ، وواحد منهم زايد عنده الكرسترول !! وطبعاً كلهم ما حدث لهم هذا الا بعد ما حققوا أشياء لفتت أنظار الناس لهم ، وما تبيني اشك بأنها عين !

    معليش أبو حميد .. ما حبيتك في هالموضوع 😀

  14. يقول ماسة زيوس:

    مرحباً..
    أحيانا أشعر أن كل من يفشل يحول أمره الى العين والحسد!
    شكرا جزيلا لك (:

  15. يقول احمد المغلوث:

    ما اقول الا تفو تفو ماشا الله عليك .. 🙂

    الله الله بالمعوذات على يمين المدونه .. 🙂 🙂

  16. يقول توليب:

    في البداية جميعنا نتفق على أيماننا بوجود العين والسحر لذكرهما في عدد من الآيات القرانية والأحاديث الشريفة،لكن ما يثير السخرية وأحياناً الشفقة هو رؤيتنا للبعض وقد وصل إلى وضعٍ مزر من شدة خوفه من العين حداً قد يفوق خوفه من الله وينسى(أن الناس لو اجتمعت على أن يضروك بشئ لن يضروك الا بشئ قد كتبه الله لك)فقد اصبح الحسد والعين اسهل عذر عند البعض لتبرير فشله في الدراسة أو تكاسله وتغيبه عن العمل أو اخفاقه في مشروع تجاري أو فشل الزواج،وهكذا نخلق جزء من المجتمع يعاني من الكسل والتخاذل ويعيش عالة على الاخرين نبيجة تخديره لعقله بهذه الحجة الغريبة،هناك من عزل نفسه عن بقية المجتمع خوفاً من العين،اذكر وأنا في المرحلة المتوسطة حضرت إحدى المراقبات لدينا في الفصل ومعها قنينة ماء وطلبت منا جميعاً النفث فيها وبعدها اكتشفنا أن أم احدى الطالبات هي التي طلبت من المديرة ذلك لشكها أن ابنتها التي نزل مستواها الدراسي مصابة بالعين،الغريبة ان المديرة تتجاوب مع هذا الطلب الغريب الم تعلم أن كثير من المراهقين يقل مستواهم الدراسي مع بداية مرحلة المراهقة وتتغير بعض تصرفاته توافقاً مع طبية المرحلة،والأم الم تفكر أن احدى الفتيات الصغيرات تزيد من قوة النفث وهي قد تكون مصابة بمرض معدي فتسبب لابنتها بمصيبة اكبر،اتذكر وأنا صغيرة كنت أتمتع بشعر طويل وكثيف وكانت أمي تعتني به كثيرا فكنت اينما ذهبت تركته متحرراً من قيوده ،في احدى الأيام في الملاهي مسكتني امراة كبيرة في السن سامحها الله اذا كانت موجودة ورحمها الله وغفر لها في حال موتها وقالت لي (لفي شعرك فيه وحده مثل شعرك نظلوها وجو يقومونها الصبح لقوها ميتة ومخدتها دم لأن مخها انفجر)تخيل تأثير هذا الكلام على طفلة في الثامنة من عمرها،لقد اصبت بالكوابيس بعد ذلك ومن شدة الخوف من تأثير هذا الكلام اصبحت اقوم فزعة وانظر لوسادتي ابحث عن الدم ثم اتلمس رأسي وشعري جلست شهور على هذا الحال وانا الح على امي بقص شعري ولدي خوف كبير من أن احكي لها كلام المرأة استمريت على هذا الوضع اسابيع حتى استطعت ان اصارح أمي فتمكنت بحكمتها أن تهون علي من تأثير هذا الكلام وأن توضح لي أن الأذكار التي علمتني اياها ستحفظني وتحفظ اخوتي من كل مكروه،لذا على الأباء والأمهات أن يعودوا أبناءهم على الأذكار اليومية لكن في نفس الوقت يبعدوا عنهم الخوف المدمر الغير مبرر من العين،تحياتي لك أخ أحمد وآسفة على الإطالة

  17. يقول كيفي كويتية:

    العين حق .. ولكن اسقاط الفشل والبحث عن المبررات من الحيل
    النفسية الدفاعية وهذا مصطلح معروف في علم النفس!

    سالفتك ويا الدراسة تهون .. على الاقل انت كنت متفوق!!
    المصيبة لو تقابل ولية أمر بنتها ضعيفة ضعف تراكمي
    في جميع المواد وتقول بنتي فيها عين!!

    هذي بالله شتسوي فيها عشان تشيل هالفكرة من راسها وراس بنتها المصون؟ 😀

  18. انا قبل كنت يوم اتعامل مع انسان يرد كل حادثه تصيرله للعين

    كنت اتعقد واتعب نه واحس بداخلي انه متخلف

    بس الحين وبالذات فالفتره الاخيره

    احس اني صرت مثلهم..مااعرف كيف

    قمت اخاف على عمري من العين فكل شي

    لو طلعت مشوار ما اقول اني رايحه المكان الفلاني

    عشان مايصكوني بعين وما اتهنى بمشواري

    لو شريت شي غالي ما اتكلم..عشان ما يصكوني بعين

    حتى قمت اسال نفسي انا كاني صرت مثلهم بدون ما احس؟

    مادري كيف صار هالشي

    يمكن لاني دايما اسمع اللي حوالي كل ما صار شي لي قالوا عين وعين

    صدق مثل ما سميتها فوبيا!!وانا شكلي وصلني الدور

    قولوا ما شالله بس عن تحسدوني:))

  19. الحين عرفت ليش الشماسية بالتحديد D: بعد ما سألت أخوي , بس مع ذلك ما كان هناك كان بمكان ثاني بس الله العالم العدوى انتقلت للأماكن المجاورة ( الله يكفينا الشر ) 🙂

  20. يقول Fares:

    والله يانت جبت لي الوسواس :@
    ياخوي قبل ما اقرا هالتدوينه ياحلاتي 🙂
    امس بالنادي كنا نسوي تمارين جماعية
    عاد اخوك مبدع والمدرب مافيه الا قوة ترفيع
    انا باللحظة ذي تذكرتك وتذكرت العين قلت بس ياولد ضعنا 😀
    وراح النشاط اللي فيني وماكملت معهم 😦

    ***
    ومن الموقف اللي صار معي امس يمثل حال اغلب الناس
    يعني لي شهرين بالنادي وكل يوم نفس التمارين اسويها لكن الواحد
    تلقاه يسمع ولا يقرا قصة ويبدأ الوساس 🙂
    وقبل اخلص ابيك تساعدني بجمع غسال اللي كانوا معي امس 😛

  21. يقول kimora:

    عزيزي أحمد ..

    حلوه عزيزي .. انا من فتره و أنا متابعه أيش بتكتب بس هذي المره قلت لازم ارد عيب تقري كل مره و ما تردي ..

    المهم بالنسبه لموضوعك .. على قولت الأخ إلى فوق .. تف تف ما شاء الله .. و عين الحسود فيها صاروخ مو بس عود …

    خليني أقولك على ناس اعرفهم .. مو قرايبنا بس لنا علاقات معاهم .. المهم هذولي الناس أي شي في حياتهم و كل شي يحصل لهم مرده لثلاث أشياء .. العين و الجن و السحر ..

    تنحصر كل تحليلاتهم و كل تفكيرهم في هذي الأشياء ..أحس بصعوبه و معاناة في الكلام معهم .. لا يمكن أجراء أي حديث منطقي يعتمد على ثوابت و حقائق علميه .. و فعلاً توجد تجاره جداً رائجه للناس الى يستغلونهم

    انا فعلاً أؤمن بالعين و السحر و الحسد .. بس مو كل ما واحد قال أنا ما قدرت أعطس اليوم قالو له احد اعطاك عين في خشمك إلى اكبر منك ..

    وين التحصين وين التوكل على الله وين الأخذ بالأسباب … و احس ان كل ما لهم الناس إلى من النوع هذا يزدادون ..

    على العموم مشكور موضوع مرررررررره حلو ..

  22. @ توتو : كويس قلت ماشاء الله عليك لأنه لو جاني شي بقول صكيتني بعين

    @ princejimi : ماشاء الله تبارك الله عليك ، مداخله أحييك عليها .. أشكر تواصلك وأحيي فكرك الرائع

    @ صاحب القلم : طيب معليش .. نقول صابهم عين ماجاهم إلا سكر بس ؟ .. يعني عين خفيفة هذي ولا يا صاحب القلم ( بالمناسبة يوزرك يجبرني اني اكتب بالصفحى وانا ودي اخلي الرد بالعامية )
    أنا ماحبيتك بعد .. وعشا رمضان رجع لي الدراهم حقت البوفيه المفتوح .. والكوفي بعد رجعه .. وخلاص ( كش عليك) – أصابع اليدين العشر كلها متجهه لوجهك –

    @ ماسة زيوس : وهذا أمر ملموس بلاشك ، أيام الجامعة كان أكثر من يحاول الذهاب للقصيم لقصد الشيخ طلاب (داجين) فقط كانوا يتأملون بأنهم مصابين بالعين

    @ أحمد المغلوث : ههههههههههه هذا نظااااااااامك ، امتلت مدونتي سعابيل حسبي الله عليكم

    @ توليب : للمرة الثانية أجد حرجا في الرد عليك ، ماشاء الله ردودك تدوينات متكاملة وأنصحك دام عندك هالميول تلجأ ( أو تلجأين) لفتح مدونة ..
    أحيي ردك والإضافة التي قدمتها

    @ كيفي كويتية : هذي طال عمرك تطلعين انتي وياها برج الكويت وترمينهم من المطعم اللي فوق .. خلاص هالفئات والله دمرووونا من جد

    @ أقصوصة : اكيد ان الجو المحيط بك أثر عليك ، والشخص ماينلام لما يكون كل المحيطين فيه مصابين بالفوبيا .. مشكلة كبيرة

    @ light : آآها بس لا يجينا أحد من طرف أخوي (أبويزيد ) – المعلقين في هذه المدونة يعبرون فقط عن وجهة نظرهم وليس بالضرورة أن يمثلوا وجهة نظر المدون – <<< تصريف

    @ Fares : أفااااا هذا نظامك ، وش غساله بالله فكنا ياشيخ هههههههههه

    @ kimora : حياك الله وسعيد بمشاركتك للمرة الأولى
    ماقلنا بس تفتفه .. امتلت الشاشة حقت المدونة .. ما اتفقنا على هيك نظام
    انا ملاحظ انها هالاشياء – جن وسحر وعين – ( وانا للمرة المليون ما أنفي وجودهم) – بس اقول انا الاحظ انها تنتشر كثير في الوسط اللي يغيب عنه الوعي الفكري والثقافي ، يعني كل ماارتقى المجتمع درجة قل عنه هالشي والعكس بالعكس ، لذلك نشوف العجوز الأمية اللي يالله تمشي لو تطيح قالت بس بنات الفلاني تقهويت عندهم قبل امس وعطوني عين لاني نشيطة وزينة ..

  23. انا لي 12 يوم تقريباً ماكتبت شي جديد ولا لي نفس أكتب..
    فكرك عين يا أحمد? 😛

  24. @ asma : والله اذا ماجاك رسايل تبدا بـ ( تفووو عليك ) .. فأنت سالمة للحين 😀

  25. ^
    ^
    ههههههههههههههههههههههههههه

    أحمد يا لئييييييييم محد بيخاف عليك ثانية ( كش بيد وحده ووجه مدلع لسانه)

    أولاً أنت اعترفت بالعين ، سواءً خفيفة والا مو خفيفة هذي قضية ثانية

    زي لما تجيب مثلاً كماتشو وهو يشوت فاول هل نفس قوة ربيرتو كارلوس ؟!

    مع ان المعلق يقول لثنيناتهم تسدييييييييييده

    فالحمد لله أن أظهر الحق على لسانك

  26. لا لا احمد ما كنت ادرس بالشماسية كنت ادرس بجامعة القصيم 🙂 اللي بالطرف الشمالي من مدينة بريدة

    آآآآآخ بس اشوى انه عدت على خير 😦

  27. يقول V.I.P:

    ياشيــخ النــاس مــو عـــايشيـــن عيشـــه هنيـــة يحــــرمـــون نفسهــــم خــوفا مــن العــين

    الـعــين حــق صــح مــحد قال غير هالــكــلام

    بس مــو نــعــيّش أنــفــسنــا بجحيــم عــشــان مــاتــصيبنــا عــين

    أحمــد الله يـعـطــيك العــافيــه ولا يــحــرمنــا مــن مــدونــاتك الرائــعـه

  28. الحسد موجودفى القران وبعض الناس يحسدون الغير على ما اتاهم اللة من فضلة.وايات الحسد فى القران تبطلة

التعليقات مغلقة.