مدينة النظام والمساواة

ان كنا نفاخر في الوطن العربي بشيء نجحنا فيه بجدارة فلا يبدو إلا أننا سنفاخر بمدينة دبي ، هذه المدينة التي قد تكرهها للانفلات الآسيوي بها لكنك ستحترمها في النهاية وتحترم من سهر على بلوغها هذا المستوى .

في رأيي أن أكثر من يسرق الأنظار في دبي هو تطبيق النظام بكل ماتحمله الكلمة من معنى ، فمنذ خروجك من بوابة المطار ستجد أن التجهيز على أعلى مستوياتها .. لن يطاردك البائسون ذوي الثياب القذرة يرددون عليك ( تاكسي يالطيب ) .. ولن تجد الصبات والحواجز الاسمنتية أمامك ، ستجد مواقف سيارات الأجرة واقفة في انتظام وسط إشراف أمني دقيق ، رغم العدد الهائل الذي يصل مطار دبي في اليوم إلا أنك لن تجد أي ازدحام في الممرات الخارجية ولن تجد سيارات الشرطة تسحب سيارات المخالفين .
عند توجهك الفندق واستعمالك بطاقة الفيزا لن تخرج لك رسائل التعثر وسوء الشبكة ، بل أنك سترتاح كثيرا في مسألة الحسابات لكون جميع نقاط البيع تدعم الفيزا بوجود شبكة اتصال لاتنقطع أو تلغي العملية كما هو الحال في المدن العربية ، وأذكر العام الماضي زرت دبي مع مجموعة من الأصدقاء .. كان أحدهم يتولى شؤون الصرف بعملية سهلة للغاية ، كل الحسابات بالفيزا حتى في محلات الكوفي وتذاكر السينما وحينما نعود للفندق نعلم كم صرفنا من خلال الايصالات .. لم أذكر يوم أنا شهدنا بطئا أو تأخراً في تلك العمليات .
أتحدث عن النظام المروري ؟ .. زيارة دبي وقيادة السيارة فيها متعة بحد ذاتها باستثناء بعض الشوارع المزدحمة وإشكالات التحويلات المتكررة نتيجة بناء (مترو دبي ) ، فيما عدا ذلك فالقيادة سلسة جدا والجميع يسير في انضباط يحكم ذلك نظام مروري صارم ، سترى عشرات المطاعم المزدحمة يمين الشارع لكنك لن تجد السيارات متكدسة أمامها كما في شوارعنا .. ، سيارات المرور هناك لا تستعمل مكبرات الصوت ( اطلع ياراعي الكابرس .. حرك ياراعي اللومينا ) .. هناك رجل المرور يمشي ومعه دفتر مخالفات صغير .. كل سيارة تقف بطريقة غير قانونية يضع المخالفة على الزجاج الأمامي .. لذا الجميع يقف بانتظام ويبتعد بالسيارة مسافة تتجاوز 100 متر بعيدا عن المطعم احتراما للنظام والمرور .
اتحدث عن التنظيم الجغرافي ؟ .. لا عليك .. فحكومة دبي الآن تنقل المشاريع الكبرى إلى مناطق خارجية واسعة بعيدا عن مركز المدينة .. فبنت مدينة الاعلام .. وقرية المعرفة ومدينة الانترنت في مناطق واسعة وبعيدة بعيدا عن تكديسها في مناطق ضيقة وسط المدينة كما هو الحال في مشاريع المدن العربية الأخرى .. كما اطلعت على مشاريع مستقبلية اخرى تنفذ خارج مركز المدينة .
أتحدث عن الرؤية المستقبلية ؟ .. لا أحد ينافس هذه المدينة في النظرة المستقبلية وكيفية إيجاد موارد مالية أخرى .. يكفي أن نطلع على مشروع مترو دبي الجبار لنعرف عن أي مستقبل نتحدث هذا المترو سيحدث نقلة تاريخية للمدينة ويسهل الكثير والكثير من التنقل بشكل أسرع وأفضل وسيساهم كثيرا في تخفيض الازدحام المروري وتخفيض العقارات أيضاً .. من خلال المترو يمكن التنقل من شارع الرقة إلى الامارات مول في مدينة قد لا تزيد عن 10 دقائق .. هذا يعد نقلة تاريخية ، كل ذلك في سنوات لا تتجاوز الخمس فيما يلت جيران دبي ويعجنون في سكك القطارات وترام المدن منذ نحو عشرين عاما دون أن تظهر أي بوادر لذلك
أتحدث عن المساواة ؟ .. تلك قصة ثانية ، فعلى الرغم من تكدس الآسيويين في المدينة وانتشارهم بشكل فضيع إلا أنك ستشعر بكلمة المساواة بشكل لم تشعر فيه من قبل .. ستجد أنك مع الهندي القادم من قريته الصغيرة متساويين في كل شيء .. في الطوابير والمطاعم وصالات السينما .. ، على الطرف الآخر لن تشعر بأن هناك أحداً أعلى منك مستوى .. فحتى لو جاء وزير لأحد المطعم فهو سيجلس حتما بجانبك ، وسبق وأن شاهدت صوراً ومقاطع فيديو لمصورين هواة (وليست تصوير تلفزيوني) توضح الشيخ محمد بن راشد وهو يتمشى في الأسواق مع صديق له دون أي مرافقين أو (هيلمان مبالغ فيه ) .. بل وتظهر اللقطات بأن بقية المتسوقين لم يعرفونه أو يتمعنون في وجهه .. يمشي كما البقية .
المساواة حتى في إشارات المرور ( ابن امه 🙂 ) كما نقول بلهجتنا المحلية يقف متجاوزا خطوط المشاة .. سيارة نقل تقل عمالة تنظيف تقف في الصف الأول بجانب سيارة لمبورغيني .. لا أحد فوق النظام .
أتحدث عن الأريحية التي يحظى بها سكان هذه المدينة ؟ .. في كل صفوف الانتظار التي وقفت بها سواء في المطار أو المطاعم أو السينما .. الكل يرحب ويقدمك على دوره ( تفضل قبلي ) .. رغم عدم وجود أي أشراف أمني على تلك الصفوف .. لكنك لن تجد من يدعي الغباء وعدم المعرفة ليتقدم على الجميع .

دبي نخشى عليها من الحسد .. فحسب !

25 فكرة على ”مدينة النظام والمساواة

  1. يقول دانا:

    حمدلله على السلامة وإن شاء الله كانت رحلة حلوه .
    بالنسبة لدبي مدينة عملاقة كل مرة أزورها أنبهر فيها واللي تغير فيها من آخر زياره . لكن أمل منها بسرعة مافيها روح مدينة من البلاستيك هذا رايي على رغم ازعاج وزحمة الرياض إلا ان الجو فيها غير حتى مسقط رأسي وهي قرية صغيره أحس فيها روح خاصة حقيقة كل مدينة زرتها حسيت لها روح وجو خاص إلا في دبي دايم اسميها مدينة من بلاستيك بس لازلت أحب أروح أزورها .

  2. يقول رائد:

    والله يبو حميد —>(واحد مسوي يمون)
    مليت وانا احتريك تكتب شي عقب ماقريت تدويناتك كلها

    (يلت جيران دبي ويعجنون في سكك القطارات وترام المدن منذ نحو عشرين عاما دون أن تظهر أي بوادر لذلك)

    ولا هوب ظاهر بوادر وسع صدرك هو بس على القطارات والترامات على كل شي خلها على ربك بس.

    الله يعطيك العافيه

  3. دانا :
    الله يسلمك ..
    ماراح تصيرين مثلي .. يمكن خلاص خمس سنوات زرت دبي أكثر من 15 مرة وكل مرة تتغير في عيني أحيانا سلبا واحيانا ايجابا

    المدينة اللي مافيها روح ابد هي الرياض .. اشوى ان فيها استراحات نروح لها ولا كان علوم 🙂

    رائد :
    هههههه انت تقوله
    مأساة 😦

  4. الحمد لله على السلامه …
    أتمنى أنك تكون قضيت وقت ممتع
    بالحديث عن دبي سأذكر لك حادثة … قبل 8 سنين سافرنا لماليزيا عبر طيران الخليج كان ترانزيت لدبي
    أثناء العودة من ماليزيا وَ قبل الوصول الى دبي تغرض ولد أختي لأزمة صحية مفاجئة استدعت أن تكون سيارة اسعاف في انتظاره عند الطيارة .. ماشاء الله مطار دبي ما قصروا نقلوا ولد وَ أبوه وأمه للمستشفى , وَ وفروا لنا غرفة بفندق المطار الين ما يقوم ولد أختي بالسلامة … صراحة موقفهم لا يمكن ننساه ” لو كان بدولة ثانيه كان يموت الميت ما ساعدوه ”
    شئ ثاني … مره سكنه في أبوظبي يوم ورا يوم نروح لدبي … و الله يا أحمد لا تفوتك محطاتهم ” حشى مو محطة مول ” هي فود كورت , هي محل لبيع الكاميرات “وش ساسكو وش خرابيطه ” … لدرجة تقول ياريت يخلص البنزين عشان توقف و تنزل ” من باب المبالغة ” …
    أحمد .. عاملة النظافة موجودة ” الله يكرمك” في دورات المباه المحطات 🙂

    أشياء كثيرة لو راح نقولها ما راح نخلص

    ” المدينة اللي مافيها روح ابد هي الرياض .. اشوى ان فيها استراحات نروح لها ولا كان علوم “…
    على فكرة أحمد ترى يضيق صدري إذا أحد انتقد ” الرياض” … سيحان الله ما أدري ليش 😦

    دمت بود

  5. يقول ابو ناصر:

    دبي اكوس شيء واحسن شيء !!! تراك صجيتنا !!!

    هالحين انت وهالخمة اللي صاجني بكل قرنة وبكل مجلس عن المشاكل اللي بالبلد !! ور ما نشوفكم ولا مرة قد حكيتوا او نوهتوا عن مشروع او فكرة او شخصية يفتخر بها بلدنا ” السعودية ” ؟؟ الظاهراغلب الشعب السعودي من تالي صايرن ينطبق عليه حديث الرسال اللم صلي وسلم عليه ” يكثرن الشكاة ويكفرن العشير ” !! او كما قال عليه السلام .. ولا يحتاج اشرح اكثر !!

    صدز والله .. البلد في مرحلة انتقالية .. بدل هالبربسة و ” البربرة ” اللي مالها سنع .. شجعوا وائيدوا كل من يعمل لتعديل ” مصايب ” الزمن القديم !!! مهوب احسن لكم وللبلد ؟

    فمان الله بس … انا ملقوف يوم ادخل موقعك قبل لا انوم !! نرفزتاني !!!!

  6. light :
    هذا جانب يتكرر في مطار دبي ودايم نسمع عنه ، يكفي انهم موفرين موظفين لنقل كبار السن والعاجزين على كراسي متحركة وسيارات متنقلة ..
    المحطات قصة ثانية .. وهذا أول شي لفت نظري في أول زيارة لدبي عام 2000 ..

    أبو ناصر :
    ياحبك للطقاق .. ورى ماتروح تنوم انت ! 😀

    وش تبي اقول .. كل شي زين والامور متيسرة ؟ .. لا تقولي وقعوا وتم واصبر سنتين لين تزين الامور .. ماراح أشيد إلا لما اشوف شي فعلا ملموس قدامي ..

    بعدين مافيه شخصية أكبر من الملك الله يطول بعمره ان شاء الله .. وقد كتبت عنه مدونة واعتبره الشخصية الحلم بالنسبة لنا كسعوديين .. ويالله يعطيه العمر والقوة والنشاط عشان يواصل مرحلة التأسيس الحديثة ..
    عطني مشروع قائم الان يستحق الكتابة والتنويه عنه وانا اكتب من بكرة

    بعدين هذي اخر مرة تدخل المدونة وانت معصب .. احس انك بتوطاني لو اني قدامك .. هدي هدي والله ترى اكلم السفارة ( … ) واقول لهم معلومات مغلوطة عنك عشان ماتحلم بالفيزا ابد .. هماه 😀 ههههههههه

  7. يقول كيبورد صريح:

    بإختصار

    ياليتنا ولو نص دبي بكل شي

    دبي عرفت توظف كل شخص في مكانه المناسب وظهرت المدينه العملاقه دبي

    اول ماطلعت دبي قالوا انها فقاعه رد عليهم الشيخ محمد بن راشد في مقابله له وقال الفقاعه انفجرت في وجه من انتقدوها

    دبي دار الحي

  8. يقول دانا:

    امم زياراتي لدبي كثيرة يعني خلال السنة 3 الى 4 مرات, زوجي دايم عنده اجتماعات أو كورسات هناك وأنا المرافق الرسمي .
    فعلا كل زيارة لها ردة فعل غير أحيانا ماأبي أرجع الرياض وأحيانا ألعن الساعة اللي جيت فيها لكن دبي لها مكان خاص في القلب يكفي إنها الاقتراح الأول للسفرات القصيرة , ولكن تظل مدينة خالية من المشاعر مثل المرأة الجميلة لكن مافيها حنان. أدري قلبتها رومانسية عليك بس من كثر ماأحب مدونتك أحس اني صرت أمون.

  9. يقول ابو ناصر:

    اصصصصصص الله يقلعك لا يسمعك هالشايب الطاعون حق السفارة … ترى ما يبي لهم شيء !!

    ابذكر لك مثال واحد عالسريع !

    هيئة الاستثمار ورئيسها المبدع عمرو الدباغ .. اللي الكفار – اللي يخافون الله – عارفين قدره وحاطينه من اهم مائة شخصية بالعاااالم لعام 2006 !
    وعشارت الانجازات والاختراعات اللي يسويها سعوديين ولا عمرنا قرينا عنهم والبركة بهالاعلام الداج !!

    كنت اراوي اني اروح لدبي هالاسبوع مع” الرجال ” عشان نقابل ” الرجال ” !!!!! وهونت بسبة موضوعك هالشين !!

  10. كيبورد صريح :
    ههههه حلو رده بصراحة .. ويستحق بن مكتوم يفاخر بهالديرة

    دانا :
    عاد على قولتهم شي عن شي .. ويمكن ماحسيتي فيها بالمشاعر على قولتك لانك تروحين مع زوجك رحلات عمل .. يعني مو سكن وتعرف على اهل البلد ، طبيعي يكون كل الوقت في المجمعات وخلافه ..

    أبو ناصر :
    ههههههههه
    أما تروح دبي عقب ردة الفعل ( الشهيرة ) في الخيمة .. ماهقيت .. بعدين “الرجال” بيلعب في حسبتك هناك وش تحسبه .. ( اخوي أبو يزيد 🙂 ؟ )

    الدباغ ماعندي معلومات كثيرة عنه بصراحة وعلى قولتك اعلام داج 🙂 ..
    بس جازت لي هالفقرة :
    (بلغ رأس مال شركة البحر الأحمر بعد موافقة الشركاء على زيادته في 29/6/1427هـ 300 مليون ريال مقسم إلى 30مليون سهم بقيمة اسمية 10 ريالات للسهم الواحد وتمتلك شركة مجموعة الدباغ القابضة المحدودة نسبة 81% من رأسمال الشركة)

    طبعا بعدين الشركة طرحت للاكتتاب بقيمة 58 ريال للسهم الواحد وعلاوة الاصدار بلغت 48 ريال ..

    الشاهد .. أنا مالي في الاسهم بصراحة لكن واحد من الزملاء يقول انها كانت مباراة تاريخية وخوينا كنه لعب سامي مع الشباب 1418

  11. يقول دانا:

    أنا اليوم قاعده لك اذا سمحت لي .
    مو شرط إني ماأحس لها بشي إ ني أروح رحلات عمل كثير مدن زرتها مع زوجي بغرض العمل وأحبها وبعدين بالنسبة لدبي كثير من اللي قابلتهم قالو لي نفس الشي حتى وحده سويدية قابلتها صراحة هي اللي أعطتني مصطلح مدينة من البلاستيك, وبعدين أي أهل البلد اللي تقول عليهم في دبي مافيها غير الأجانب والمواطنين صاروا من الأقليات وهم نفسهم يشتكون من الوضوع ولا من وين جا موضوع الهوية الوطنية إلا لأنهم حاسين إنهم يخسرون هويتهم ووطنيتهم للأجانب . لا تفهمني غلط أنا أنبهر بدبي وبنظامها وبعمارها ولكن بعد أفكر بمواطنينها اللي دايم يتشكون .

  12. يقول إماراتية:

    السلام عليكم أخ أحمد ..
    أفرح كثير يوم أشوف حد يمدح بلدي 🙂
    الحمدلله نحن محظوظين بدولتنا وبشيوخنا الله يخليهم لنا الله يرحم الشيخ زايد والشيخ راشد والشيخ مكتوم..
    بخيرهم وفضلهم اللي مغرقنا يجبرونا نبدع ونشتغل ونسوي عشان نرد جزء من فضلهم علينا ..
    أما على سالفة تواضعهم فمهما قلنا محد بيصدق ..
    قبل فترة أخوي يقول كنت قاعد في كوفي في مول واثنين قاعدين مقابلهم .. يقول ويوم واحد منهم قام والا أشوفه الشيخ محمد بن زايد ..
    يوم الاتحاد بعد أخوي الثاني يقول كنا نمشي في المول والا الشيخ حمدان بن محمد بن راشد “فزاع” كان يتمشى وسلم علينا ووقف يسولف .. يقول والله انه قمة في الأخلاق والتواضع
    والله لو كتبنا ما كتبنا ما نوفيهم حقهم ..

    يوم أمشي وأشوف حد من السعودية صدق صدق أستانس ..
    شعب محترم ونكن لهم كل الحب والاحترام ..
    ويوم نزور السعودية صدق تغرقونا بكرمكم وطيب ضيافتكم..

    بس على فكرة يبالكم زيارة لأماكن ثانية في الإمارات غير دبي ..
    في بوظبي مثلا فيه الكاسر يالله هذا شي ثاني روعته مو طبيعية أبدا! .. وفيه منتزه الشيخ خليفة ووايد أماكن ثانية حلوة ..
    في العين المبزرة .. المبزرة ترد الروح..
    في الشارجة قناة القصبا أجواءها روعة ..
    المناطق الشرقية من الإمارات تتميز بطبيعتها الحلوة وأجوائها النقية ..

    كني طولت في الرد شوي.. السموحة D:

  13. يقول توتو:

    ااااه يادبي,,,, حبيبتي هذي.. بلا بلاستك بلا يحزنون! البلد رائعه ومريحه وآمنه وسهله ونظيفه وجديده ومتجدده بعد ونهههههار مو ليل وشقول وش اعبر؟؟ اي رياض اي امراض شعب الرياض!محد يقدر يطلع ويتحرك براحته ولا حتى يوصل لاي مكان براحته اسمحولي ياجماعه !البلد مافيها عقد ولا امراض ولا طبقيه انت والهندي واللبناني والكويتي والناس كلهم في نفس المكان براحه وبدون وش جاب هذا هنا؟؟؟في برج العرب والا في سوق نايف!ياحلوها بس الا دبي دار الحي الله يحفظها لنا ولهم ….

  14. اكيد مافي مدينه تحترم الناس و تلقى الكل فيها يحترم النطام زي دبي..

    وا تنسى ان هناك ناس و قاده سهروا لتوفير الامن و النظام و اتباع سياسه المواساه

    مع كل البشر

  15. دانا : يمكن هالشعور جاء لك من قلة الاماراتيين في المدينة ووجود جنسيات متنوعة ، يعني يمكن الواحد يروح 5 ايام من دون ما يكلم احد

    إماراتية : من ناحية ( يبا لنا ) .. فهي يبالنا من جد 🙂 .. كان فيه فكرة نمر ابوظبي بس الزيارة كانت زيارة عمل ولا تسهلت الامور كثير .. بس الجايات اكثر ..

    توتو :
    حلووو .. هذا رد على دانا 😀 ..

    أحييك على الرد .. واتفق معك جملة وتفصيلا ..

    وتر :
    بالضبط .. عشان كذا نقول نخشى عليها من الحسد ..

    كويس ابو ناصر ماجا يخابط ويعصب ..
    يالله تزيد هالامطار كوده يلهى في هالسدود ويطامر ويفكنا شوي .. بس نبيه يجي الخميس

  16. صجيتنا وصجيت ابو ناصر بهالديره

    وعز الله ان ابو الوليد صادق يوم يقول ان ( الرجال ) راح لأبو ظبي يوم درا إنك جيت دبي 😀

    على العموم ابو ناصر ان شاء الله يبي يتمرجل معه الشويب حق السفاره ويبي يكتب لنا تقرير عن رحلته تغطي على تقاريرك 😛

    بس ردة فعل ابو ناصر ذيك اليوم غير طبيعيه

    تصدق لين نزلني في البيت وهو يتنافض ههههههههههههههههه

    دبي ماسبق زرتها .. ولا عندي طاري بعد

    انا رجال مشطب على أي دوله عربيه

    مهما كانت متطوره !!

    دورنا عند حمران العلابي

    اما غيرها .. فمالنا لزوم إلا في السعوديه عسى الله يحفظها بس

  17. ايه نسيت شغله

    مبروك عليك عودة الموقع بعد الإيقاف

    ومبروك عليك إنتقال تفاريس 😛

    ياحبيبي

    الموسم الجاي هوساوي والمفرج والعنقري وزوري والبرقان

    هههههههههههههههه

  18. أخوي (أبو يزيد) :
    لا تصير من هالمهايطية .. قلي مرة تكلمت عن دبي بعد ماجيت لك ولا لبو ناصر ..ولا جاي تحامي عن خويك ..:D

    ههههههه اما ابو ناصر هذاك اليوم ماقد شفت وجه تقلب ابد .. من جد هذا لو يشوف (الرجال) قدامه على الطبيعة .. والله يابيجيه رباط صليبي في كل رجليه ..

    عموما دبي تستاهل زيارة .. وفي الناهية لاحظ اني ماقلت دبي وصجيت فيها بقدر ماني كتبت عن النظام والمساواة فيها واتحدى تكون في اي مدينة عربية اخرى باستثناء ( الدرعية) اللي مافيها ولا اشارة على قولة ابو ناصر

    اما دفاع الهلال السنة الجاية .. شكله بيصير زي دفاع النصر هالسنة .. وبياكلها والله اللي بيترأس النادي اللي اقرب ماله ( اززززهلها )

  19. ومين عمره زار الامارات وما عجبته?
    أنا نزلت آخر مرة في أبو ظبي ولو كنت وحدي كان طولت هناك ومريت دبي بس عاد معايا اتنين يجيبوا الصداع فمن قاصرها بلاش 😀
    حمد الله على السلامة 🙂

  20. يقول × ملامح ×:

    الحمدلله على السلامه ..

    دبي مدينة العجايب .. والفضل لله وثم للشيخ محمد،، لكن نص هالعجايب للحين ماشفتها ..

    دبي غربة .. الأجانب يطالعوني وكأني نازله من كوكب المريخ

    ولكل نجاح إيجابيات وسلبيات

  21. asma :
    فعلا ولا اتوقع احد يمر دبي ويكرهها حتى أبو ناصر 🙂

    ملامح :
    هو غربة من منطلق ان العرب صاروا أقلية

  22. يقول انجل:

    مرحبا..عودا حميدا احمد ممكن ادخل موقعك سوالفك رائعه..بس ابي ألحق على الموضوع الجديد واكون أول من يرد بس متى؟؟دايم ماألحق ألا على غبرتكم..

  23. حمداً لله على سلامة الوصول ..

    بلا شك دبي مدينة متقدمة وجميلة ..

    لا يسعني القول الا

    نتمنى أن تكون رحلة رائعة لـك

  24. يقول السليطه:

    وياويلنا من هالنظره المستقبليه والرؤيه الي بتويدينا وطي..ونروح معها مراح جدتي الله يرحمها في هاليوم المبارك
    أقول أحسن نبلها و نلئحها و نشرب ميتتها ابرك …
    ::::

    لا اشوه مادحنا هنيييااااا ……ايه شفت عاد يا خوي التحضر وو احترام الخصوصيات.. وعدم التليقف في الامارات بشكل عام والمتمثله بدوووبي بشكل خاص ..

التعليقات مغلقة.