متى ينتهي عصر ( الملاقيف )

المكان : مطعم صب واي شارع العليا بالرياض
الزمان : مساء الاثنين الماضي ..
الحدث : كنت واقفاً – في أمان الله – في صف الزبائن انتظر دوري للطلب ، كان أمامي نحو 7 أشخاص مما يعني المزيد من التأخر في الوقت ، فتحت جهازي الجوال للبحث عن الرسائل غير الهامة في صندوق الوارد ومسحها من باب تضييع الوقت ، فجأة التفت الذي أمامي وأخذ يتأمل وجهي بطريقة غريبة ، تجاهلته ولم أرفع طرف عيني لرؤية وجهه ..
الملقوف : السلام عليكم .. انت من عيال ( الفلاني ) ؟ – جازت لي عيال ! –
أنا : إيه
الملقوف : ماشاء الله .. انتم اللي ساكنين في حي النخيل .. أخوك علان ؟
أنا : إيه !
الملقوف : ايه اذكره كان يجي عند أخوي لما كانوا يدرسون سوا في الثانوي ( للمعلومية أخي تخرج من الثانوي عام 1995 ! ) .. ياخي تشبه له مررة !
أنا : أنت أول شخص يقول بأني أشبه أخي .. دائما مايردد الناس ( أنت لا تشبه أخاك )
هو : أنت أكبر أو هو أكبر ؟
أنا : هو أكبر مني بعامين
هو ( وهو يتقدم في الدور قبل الطلب ) : انت الحين موظف ولا … ؟ ( حسيت انه بيقول ولا عاطل )
أنا : موظف ( كنت أعتقد بأني سيكتفي )
هو : وين ماشاء الله ؟
أنا : عامل في مؤسسة ….
هو : وعسى رواتبهم زينة ؟
أنا : الحمد لله
هو : عساك متزوج ؟
أنا : لا والله .. ( كنت بقول له نظرية أني أدور وحدة تاخذ قرض من البنك وتخطبني .. بس مابغيت أعطيه وجه )
هو : أبرك لك 😀
أنا : ابتسامة صفرررررراء !
هو : الا على طاري .. يقرب لكم سليمان الفلاني اللي بوزارة الخارجية ( لاحظوا كل ذلك دون أن يعرفني باسمه )
أنا : لا والله مايقرب لنا ( أخشى أن أقول نعم .. وذلك يدعوه ذلك لمزيد من الأسئلة )
هو : ياخي اللي اخوه في مؤسسة النقد واخوه الثاني طيار ؟ ( ما ادري يعني لما يقول كذا بيطلع يقرب لي ) !!
أنا : للأسف ما اذكر !
هو : تراهم من ثادق .. أكيد من الجماعة
أنا : تقدم في الدور عشان الطلب ( أبي أصرف الموضوع وابيه يتقدم في السرا ) .. الفلاني حقين ثادق واجد .. وياكثرهم وياقل بركتهم 🙂
هو : أفااااااا أجل ماعنك ولاء ( بدا يضحك بصوت عالي والعالم وراه يتلفتون )
أنا : لا للعائلة ولا القبيلة .. الزم ماعلي عماني وخوالي .. البعاد يالله اشوفهم يوم العيد ويالله بعد ( حسيت اني بديت اعطيه وجه وندمت بصراحة )
هو : على فكرة .. ياخي عندكم واحد في المؤسسة تراه من جماعتنا .. اسمه سليمان بن … !
أنا : المؤسسة فيها 5 طوابق .. بالكاد أعرف من يعمل في الطابق الذي أعمل فيه
هو : عموما هو له علاقة بالإدارة المالية .. ان شفته سلم لي عليه تكفى ( حطوا في بالكم اني مدري وش اسمه ! )
أنا : يبلغ
هو : الحين هالمطعم ليه مايكبرونه ويخلونه مباني مثل كنتاكي وهارديز .. تصدق والله بيجونه عالم
أنا ( بدأت في الادعاء بتلقي مكالمة ) : ما ادري .. لحظة شوي .. أيوه الوووووووووه .. وين برا ؟؟ .. طالع لك الحين ، يله اخوي عن اذنك ( لاعت جبدي على قولة الكويتيين )
هو : تبي أطلب لك 😀 ( يا والله من البثارة بعد )
أنا : لا لا .. بيجي صديق لي الحين وبنتعشى مع بعض ..
هو : سلم لي على اخوك وتعالوا ياخي سيروا ترانا عقب العصر فاضين ( شكله مدرس 🙂 .. ولاحظوا اني ما ادري منهو 🙂 )
أنا : خلاص .. مبدئيا نقول عصر الأربعاء ( وانا خارج باتجاه الباب ) ..
هو : ترى بخلي سليمان زميلك في المؤسسة يجي عشان اعرفك عليه ( يحلفون انه مهبول مثله )

خرجت من الباب وانا ابحث عن استنشاق هواء نقي .. تأملت الإزدحام في شارع العليا وجائتني رغبة في الوقوف وسط الشارع .. رغبة جامحة في الانتحار !!

هؤلاء ألم ينقرضوا بعد ؟

60 فكرة على ”متى ينتهي عصر ( الملاقيف )

  1. لم ،، ولن ،،
    فارَ دمي من مجرد قراءة وتخيل موقفك ،، فكيف لو حصل لي عياناً ؟
    عني أنا ،، سـ(ـأسحب) عليه ،، أو سأهرب من أول الموضوع 🙂 ،،

    عذراً على الإطالة ،، و ( صباح الخير 😀 ) ،،

  2. يقول مها:

    وش دعوى ياكافي >>> انتحار .. صح شي يرفع الضغط بس مايوصل للأنتحار

  3. يقول رموف الناصر:

    اشكرك على القصه والله ررروعه قعدت اضحك وانا اقراء ما اقول غير ياطول بالك على الملقوف زين ما انتحرت

  4. يقول يزيد:

    حطووووا كوووولووا شي ؟؟؟ 😀

    هذي سالفتها ولا غير

    هههههههههههههههههههههههههههه

    الملاقيف واجد اخوي ابو احمد

    لازم تبرمج نفسك على هالنظام

    المجتمع أغلبه ملاقيف

    وش السواة !!!

    طاعوووون .. يقول الفرق بيني وبين ابو ناصر شهر … هو في مايو وأنا في جووون ههههههههههههه

  5. يقول انجل:

    مساء الخير…اخ احمد يعني واااحد طفشان يبي يسولف وشافك انت بعد طفشان حب يسليك غلطاااان…اناأشوف انه من باب البسليه بدال ماني قاعده طفشانه اتعرف واتسلى..بس لاتحسبوني كذا..أكبر دليل ألحين ماتلقفت ولاعلقت ع أحد…احمد تقبل مروري..

  6. يقول nadyah:

    والله من الملاغه من جدارتفع ضغطي
    شكرااااا لك يا احمد على المواضيع الحلووووه

  7. عبدالمجيد :
    أي إطالة .. ترى كلها سطرين 😀

    أنا سحبت عليه بس كنت حاط عيني على صحن سلطة ولا كلوب ساندويش

    مها :
    هو مايوصل انتحار اكيد .. بس هذا من منظور المبالغة يعني

    حكايتي والزمن :
    ماراح .. ولم .. ولن على قولة عبدالمجيد

    رموف الناصر :
    العفو .. ومافيه طولة بال لأني حطيت رجلي

    يزيد :
    اييييييييييه هههههههههه هذا هو ماشاء الله عليك وش دراك انه هو 😀
    كل شي .. حط كوووول شي .. حط كوووووووولووو شي ( احس انه يضيف الواو ويكررها من منظور التكثير يعني لو قال كل شي مالها طعم بس كووووووول شي تحس انه يعني لازم تحط كووول شي ههههههه )

    ابو ناصر ماكان في يومه الخميس اللي راح ولا كان ترى بيجلس يحسب مع سلمان من جد
    طااعوووون 😀

    انجل :
    لا ماكنت طفشان ابد 🙂 .. يمكن اتقبل هالشي في صالة انتظار بمطار والرحلة باقي عليها ساعتين مثلا .. لكن في مطعم وكلها 5 دقايق
    طيب نتقبل انه يتكلم بس عاد كم عمرك ومتزوج ولا لا ووين تشتغل .. ماخلى شي للتحقيق

  8. 😀
    لا أعتقد لديهم نيه للانقراض
    ولو علمت عن المجتمع النسائي هي أكثر وأكثر

    صدق من قال (من حسن إسلام المء تركه مالايعنيه)

  9. يقول سليمان:

    احمد

    انا ماني متعجب من بثارته ولقافته بكثر مانا متعجب منك
    اضاهر انك مسجل المحادثه
    ولا عشانك صحفي ههه

    ماشاءالله
    سلام

  10. ههههههه
    كان قلت له مضيع مفتاحك بوجهي؟
    على فكرة! الاشكال هذي لازم ترد عليها بالمثل و الا يستمرون بالعادة هذي و يأذون ناس اكثر.. 🙂

  11. يقول سلطانة:

    لوووووووووووووووووووووووووووووووووووووووووووووووووووووووووووووووووووووول

    هم في تكاثر الله يهديييك

    تصيير دايم خصوصا في بنووك

    والله شكلتس موب غريب عليي وش يقالكم؟؟

    وهي نصابة مشتهية تسولف

    والا في المشاغل تلتفت

    وش جاية تسوين؟؟ تسريحة والا استشوار

    ودي اقوول وانتي وش فرقت معااك؟؟ قولي بسولف ماعندي مانع اطق حنك مععااك 😀

    ماادررريي متى في غرف هالانتظااار القى الناس معها كتااب تقراه منه تفك الناس من شرها ومنها تريح ملائكتهاا

  12. تدري ياحمد ان من افضل الاوقات اللي اقضيها على النت وانا اقرالك تشتكي من شي 🙂

  13. asmaaa :
    والله عاد الحريم اكيد الامور اشد .. بس عاد ماعندي اطلاع 🙂

    سليمان :
    لا .. مثل هالمواقف ترسخ في الذهن ، وعلى الامور فيه امور ثانية صارت نسيت اذكرها 🙂 ..

    frozen tears :
    هههههه لا تراني مؤدب ما اقول كذا ابد 😀

    سلطانة :

    لا ترى فيه فرق .. أحيانا تصير فيه سواليف عامة يمكن الواحد يهضمها وياخذ ويعطي فيها من باب تقطيع الوقت
    بس ماتوصل للخصوصيات .. يعني ماتجي واحد يقول للثاني كم عمرك .. وين تشتغل .. ماتنهضم ابد

    abOd :
    اييييييييييييه .. اجل يامالك من سعة الصدر 🙂

  14. خخخخخخخخخخخخ

    ودي اروح امطخ خشم هاللي خلاك تعصب وتبين انك انسان مثلنا تنظغط وتتنرفز هع هع هع هع

    تراي ارد عليك من المطار الحين .. انا اشهد انك طووووووورتنا في كوووووووووووولش خخخخخخخ!!!!

    ورى ما تدخل المسنجر هالحين تراي فاضي وباقي على الرحلة ازود من ساعة !!!!!

    الا صدز .. وش اسمه هو ؟ ” ملقوف آخر ” !!

    الله يونسك .. طاقتني الغلقة قبل الرحلة .. وتسني سليت شوي عقب موضوعك !!

    سلام

  15. أبو ناصر :
    وش دعوى .. وش قالوا لك يعني مالي أحاسيس ومشاعير ( على قولة اللمبي 🙂 : )

    كويس استفدت من الوايرلس حق المطار .. يفك ازمة بصراحة بس حاول تشحن الجهاز قبل لا تطير عشان يمدي تشغله في الطيارة

    الماسنجر الحين انا في المكتب ولا عندي ماسنجر بصراحة 😦

    هههههههههههههههه حسبي الله عليك اجل تبي تعرف اسمه .. كانك حريص اسأل أخوي

    بالسلامة يبو .. أول ماتوصل ارسل ايميل ولا دق ولا ارسل رسالة مع ساعي البريد 🙂 .. والله الله بالصور ..

    ما اقولك الا ( خودي هافييز ) ..
    << مدري تنقال كذا ولا لا

    عقبال مانشوفك في رمضان وانت نازل الف كيلو زي الروحة الاولى

    يزيد :
    هههههههههههههه التحفيز جزء من رسالتي في المجتمع 😀 وان شاء الله حمود السنة الجاية في الطب ولا الحاسب .. راح اكون سعيد جدا لأن ( تحفيزي) ماراح هدر

  16. هههههههههههه ..
    طيب سؤال .. ليش ما سألته عن اسمه ؟؟

    في يوم من ايام العمل البهيج في ” بنكي ” العزيز .. كنت توني جديده في الفرع يمكن ثاني يوم .. الفرع جديد علي والشغل جديد ( يعني فترة تدريب ) .. وغير كذا اختك في الله كانت نفسيتها في الحضيض لأنهم ناقليني غصبـ(ـن) عني , وأول مره تقابل عملاء بشكل مباشر , وفوق هذا كله تستحي وما تعرف تصرّف !!
    المهم .. طووول الوقت والموظفة تشتغل وانا اتابعها بس , لحد ما جت عميلة وقالت لي اللي تدربني شرايك تمسكينها ؟ قلت يلا 🙂 .. ويا لتيني ما قلتها !!
    بديت مع العميلة توني ما امداني ابدأ اشتغل لها إلا ” تقز ” اسمي .. وتبدأ الأسئلة وسؤال وراء سؤال .. سؤال ورا سؤال .. وتجي عميلة بعدها وتنتظر المخلوقة تخلص .. والمخلوقة مو راضيه تخلص !!! .. ظنك وش صاااار ؟؟؟
    عصبت العميلة اللي وراها وبدأت بالتحلطم .. وانا والله مو معطيه الأولى وجه بس هي مصره تطلّع انا مين !!!!! آآآآخر شي انقذت زميلتي الموقف وقالت لي ارجعي شوي شوي على وراء وخليني اخلصها ( عشان تبطل اسئلة ) .. وأخيراً تقلعت ” الملقوفه ” ..
    ولكن القصه لم تنتهي بعد .. المتحلطمه راحت تشتكيني عن مديرتي هههههههههههه .. تقول ان بنت ” الفلاني ” ( على فكره مو نفس عايلتكم 😛 ) طاقه حنك مع العميلات ومعطله الشغل 😐 !!! حراااااااااااام والله إني مسكينه هههههههههه بس مديرتي كانت عارفتني وتدري باللي وراي ( وكانت تلك المره الوحيده اللي تشتكيني فيها عميله .. وياحظي العاثر ) !!!

    مالي وجه أقول ( اعتذر على الإطاله ) بعد رد عبدالمجيد 😀 !

  17. أولاً … الواضح انك خربت الريجيم
    ثانياً … الله يساعدك ما أدري و شلون تحملته وَ أنا أقرا الموضوع ما تحملت ؟
    ثالثاً … ” الفلاني حقين ثادق واجد .. وياكثرهم وياقل بركتهم ” … ليه ؟ .. حرام 😦
    رابعاً … على فكرة ترى المجتمع النسائي يفوق المجتمع الذكوري في اللقافة ..
    الله يرحم حالنا و حالكم

    دمت سالماً

  18. صح نسيت أقول … ان اصعب شئ أنك تكون قليل الكلام والأسئلة و اللي قدامك شخص مهذار ويحب الأسئلة وَ أنت ( يا خلاف ) تعطيه اللي بجعبتك كله ,, و اكون انا ما طلعت منه و لا حتى بزبده عدله مثل العالم و الناس

  19. هههههههههههههههه والله ياأحمد أني تصورت نفسي في مكانك ,, أرتفع ضغطي ,,
    لاأعتقد أنه تقرض أذا اعطيناهم وجه فقط كان من الاولي أن يعرف بإسمه على الاقل

    الا على فكرة ياأحمد : أنت الى الان معك سيارتك القديمة ههههههههههههههههههههه؟ مابقى الا هالسؤال يسئلك

  20. يقول TMT:

    احمد عُمت مساءً ههههههههه

    ياكثرهم هالملاقيف

    وخصوصا حقين وين تشتغل وكم راتبك ؟ ههههههههه
    بس انا في مثل هالمواقف والاسئله ماجامل ابدا واحاول انهي اي حديث مع شخص احس انه بيبثرني

    فنصيحة لك اذا مرة ثانيه قالك انت من عيال الفلاني قل لا ههههه حتى لو انه يعرفك

  21. يقول كوكه:

    عادي انا اسوي شيء شبيه احيانا خاصة بالانتظار أسال البنت عن المواد اللي درستها لما نكون بالجامعة حتى لو ماأعرفها بس عن العائلة وهالاشياء مستحيل اسأل
    لكن مااحب اجلس ساكته ! ملل لازم اتكلم عن الطقس عن الزحمة أي شيء ياحبيل المصاريا بس من يشوفك يدخل معك على طول يعرفك او لا تحس بألفه معهم ياخي
    استاحش لو اقعد مكان فيه انتظار وانا ساكته واللي معي ساكته أحس اننا اعداء خخخخخ

    بس عاد هاللي طحت فيه بثر حبتين اكره شيء بالدنيا وحدة تسألني وش يقالكم تعرفين فلانة وعلانة طيب وش بتستفيد
    لكن لو تسأل عن دراستي او الزحمة او المطعم او طلعاتي مرة عادي فضفضة

    على طاري اللقافة
    بايام المدرسة ماكنت أشرب عصير تحام كبدي من المعلب احسه مويه وسكر يااشرب طبيعي يامافيش المهم وتراقبني ملقوفة تدري
    مسكتي مرة وقالت جعلك في الجنة بسألك فيك سكر ؟؟

    ههههههههههههههههههههههههههههههههههههههههههههههههههههههههههه
    على السنين اللي مرت الى الآن اضحك على هالسالفة
    الا ماشاء الله حافظ المحادثة !

  22. .
    .
    .
    أحمد … إذا مثل هذه النوعيات واجهتني وكنت في ذلك الوقت قمة في الروقان
    أرد الصاع صاعين

    لأن هذا أصلاً … لا يملك خاصية الإحساس من ردة فعل الآخر ..

    ( شكلها فلسفة ) 🙂

  23. nOuf.a.s :
    أخاف اسأله ويصير صديقي 🙂 .. لا من جد اخاف اسأله ويفتح باب حوار ثاني

    عوما الحريم وضعهم يختلف ، تحصلينها تدور زوجة لولدها .. والولد يبي موظفة بنك ( فلووسها أد كده أهووه )

    مالك حق رد عبدالمجيد اطول منك

    ayaneeq :
    لبش ؟ .. يعني هالرجال لباش ؟
    تنقال كذا صح 🙂 ؟

    light :
    أولاً : ايه .. ماقدرت
    ثانيا : ماتحملته والدليل اني طلعت 🙂
    ثالثا : والله كلمة عابرة مالها سبب يعني ، إلا وش زينهم يهبلون م
    رابعا : هذي خالصين منها :):)

    وانا ماني قليل كلام بالعكس .. بربارة 🙂 .. بس مو في الخصوصيات مثل كذا

    ابراهيم :
    تبي تسوي مثله ولا شلون 🙂 .. موتري خلقه قديم موديل 2001

    TMT :
    تدري .. ياليتني قلت لأ وافتكيت ، بس برضه مهيب كويسة يمكن يصير واحد يعرفك ولا شي .. شينة تجحد 🙂

    جوري :
    الحين حشيت الرجال وقطعت فيها واخرتها حب مثالية 🙂 ؟؟
    اجل لو اني مادحه وش بيصير

    كوكه :
    انا ما ارفض التداخل مع الاشخاص بالعكس شي كويس وايجابي ، انا اقصد التدخل في الخصوصيات والزواج والعمر وهالامور ، هذي لقافة اسمها مهيب سوالفة

    المحادثة ماحفظتها بس هذا اللي قدرت عليه وفيه نقاط نسيتها مثل ( كووولش 🙂 ) .. بس ذكرني يزيد بها

    سلطان :
    والله ودك اقلب الطاولة عليه بس والله مانيب عارف اجيبها صح

  24. طيب احمد ربك وبوس يدك وجه وقفا كمان!
    انت اهون مني بكتييييييييييييير
    انا يسألوني في كل مكان:
    انت لوكال? are you local?
    طيب أمك ماليزية وأبوك سعودي والا العكس?!
    ولو قلت لهم لا كلهم ماليزيين يسألوني:
    طيب من فين? من أية ولاية?
    هم فين دحين هنا والا السعودية?!
    تفهمي ماليزي?!!!!
    واكره سؤال وأبغض سؤال يحسسني إني جالسة على راس اللي يسألني:
    طيب ليـــــــــــش رجعتي هنا?!!
    متزوجة?
    عندك اولاد?
    لو قلت ايوة.. يكون الرد: ماشاء الله مو باين! اش مسوية?
    وقتها أقول لاحول ولا قوة إلا بالله وأخرج من المكان اللي جالسة فيه :$

  25. غريبة انكم تتضايقون من هذي الأشياء @_@

    عادي .. شخص وشبه عليك ومن زمان ماشافك وحب يسولف معاك ويعرف أخبارك .. فيها شي ؟

    مجتمعنا الإسلامي أحلى بكثير من مجتمع الاجانب في صفة التواد والتراحم
    هم اهناك لو يجي بمكان ولقى واحد على كرسي.. بيختار ابعد كرسي من هالشخص عشان يقعد .. مافي بينهم ألفة
    لكن عندنا الناس اجتماعيين ليش تسمونها لقافة .. وأسئلته ماتدل انها لقافه أبداً .. مثلا: هو قال عسى راتبك زين ========== وماقال كم راتبك ..؟ صح

  26. asma :
    حلوة مو باين 😀

    حلوة انتي لوكال .. جازت لي 😀 بقولها لعزيز الخميس الجاي

    يمكن عاد الحريم عندكم سالفة ثانية ومايتحاج فيها تفصيل هذي

    ملامح :
    والله الرجال لو كان يعرفني ولا درس معي ممكن نهضمها نقول يعني يسأل عن الحال والأحوال
    بس واحد ما اعرفه ولا يعرفني .. خش في عيني يعني هنا اسميها لقافة

    بعدين السواليف العابرة في الانتظار شي كويس وايجابي ، وعادة في صب واي ان صار الصف طويل يصير فيه سواليف وخاصة عن الأحداث اللي تطلع في التلفزيون أو عن المباريات .. والناس رايقة جدا

    لكن اللي ما احبه ان واحد مايعرفك ولا تعرف حتى اسمه الاول يسأل عن خصوصياتك مثل العمر والزواج والشغل وياليتها باسلوب كويس وهادي .. كان رافع صوته واتذكر اللي وراه كانوا يتلفتون علينا كل شوي 🙂 احرجني بصراحة

  27. فعلاً، سالفة التعريف بالشخصية قبل بداية الحديث مهمة جداً، والبعض يغفل عنها للأسف.
    لعل الأخ الكريم بغى [ يطيّح الميانة ] معاك، وهاذي كلمة كويتية ضيفها إلى قاموسك. 🙂
    ولكن أنت الله يسامحك ما عطيته ويْ!

    أظن لو صارحته بأنك منزعج من حديثه وكثرة أسئلته، أفضل من إنك تدخل المدونة بعد ذلك وتشكي لنا الحال في اللي صار وسالفة التفكير بالإنتحار!!

    أحمد الله يعينك وين ما رحت وحلّيت، ويبعد عنّك [ النماين ] اللي تكرهها، وأيضاً كلمة كويتية أخرى ضيفها إلى قاموسك. 🙂

  28. يقول رائد:

    ياكثرهم (الظاهر ان فيه محمية خاصه بهم مثل محمية الحياة الفطرية علشان ما ينقرضون)

    عندي محل وياكثر اللي يجون ويقول انت ولد الفلان اجحد واقول اني يمني بس مولود في السعودية اخاف اقوله ايه ويقول اخصم لي بعضهم يصر تصدق بعضهم يسأل العمال في المحل .

    مره جاء واحد وقلت له اني منيب سعودي عقبها دق علي اخوي قال اشفيك جحدت الرجال صار مشبهني على اخوي ويعرف اخوي صدق بس والله بعضهم رهيب اذا درا انك سعودي والا معرفه يشتري ولايكاسر ولا يتقضى الامنك.

  29. صادق .. استفزاز ..
    واللي يقهر أنه غير مقصود من صاحبه 🙂 .
    الله يعيننا .

  30. turki Al-fassam :
    هلا بك تركي .. حنا برضه نقول ( يطيح الميانة ) .. بس عاد النماين وش هي ؟
    النميمة يعني ؟

    بعدين الانتحار تعبير مجازي لا اكثر ولا اقل .. مابعد انهبلت ياتركي 😀

    رائد :
    تذكرت حقين الاتصالات و 905 ، دائما يردون ويقول ( محمد ناصر مرحبا ) .. مرة صرت ملقوف 🙂 .. وقل ليه ماتذكرون اسماء العائلة .. ممنوع عليكم ؟
    رد علي وقال ياخي العالم ماتخلي أحد ولو اقول محمد ناصر الفلاني انواع السواليف .. وش يقرب لك اللي في الخطوط .. وانتم حقين سدير ولا القويعية .. من اخوالكم 😀

    غير معروف :
    لا والله مهوب احسن ، خصوصا لما اقولك ان متوسط عدد الرسائل اللي توصلني في اليوم تتجاوز 180 رسالة وفيها بسبب العمل 🙂 يعني اخذ هم الفرز :):)

    reem :
    كويس فيه احد أيدني 🙂

  31. أحمد، اشدعوة! ما خبرت إنك ياباني حتى أعتقد إنك فعلاً فكّرت بالانتحار!
    حتى اليابانيين بدوا يعقلون..

    بالنسبة للكلمة..

    النماين يعني الخلايق، والأشكال..

    وكذلك نقول: غير [ نمونه ] يعني ماله مثيل أو ماحصلش على قولة المصريين.
    يعني مثلاً: ” شفت جيب اللكسز اليديد؟ غير نمونة! بس النماين طيّحت هيبته ” هههه.

    عموماً الله يوسّع صدرك مثل ما وسّعت صدورنا. 🙂

  32. السلام عليكم

    من جد سالفة غريبة كأنه جاي يخطب >>> مادري حسيت كذا

    أكره الناس الي تحقق بلا بمعنى عنك صدقني وارء سالفة التحقيقات شي ثاني

    لا تنتحر علشانه

    المهم

    أرجوا أن تزور بمدونتي وتبدي برأيك بموضوعاتها قريباً سأضع المزيد من الكتابات

  33. ما راح يخلصون أبد !

    لو تشوف بعض الحريم المقاريد اول مره تشوفك و الود ودها خلال ربع ساعه تاخذ قصة حياتك !

    لكن انواع السفطيشن اجاوب سؤال و عشره هاه ما ادري

    و أكثر سؤال يتردد على مسمعي تعرفون ——- أختصر الجواب و أقول لهم ما أعرف إلا اعمامي و خوالي و كثر خيري بعد

  34. turki al-faasam :
    يعني لو جدة عندكم كان قلتوا جدة غير نمونة 🙂 كذا مضبوط ؟

    سجينة الأحزان :
    حياك الله وهلا وسهلا فيك .. زرت مدونتك ومدونة جميلة حقيقة واسلوب الكتابة فيها مميز .. بالتوفيق ان شاء الله

    afnan :
    كويس مفردة (السفطيشن) ذي .. بس المشكلة حتى كلمة ما ادري عندهم ماراح تجيب نتيجة .. وراك وراك

  35. تشكر أخي أحمد على الزيارة وأسعدني تواجدك طبعاً هناك المزيد مازلت أكتب وأعدل بكتباتي بعدها سيتم النشر

    مدونتك أعجبتني وتعرفت عليها من خلال دليل المدونات أسلوبها مميز وخارجة عن المألوف

    وبالتوفيق

  36. يقول توتو:

    مساءالخير ..مع اني بكون التعليق رقم43 الا اني لازم اعلق واقولك حرام عليك مايسوى على هالرجال سولف معك شوي يعني لو انت كنت متضايق منه لهدرجه كان اولى تسأله عن اسمه بكل حبابه وتكمل طابورك وتطلب عشاك واسم انه ضيعت(الويتنج تايم)عادي عااااااادي جدا وسع صدرك وياما ح تشوف هالعالم

  37. المشكلة اللي بيسألوا مو حريم بس يا أحمد حتى الرجال!! طبعاً مع فروقات في الأسئلة
    اتذكر مرة كمان وحدة سألتني فين تشتغلي? وكم رواتبهم?! >>> يعني نفس حالتك!

    ههههههههههههههههه والأدهى والأمر من كدا لما أروح أفتح حسابات في البنوك يقولوا لي هات الجواز خخخ على بالهم أجنبية ولما أطلع البطاقة الشخصية عاد تهل الأسئلة! واللي يقول لي والله حسبتك تايلندية وتاني يقول عندي اندونيسية ورابع فلبينية!! مدري هو أنا ما أمت للماليزيين بصلة والا ايـــــش?

  38. afnan :
    لأني متاكد انه بيقول .. يابن الحلال اللي كذا وكذا .. تقول مثلا لا والله ما ادري .. بيجي ويقول .. يابن الحلال سليمان اللي لما يناديه أحد بيقول له (أيوه) 😀

    turki Al-Fassam :
    حلو .. يعني جت مضبوط

    سجينة الأحزان :
    يسعدني التواصل ومدونتك أتوقع لها النجاح بإذن الله

    توتو :
    والله يسولف ياهلا ومسهلا فيه .. وياما دقيناها سواليف عادي ، بس ماتوصل للأمور للخصوصية هذا يصير (لقافة) ..

    asma :
    ايه بس مافيها كلام ان الحريم أكثر ولا فيه أي مقارنة 🙂

    احيانا تصير اللقافة عابرة عني مو طبع في الشخص يعني تكون بسبب شي معين أو حدث معين
    مثل حالتك يعني

  39. خخخخخخخخخخخخخخخخ على الرغم اني من عنيزة ومعروفين القصمان انهم ملاقيف بس ماوصلت للبثاارة هاذي !! ==== اجل وش وسمة ؟ === ماش العرق يطلع

  40. سديم : على البركة الثيم الجديد 🙂

    انا مانيب معلق على سالفة القصمان وما القصمان .. وانهم ملاقيف .. مانيب معلق ابد 🙂

    بعدين هي ( وش اسمه ) ، وليست ( وش وسمة ) يقالك الحين صايدتها

  41. ايه ملاحظة اني غلطت بالكلمة يوم ارسلت واقرا مرة ثانية وحطيت الواو بدل الألف كان ودي اصحح بس قلت ماودي اكثر ردودي === كاتبته بالظلمة

    لا تدقق على ضيوفك الله يهديك 🙂 ….

    الله يبارك فيك في الثيم ماطلع الله يسلمك الا بطلوع الروح عقب مااستقلنا وجلسنا بالبيت وفضينا للقافة قصدي للقراءة …..

    عسااا بس موب البثر قصيمي يافشيلتاه 🙂

  42. ماشاء الله . .
    كنّ الحتسي اليوم زايد 😀

    منين طلعوا هالـ 48 تعليق ماشاء الله،
    بعدين لاتظلم الرجّال، يمكنّه حسّ أنك بثر، وقال بوسع صدره :p

  43. على طاري ملاقيف ..
    واول سؤال : انت من وين ؟ … وش ينقال لكم ؟ ينرفع ابو اقصى كبدي

    عمي كان جالس بمحله : دخل واحد يبي يشتري ، وسال عمي من وين ؟
    قال عمي :هندي 🙂
    هو : انت تعرف عربي مره زين ؟
    عمي : ايه صار لي 30 سنه اشتغل هنا ؟
    هو : ماشاء الله حتى لهجه ضابطها !!
    عمي : مدري عنك ، انت شرايك ما اصلح سعودي !!!!
    استحى على دمه : وخذ اغراضه وضف وجهه 🙂

    وتذكر مره بنت ايام جامعه
    تسال كم اخذتي ؟؟
    قلت : احس انو شيء شخصي ؟!!بس اذا بزيد عمرك ومساله حياة موت اعلمك !!
    هي ضفت وجهها
    وراحت جابت رقمي وراحت تدور اسمي لين لقت درجه
    وجتني وكشره من عندي الى مكانك :
    تراني عرفت كم جبتي ؟!!
    قلت مبروك الدقايق اللي زادها عمرك ..
    وعقبها طاحت من عيني

    اقول كنه هرجي واجد و فضفضت عندك 🙂

    تصبح على خير:)

  44. يقول إيمان:

    ما شاء الله .. ما شاء الله … تبارك الرحمن … 50 رد للآن … ما أعرف إن جان بيزيدون ليما أضيف ردي

    اشحالك أخوي أحمد ؟؟ >> سؤال واحد يكفي … عن أصير ملقوفة شرات الملقوف اللي لاقيته .. 😉
    من زمان ما زرت مدونتك … أيام لما كان في اليوم يكون لك 14 رد أو 15 … و ألحين ما شاء الله 50 و فوق. 😉

    بصراحة .. تبغي الصدق … حالك أهون … انت ياك ملقوف واحد و ما سأل عن اسمك … و ادخل اشوي بخصوصياتك … عيل لو أقولك عن اللي صار لي … شو بتقول

    خمس أشخاص في اسبوع واحد اييون و في نفس المكان و ينادوني باسم .. لا هو قريب من اسمي .. و لا أعرف حتى صاحبته … و لا أزيدك من الشعر بيت … حتى لو أنكر و أقوللهم إني مش الشخص اللي يقصدونه .. يكملون سوالف و يصرون على إني هذاك الشخص … صراحة … رحمت حالها اللي كانوا يقصدونها … كيف تتحملهم ؟؟:D
    بس تبغي الصدق … أستانس على الملاقيف … أقضي وقت … يعني صحيح اتضايقت لما صار لي الموقف … بس يمكن لأني كنت مشغولة … لكن لو كنت فاضية … يمكن كنت كملت سوالف و لا بعد صرت ملقوفة و كملت سوالف على لسان الشخص المقصود … 😀 … يعني أتقمص شخصيتها .. ههههههههههه

    السموحة على الإطالة … بس ترانا من زمان ما زرناك … هذا تعويض 😀

    و السلام عليكم

  45. سديم : ما ادقق .. بس لفتت نظري جملة (العرق يطلع ) قلت اكيد صايده كلمة منا ولا منا

    أبو ريناز : انت تقوله .. مدري وش السالفة 🙂 .. هههههههه بعدين يمكن انك صادق بثر ولقى له بثر مثله 😀

    هاجر :
    عاد فيه ناس يتجاوزون مستوى اللقافة التقليدي وتكبر امور عندهم للحسد والضغينة .. مثل خويتك اللي تقولين .. المسألة مهيب لقافة هذي مصيبة وبلوى .. الشخص اللي يوصل هالمرحلة .. معناته الوضع عنه متأزم

    حياك الله ورد مافيه هرجة واجد .. مهوب صاير مثل أول رد لعبدالمجيد

    إيمان :
    هلا بك اخت ايمان ( وشحالك 🙂 🙂 انتي …
    ايه تطورت منفوحة أول 14 والحين 50 ، انا عارف من لهجتك انك من الامارات بس عاد يبي لك كم سؤال من هنا ولا من هنا عشان تعرفين منفوحة ..

    هو صحيح الملاقيف احيانا يوسعون الصدر .. هذي مافيها شك .. واحيانا لما اشوف ملقوف ينشب لشخص ثاني قدامي .. أحس بمتعة ولا ودي اتحرك من مكاني .. مرة صارت في صالة انتظار المطار والرحلة باقي عليها أكثر من ساعة ، لين طاح اللي قدامي بواحد ملقوف مشبه عليه .. مابقى يسأله ( وش اسم امك 🙂 )

    summer :
    ههههههه صح ، بس عاد اهم شي ماينشبون لي 🙂

  46. والله ياهي معاناة بعد …
    أكره ما أشوف هالأسلوب ذا …

    اللي أردى من كذا إذا قعد يسأل عن فلان راعي المحل الفلاني هو يقرب لك ؟!
    وإن قلت أيه … قال ياخي لعب علي في السعر !

    وأكره شي اللي مابينك وبينه علاقة قويه في العمل وإذا حصل لك دورة أو موضوع معين , جاء عندك وقعد يسأل أسئلة أبيخ من البايخة …

    اليوم صار لي موقف مع اثنين من المعلمين :
    قال لي يحق لك ترشح وغيرك لا !

    والثاني يعلق على كلام خويه الملقوف :
    ايييييييييه , عشان فلان اللي يقرب له 😦

    الله يعيننا عليهم بس

  47. يقول mjmj:

    ياليل الهم وش يبي ذاا ؟ طيب يوم قال خل اخوك يسير علينا كان قلت له وش اسمك 🙂

    عموماً / فيه صنفين من الناس مااتوقع ينتهي عصرهم

    الحسّـــاد + المـــلاقيف 😦

    الله يكفينا الشر ،،

  48. يقول V.I.P:

    السلام عليكم

    عاد من لقافتي دخلت ( من هو احمد ) خخخخخ

    الملاقيف متواجدون والصراحه مالهم حل

    لا وأبشرك انهم بدوا يتبعون طرق حديثه في الملقفــه .

    الا ماقلت لي ليش للحين ما تزوجت !!!

    هههههههههههههههههه

    اسولف والله

    ياليتني كنت وراك بالدور عشان اضحك عليك وازيدك قهر فوق قهرك هههههههه

    تشطر اخي عالمدونه 🙂

  49. بدر الشايع :
    والله الامثلة واجد يابدر ، وعلى قولتهم يامالك .. لو تفتح باب في الامثلة راح تتعب .. لازم نتكيف معهم

    mjmj :
    لو قلت له وش اسمك بفتح حوار جديد معه .. وبتعرف عليه وبيعطيني رقم جواله .. وش ابي اشغل عمري فيه بعد 🙂

    VIP :
    ههههههه كويس

    لا إلى الحين ماتزوجت .. وأدور 🙂

    على طاري اللي وراي انا التفت والله كنه جالس يضحك على بثارة الملقوف .. لا يكون هو انتاااااااااا 😀

  50. يقول Mahoooy~:

    هههههههههههههههههههههههههههههههههههههههههه والله هذا مزززعج بس الي افكر فيه حراام ماخذت عشاك بسبت هالمقووف … يعني كل هالوقفه ضيعت وقت 😦 😦 😦

    بس يلا تتعلم مره ثانيه تتجنبهم بشكل اسرع .. وصدق في ناس مايحسوون تبين لهم ان ترى مالي خلقك ولا في فااايده (شين وقوي عين ) هههه.. وزي ماقال حكايتي والزمن ماراح ينقرضون..

التعليقات مغلقة.