ابتعد عن إدارات الأقارب

النصيحة الأولى التي دائماً ما أوجهها إلى أي زميل أو صديق يبحث عن وظيفة ، هي أن يبتعد قدر الإمكان عن الإدارة التي ينتشر فيها الأقارب ، لأسباب عدة يأتي في أهمها أن الإدارة التي يكثر فيها الأقارب تعكس جانباً من كيفية العمل ، لا أنتقد هنا من يحضر قريبه أو ابن عمه أو ابن خالته ، لكني انتقد المسؤول الذي وافق على التعيين ، حينما يرشح موظف قريباً له في الوظيفة وهو يستحق المنصب بلا جدال سيشكر الموظف على ذلك الترشيح لأن هدفه لم يكن في المقام الأولى أن يعين قريبه بقدر ماكان هدفه أن هذه الوظيفة تستحق مواصفات معينة كالتي يتحلى بها قريبه ، أما من يستعين بذلك من مفهوم الواسطات أو الفزعات ويوافق الرئيس على التعيين ( بعلمٍ أو بلا علم )  فإن ذلك مدعاة لوجود سلبيات أدهى وأمر .
الاسبوع الماضي زرت أحد الأصدقاء في منشأة خاصة ، وتفاجأت وهو يعرفني بموظفي قسمه أن أربعة منهم يعدون من أقربائه وكان يفاخر ذلك من منطلق (الفزعة ) ، سألته ( ألا يرفض مديرك ذلك التعيين ) ، أجابني إجابة بسيطة لكنها كافية ( والله المدير مايدري وين الله حاطه فيه .. زين انه يداوم 🙂 ) .
في إدارات الأقارب ومع مرور الوقت ستكتشف بأن وحيدٌ بينهم ، فهم سيكونون لوبيات خاصة بهم لا محالة ، وكل المميزات سيتنافسون عليها ويتقاسمونها .. فيما أن ستبقى وحيداً وقد تبحث عن قريب لك تعينه في نفس المكان كي يقوي عزيمتك ويدعمك في الطلبات والانتدابات والمميزات .
المدير الذي يسمح بقبول هذا الكم الكبير من الأقرباء في مكان واحد ، غالباً مايكون غير مهتم ولا مطلع ولا يفكر فعلاً في تقوية إدارته بأشخاص موهوبين قادرين على دفع الإدارة للأمام ، كل مايرجوه أن يظل كل شئ كما هو وأن يسير على نفس المنوال ( وكل واحد يجيب ولد عمه وولد خالته  وتصير الأمور آخر فووولللي )

13 فكرة على ”ابتعد عن إدارات الأقارب

  1. يقول TMT:

    اهلين خيو

    طيب ماتبي توظف اخوي عندكم 😀

    اتفق معك اخوي احمد صراحه هذي مشكله ومنتشره بالقطاع الحكومي بشكل اكبر منه في القطاع الخاص بس احيانا يكون قريبك عبقري وموهوب ويمكن الاستفاده منه وتحس انه بيسوي اضافة فمالمانع في الاستفاده منه ؟

    متى اجيب لك ملف الرجال بس هههههههههههههه

  2. جني أنت .. توني منزل الموضوع أمداك 🙂 ماكمل عشر دقايق

    شف من العجلة ما امداك تقرأ الموضوع كويس ، أنا أقول لما يكون الموظف يستاهل راح يشكر الشخص عليه .. لكن المشكلة لما ما يستاهل .. وقدراته ضيعفة بس جاي من باب الفزعة ويبو فلان ويبو علان .. هنا في مشكل كتير

  3. خذ عندك جني ثاني 🙂 (الله يخلي جوجل ريدار) 🙂 ..

    صدقت يا أبو حميد وهذا شي ماعليه خلاف ..
    لكن أحيان الواحد يقوده الحظ أنه يتوظف في مكان يكون فيه قريب له !
    الوظايف في هالأيام أصبحت بالحظ أو بالصدفه .. لكن عشان تسعى لها
    مالك أمل ..

  4. يقول نوندي:

    أختلف معك ايها المدون ولا اتفق معك في كثير مما ذكرت

  5. يقول سلطان:

    سلام يا سكره

    بعض الشعب الله يصلحه يقول ” الأقربون أولى بالمعروف ”

    لكن المشكلة في ماهية التطبيق 😦

  6. بأحدي الاداره التي عملت فيها
    تم توظيف اختين بقسم واحد
    لكن المدير كان خوفه من وفاة احد اقاربهم /واضطرارهم لاخذ اجازة مشتركه بسبب مناسبات الافراح وغيرها
    تعرف مثل هذه الالتزامات
    المضحك ان كثير من هذه الامور حصل وكانت الاجازاة المشتركه امر ضروري لا مناص منه
    لكن من الامور الايجابيه والسلبيه بنفس الوقت هي مساعدتهم لبعضهم في العمل لكن بنفس الوقت الدفدفه وكتم الامور امر طبيعي بدافع الفزعه -مثل ذلك لا يمكن ان تجده بين الموظفين العاديين متضاربي المصالح

  7. يقول nOuf.a.s:

    انا الحين أكثر وحده أتعامل معاها في مكان عملي تقرب للمديرة :S !!
    وأنواع اللي ما أقدر أحش .. .. .. 😛 ,..

    >> لاحظ هم الحريم خخخخ ..

    ترا أمزح لا تمسكونها علينا عاد !!!!

  8. يقول ســــالم:

    على مستوى الكويت تجد هذة الظاهرة في الوزارات و ليس فقط على مستوى الأقارب بل على مستوى القبيلة … يعني تلقى وكيل وزارة مساعد من قبيلة س معين موظفين يندرجون تحت بند البطالة المقنعة كلهم من قبيلة س … و ليس فقط القبيلة و الأسرة .. بل المذهب و التوجه السياسي كلها صارت تلعب دور في الوظيفة الحكومية و المحصلة النهائية تقارير ديوان المحاسبة ( الرقابة ) التي تصرخ و تأن من التجاوزات التي أدت لترهل أجهزة القطاع الحكومي و الهدر بالأموال العامة وهجرة الكفاءات للعمل بالقطاع الخاص رغم حاجة الدولة لهم … يعطيك العافية أحمد

  9. الأقارب عقارب..

    في نظري ان المدير او صاحب العمل اللي يوافق على هالشي انسان ما يفهم في اصول العمل

    و الادارة..لان في النهاية راح ينقلب كل شي عليه من تطنيش ونصب و سرقه في العمل

  10. مشغول : شف دام السالفة حظ ولا توفيق .. مافي مشكلة .. ياخي اذا كان كفاءة ويستاهل برضه مافي مشكلة .. لكن فيه شي عيني عينك .. لا ويمكن ببركة المدير نفسه .. هنا المشكلة

    نوندي : ياعزيزي الاختلاف لا يفسد للود قضية زي مايقولون

    سلطان : يابن الحلال أي أقربون .. أعرف واحد مابقى إلا يجيب الشغالة .. تخيل 🙂

    layal : أحياناً أقول حالة واحدة مافيها شي .. لكن فيه ناس توظف خمسة .. عشرة .. يعني هذولي مال أرقام قياسية 🙂

    nOuf.a.s : مافيها كلام أجل المديرة عندها برنت يومي عن اللي يصير

    سالم : شوف مفهوم القبيلة واسع وكبير ، والتداخلات فيه ممكنة ، لكن أنا اتكلم عن أشقاء .. أبناء .. عيال عم .. بالعربي أقارب من الدرجة الأولى .. ولما يكون فيه قسم نسائي .. تتوظف المدام والبنت .. أقولك مابقى إلا الشغالة ههههههه

    وتر : لا مو شرط ينقلب عليه .. لأن هذولي غالباً بطالة مقنعة .. يعني وجودهم أو عدمه مايسوي شي .. اللهم زيادة نسخ الجرايد يمكن

  11. طيب انتوا في بلد كبيرة وما تعرفوا بعض دايما وووو

    اجل نحن الأقلية في بلد زي ماليزيا اش نسوي
    تخيل الجريدة اللي كنت بشتغل فيها كل الموظفين كانوا من طلبة الجامعة اللي درست فيها ولا كمان كنا من جمعية وحدة وجمعتنا ذكريات وحدة ووو

    والحوسة حوسة من جد لما تلاقي الفتن تطلع وقتها

  12. الاقارب عقارب

    سبحان الله انا في طبيعة ما احب اني اشتغل في مكان يكون لي قريب فيه

    لاني اعرف وش الكلام اللي بينتشر ويظهر للملأ

    لذلك لو كان من صلاحياتي اني اوظف احد ابتعد كل البعد عن الاقارب

    اتشرف بزيارتكم لمدونتي المتواضعة

    http://5arbasha.blogspot.com

    دمتم بخير….

  13. لدينا في المنزل ثورة رياضية غير طبيعية لم يسبق لها مثيل قائد هذه الثورة هي بنت اختي … ايه لا تستغربون , طبعاً بيتنا قبل ثورة بنت أختي كان متواضع جداً ( يعني ان كثر و شجع و تحمس للمنتخب السعودي وَ الهلال ) .. ما شاء الله على اخواني ماعندهم ميل كروي و لا يتابعون أخبار و لايقرون جريدة الرياضية .. لكن بعد الثورة الوضع تغير 180 درجة … بتقولون كيف ؟ … طبعا بداية الثورة الهلال و صرنا نتابع كل شاردة وَ واردة تصير بنادي الهلال … لكن الآن الوضع تغير وَ تطور بنت أختي العزيزة ما وقفت عند الهلال و خلاص
    man .u. . لا .. قالت لازم احترف … صارت البنت تشجع مانشستر يونايتد ( مره وحده ) .. ما امدانا نحفظ لاعبين الهلال إلا ودتنا
    ماصارت , عاد ماشاء الله عليه تأثيرها قوي يعني غصباً علينا لازم نعرف كل شئ ( مدربهم السير .. و لاعبينه امثال كريستيانو رونالدو ) .
    لم تكتفي بذلك فقد اضطر والدها للإشتراك بقناة
    art , showtime

    حتى تتابع اخبار الفريق و الدوري الانجليزي وَ دوري أبطال أوروبا .
    .. طبعاً يوم الخميس تزداد حدة هذه الثورة .
    .. يجتمعون عيال
    اخواتي و كل واحد يشجع له نادي .
    … واحد تشيلسي ( هو ولاعبه درجبه ), و الثاني ارسنال ( هو لاعبه فابريجاس …مدري ايش) تصير معارك في البيت خصوصاً إذا اجتمعوا في المباريات ضد بعض … مساكين ضاقت صدورهم يوم اعرفوا ان مانشستر يونايتد راح يشارك في حفل اعتزال سامي الجابر ( طبعاً هم من مشجعي نادي الهلال )
    . الغريب في الموضوع ان هذي الثورة اثرت على امي … شلون ؟ اليوم امي جالسة تتابع قناة العربية الا يطلع خبر إعارة ياسر القحطاني لنادي مانشستر سيتي , هالموضوع جذب امي و راحت تقول لبنت اختي ( حركات امي ما تلعب ) , تستمر الثورة و يستمر تاثيرها على بيتنا العزيز

التعليقات مغلقة.