طلب واسطة لخدمة في شركة خاصة !

مالنا إلا انتم

( اللي يده في النار مو مثل اللي يده في الموية ) ، كانت تلك الجملة أدل تعليق لحالي الاسبوع الماضي ، فقد كنت وحتى وقت قصير أدخل المنتديات وأزور المدونات لقراءة المواضيع التي تنتقد شركة الاتصالات وتعاملها ، في واقع الأمر لم تكن تمثل لي أمراً هاماً كوني مستقر جداً في الخدمة ولم أعاني إطلاقا من تغير يستحق الانتباه ، إلا أن ماحدث الأسبوع الماضي حول كل هذه المفاهيم إلى كره وغضب .
تفاجأت الأحد الماضي بأن إشارة الانترنت مطفأة رغم سلامة وضع الاشتراك عندها أبلغنا الاتصالات السعودية عن الخلل ووعدونا بحله في أقصى سرعة لتبدأ مراحل الاتصالات يوما بعد يوما والتحويل إلى المشرف ومن ثم إلى موظف آخر وحلقة طويلة لا تنتهي للبحث عن المشكلة التي لم يرسل لها فني حتى بعد مضي 4 أيام ، المفارقة أنني عندما أتصل بالرقم 904 كان هناك خيار في التسجيل الصوتي يقول ( اضغط الرقم 4 في حال لم يتم تلبية طلبك خلال 24 ساعة ) كنت أكلم الموظف وأقول بأني لم أتجاوز 24 ساعة فحسب .. بل و 48 ساعة و 72 و 96 .. بل وحتى 120 ساعة ( أي خمسة أيام ) ، كان كل موظف يعتذر بلباقة مؤكداً بأن المدة طويلة ( كانت إجابتهم موحدة كل يوم ) ، كلما أتصل يجيب الموظف ( والله يخوي غريبة الطلب عندي من خمسة أيام .. بكتب لك شكوى وبرفعها ) وهكذا كان الحل كل يوم دون أن ألمس أي تحرك ، حقيقة لم أود أن أرفع ضغطي وأعصب لموظفي 904 لعلمي بأنهم لا يملكون من الصلاحية سوى تعبئة الفورم الذي أمامهم في الجهاز ، وهكذا الحال كل يوم حتى أكملت أسبوعاً بلا انترنت .. وأترك تخيل حال البيت في غياب الانترنت .. انقلبت أحوالنا حقيقة رأساً على عقب .
الشاهد وبعد مضي اسبوع تلقيت اتصالا من زميل يعمل في شركة الاتصالات وكانت الفرصة لأطلب وساطته في الموضوع لحل المشكلة ، كانت المكالمة في الثانية ظهرا وعندما عدت للمنزل عند الرابعة .. كانت الانترنت تعمل !
حقيقة ندمت أني كنت مثالياً طوال اسبوع ، كان يجب أن أكون مثل كل الناس .. أطلب واسطة فلان وعلان .. حتى ولو كان في شركة تبحث عن الربحية ..
غني عن القول بأن آخر مكاملة لي مع المشرف في 904 كانت تنص على أنهم سيتصلون بجوالي متى ماجد مستجد في الشكوى .. وبكل حال .. لم يتصل ولا أتوقع أن يتصل !
أكبر الرابحين من توقف الانترنت كانت والدتي – أطال الله في عمرها ومتعها بالصحة والعافية –  حيث أبدت أكثر من مرة استغرابها عندما أصبحنا نكثر من الاجتماع والجلوس في الصالة ، ولم يعد أشقائي يفتحون أجهزتهم المحمولة عندما يزورونا في المساء بل كانوا يجلسون للحديث وتبادل الأخبار .
أكتب لكم الآن من غرفتي ومن جهازي الشخصي ، وشقيقي وشقيقتي ( حركة مابقى أحد في البيت 🙂 )  انكبا على النت بشكل أكثر من السابق – بعد التوقف اسبوع – فيما بقت الغالية في الصالة لوحدها وبيدها الريموت تبحث عن المواضيع الطبية والحوارات مع الأطباء – كعادتها 🙂 –  حتى يخيل لو أن والدتي ولدت في هذ الزمن لتأكدت بما لا يدع مجالاً للشك بأنها ستدخل كلية الطب لكنها ولدت في زمن لم يكن فيه هناك أي مدرسة بنات ورغم ذلك كافحت وتعلمت ( كني طلعت برا الموضوع على قولة الطنطاوي 🙂 )
قال انتهى الوقت والسلام عليكم ورحمة اللللللللله

13 فكرة على ”طلب واسطة لخدمة في شركة خاصة !

  1. تصفيييييق ..
    أقول يا زين الدايل أب >> عايشه عليه من عرفت النت !
    تخيلوا يا جماعه .. .. أحس انا الوحيده اللي لسه تستخدمه !!
    انت تقول اليده في النار مو مثل اللي يده في المويه ..
    وانا أقول ((( باب النجّار مخلّع ))) !!!!
    ما راح أقول ليه … خليها فضفضه وبس ..
    المهم .. مبروك رجوع الأنترنت , والله يطولكم بعمر الوالده 🙂 ..

  2. يقول نوندي:

    لكن وش اللي يؤكد لك ان الخدمة عادت بسبب الاتصال بزميلك ؟

  3. هههههههههههههههههه

    والله ياأحمد وش نقول بس عن هالشركة المقرفة ….

    صار لي نفس قصتك بالضبط قبل 3 أسابيع … تدري ومع كثرة هالاتصالات وش صارت النتيجة :
    وبكل برود يقول الموظف :
    أصلا رقمكم مب موجود بالفريم عندنا على خط الدي اس ال

    يا الله .. وش هالكلام ؟
    أخوي موظف عندهم في الشركة , وبس من يوم قال برفع خطاب استفسار عاجل للمرجعية والله أن الموظف حق الطواري جاي بعد( المغرب )يتأكد ويشبك لنا الخدمة وخذ اعتذارات …

    يعني ماينفع فيكم إلا واحد له ظهر 😦

    الحمد لله على سلامة انترنتكم …
    وخلي الوالدة الله يطول بعمرها تدخل النت وتشوف المواقع الطبية 🙂

  4. يقول يبي لها .. جمررررررره:

    أخي وعزيزي أحمد

    المثاليه ماتوّكل عيش هاليومين

    حركات المرزوقي .. واللعب النظيف .. راح زمانها

    يقول المثل البنغالي : زندك ولاّ مت !!

    أو

    خلّك ذيب .. لا تصير فرخه !

    عموماً لا زلت تواصل نرفزة الجمهور الزعيقي بذكرك ( سيء الذكر ) للمره الثانيه ( راجع سطر 24 )

  5. في زمنا هاي مافي شي اسمه مثاليه للأسف
    .. على العموم.. بالبركه على ردة النت .. 🙂
    انا الحين صار لي اسبوعين بدون نت(أحمد ربي ان عندي نت بالمكتب:) ) السبب انا ناقلين منطقه يديده والارسال زفت . .. 😥 تصور حالتي ويا بيتنا متجابلين ونجرة وهواش طول اليوم :/

  6. المشكلة تعدد الشركات وتعدد العروض والخدمات وحدة!!
    إلى الآن ما عمري شفت أحد في السعودية ما اشتكى من النت!
    ما أقول نحن ما نشتكي إلا.. بس والله حالات قليلة جداً جداً.. يعني مستحيل توقف الخدمة أسبوع!! ولو اتعطل النت بيكون من جد عطل جسيم مو بس عبط..

    أتذكر مرة النت خرب أيام الزلزال اللي ضرب الصين وما كنا ندري.. طبعاً رأساً رفعنا السماعة واستفسرنا وفيه ناس شوية وتهزئ 😀 واتخيل وقتها الموظف يقول لك والله هو الزلزال صار في الصين وفيه أضرار على كل ماليزيا والدول المجاورة وبنعمل اللي نقدر عليه حتى نحفظ الباقي!!.. وقتها من جد حسيت اني بلقط وجهي 😀

    المشكلة يا أحمد الناس بتشتكي والشركات بتطنش والحكومة بتدعمهم ضد الشعب!!
    هنا لو أحد اشتكى سواء على التلفزيون والا الجرايد رأساً بتلاقي خطابات اعتذار ولملمة للفضيحة.. لأني كل واحد همه واجهة الشركة وخدمة العملاء عشان يكسبوا.. هنا الحكومة ما تدعم أحد ولا لها دخل بأي شركة.. عشان كدا فيه تنافس في أبسط الأشياء وكل شركة تحاول تغري العمل وتقدم الأحسن..

  7. يقول إيمان:

    بصراحة … لازم تشكرهم … على الأقل قعدت مع الوالدة الله يطول بعمرها
    كم تمنيت أن أعيش في المثاليات … لكن واقعنا الحالي يجبرنا على استخدام الواسطات و الوسائل المنحرفة عن المثاليات من أجل تسهيل أسخف أمور حياتنا و التي لا يتطلب انجازها إلا دقائق أو حتى ثوان معدودة … أخاف بعدين عشان نتنفس الهوا لازم يكون لنا واسطة 😉

  8. يقول جوري:

    قبل لااقول الله يعينك على الاتصالات

    الله يعينك على الردود

  9. الحمدلله على سلامة النت وما يشوف شر … أتخيل نفسي بدون نت حالتي من جد صعبة …
    يالله فيها خيره لما فصل النت على الأقل تجلسون مع الوالدة توسعون صدرها ..
    نرجع للموضوع …
    يعني عشان تمشي أمورك لازم لك واســــــــــــــــــــــــــطة في كل قطاع وَ مجال
    و الواسطة درجات , يعني مو أي واسطة تمشي 😦
    مثلاً اثنين جايبين و اسطة وَ درجتها تختلف أكيد اللي مرتبتها عاليه راح تمشي , يعني ما تسوى علي الطرارة , لا ورازة وجهي أبغى واسطة وَ انحسبت علي وَما استفدت شئ …

    أحس أني قاعده أخربط بس من الحرة وضيقة الصدر , و موضوع الواســــــــــطة بالذات مسوي معاي أزمة

    دمت بخير ما دام عندك واســــــــــطة

  10. .
    .
    .
    وبصراحة لا تعليق
    الحمدلله ( منب ) قايل شي … مازلت أعيش معهم سمن على عسل 🙂

  11. nOuf.a.s : أما دايل أب الحين .. بصراحة صعبة مرررة ، عندي خط وأقدر أدخل دايل أب بس أعتبره شي مستحيل بصراحة 🙂

    نوندي : لأن آخر اتصال مع 904 كان يؤكد بأن الفني سيخرج خلال 24 ساعة لتركيب وصلة أو توصيلة ليست متوفرة في نفس اليوم ( بتجي طلب )

    بدر الشايع : ههههههه الرقم مو موجود مرة وحدة ؟
    ياساتر
    تبي تضحك .. الخط باسم أخوي الكبير واللي هو يشتغل في الاتصالات برضه .. لا ومدير بعد ههههههه حركة ، كنت أقول هالكلام لموظفي 904 ونجلس نضحك سوا .. والله

    يبي لها .. جمرة :
    حنا أحسن حنا أفضل 😀
    في هذي صدقت .. اللعب النظيف ولى زمانه من جد .. الحين يبي لك تلعب من تحت لتحت .. وسطات وحركات وأمورك تمشي

    ROOGYz : الله يبارك فيك .. والله يكون البيت اللي مافيه نت في هالزمن

    asma : هي جت على الاتصالات بس .. نظامنا ( حارة كل من ايدو إلو ) .. اجل يبي لك اطلاع على النصب الأكبر في ورش السيارات والوكالات .. لو تسوي اللي يسوون ، وعلى قولة واحد من الشباب قال بشتكي وبسوي .. جابوا له تلفون وعطوه رقم وزارة التجارة وحماية المستهلك وقالوا لك ( اشتك بيديك ورجليك 🙂 ) ..
    آآه بس

    خاطرة بيضاء :
    ما أتوقع راح يكون فيه بديل بصراحة .. على الأقل خلال السنوات الخمس الجاية

    إيمان : والله جايز 🙂 .. والوالدة نجلس معها كل يوم مايحتاج .. بس النت آخر الليل يكون له الصلاحية للتشييك النهائي

    جوري : وش دعوى .. بالعكس الله يزيدها

    light : الله يسلمك .. الشاهد الواسطة فيك فيك .. درجتها تختلف .. ماتسوى .. الحين لازم واسطة واسطة أو على الأقل تزكية على قولتهم

    سلطان : كنت أقول مثلك 🙂

  12. يا الله ، عظم الله اجرك بفقد النت 😀
    اتذكر قبل سنة ونص بالضبببط ، كنا نستخدم الدي اس ال لمدة سنة كاملة
    وبدون اي مشاكل او اي انقطاع سوا الانقطاعات اللي تصير بسبب الصيانة وخلافه
    المهم وفي رمضان انقطع النت يوم تقريبا والسبب صيانة عامة حسب كلامهم
    بعدها انتهت الصيانة وما رحع لنا النت !
    طب ليش وكيف ؟ والله اتصلي وبلغي
    اتصلت وبلغت وجاء الرد الصاعقة
    ان بيتنا بعيد عن المقسم وما يوصله الدي اس ال !
    طيب والسنة اللس استخدمتها ؟ فجأة كذا شلنا بيتنا من الكرة الأرضية ؟ ولا كيف

    وللحين مافيه جواب
    طبعا طلعت البدائل والحين استخدم موبايلي كونكت

    وخلصت لقاعدة ذهبية : ما دام انت في السعودية فلا تحلم بنت صحي أبدا أبدا ..

التعليقات مغلقة.