تسوق .. بأريحية

ربما هي المرة الأولى في الرياض التي أتسوق فيها بهدوء وراحة وبكل أريحية ، ذلك ماحدث مساء أمس ، على غير العادة دعوت ابن أخي محمد ( 10 سنوات ) للخروج معي للتسوق في معرض اكسترا في الرياض ، درجت العادة إما أن أخرج لقضاء مشاويري في التسوق وحدي – على عجل – أو أدعو أحد الأصدقاء للخروج بصحبتي أو أن أخرج بصحبة الأهل وهو أمر نادر الحدوث 🙂 .
بكل تأكيد حينما أرافق الأهل سيكون الأمر صعب جداً لاختلاف المتطلبات ، فبكل تأكيد لن تقف والدتي بجواري للبحث عن كاميرا جديدة أو مناقشة بائع في مقارنة بين جهازي جوال ولن أطلب من أمي أن تضيع وقتها في سماع هذه الحوارات ، أما حينما أخرج مع صديق فيكون الأمر صعباً أيضاً .. فدائماً ما أواجه مشكلة أن رفيق التسوق يستغل وجوده  للمعرض للبحث عن حوائجه ولوحده .. فحينما أقف مع مسؤول أجهزة اللابتوب واستعراض الأجهزة .. أجد رفيقي يدخل في نقاش طويل في الجهة الأخرى حول أجهزة التلفزيون .. ثم أبحث عنه وبعد اتصال بالجوال أكتشف أنه في الدور العلوي يبحث عن (كوفي ميكر ) .. وفي النهاية أصبح أنا من يرافقه وندخل في نقاشات مع البائع فيشتري هو ونخرج دون أن أنهي مشواري .. بل قد أخجل منه عندما يطول الوقت خوفاً من أن يكون هو الآخر مرتبط في مشاوير أخرى .
أما المشكلة الكبرى فهي الخروج لوحدي .. وسأتحدث بصراحة هنا ، فدخول المعارض وحيداً قد يلفت نظر الأخوة في الهيئة وخاصة عندما يكون الشخص في لبس أنيق ( وكأن اللباس تهمة ) حتى ولو لم يتحدث معي أحد مجرد النظرات المليئة بالشك لا تريحني على الإطلاق وكأني أقوم بتنفيذ جريمة .. لذا أدخل بعجل وسرعة وأنهي حوائجي باختصار شديد ، والنقطة الأخرى في نوعية من البنات (اللي عيونهم زايغة للأسف .. والله يالدنيا صاروا الآن البنات هم اللي عيونهم زايغة ) .. ماعلينا .. هناك نوعية من النساء اللي (ماتربوا :)) يكرسون كل جهودهم في حال رأوا شاب ثلاثيني وحيد .. وللأسف الشديد يصبح الرجل فريسة وقد تنقلب الأمور رأساً على عقب حينما تخطط الفتاة بكل مهارة للإيقاع بالرجل و (ترقيمه ) .. وأحمد ربي صبحة وعشيا بأني أصنف من فئة (الشيون ) وإلا لحدث في الأمور عواقب وخيمة ، ناهيك بالطبع عن الباعة والمتسوقون الذين يرمقونك بنظرات غير مريحة وكأنك بالفعل تتجول بهدف (المغازل ) .
عوداً على بدء .. أقول بالأمس خرجت بصحبة محمد إلى معرض اكسترا .. كل العواقب السابقة زالت تماماً وظهر وكأني أب لهذا الطفل (وهو بالمناسبة يشبهني ) فلم يعبرني رجل الهيئة حينما ممرت بجانبه .. بل لاحظت أن بعض النساء ابتعدن عن الممر أمامي .. وللمرة الأولى أقضي في اكسترا قرابة الساعة .. اشتريت كاميرا جديدة .. وانتقلت لأجهزة الجوال واشتريت بعض الاكسسوارات .. ثم انتقلت لشاشات التلفزيون ومتابعة عروض شاشات البلازما الجديدة .. ثم انتقلت للجهة الأخرى في جناح الكمبيوتر واللابتوب ..وذهب الوقت بسرعة دون أن أشعر .
عندما ركبت السيارة قلت لمحمد ( اختر أي مطعم في الرياض لنتعشى فيها ) .. طبعاً لا يخفاكم طلب الأطفال .. لم يفكر في مطعم إيطالي .. ولا حتى بيتزا .. ذهبت لأحد المطاعم (على ذوقه ) وكانت الفاتورة لا تتجاوز 30 ريالاً  .. ومحمد بعد هذه الجولة التسويقية يبدو أني سأستعين بك كل اسبوع مرة خصوصاً وأن طموحك يقتصر على تعبئة رصيد جوالك بـ 20 ريال !!

27 فكرة على ”تسوق .. بأريحية

  1. يقول ابوالعبد:

    ياحليلك يا احمد
    والله من زمان ماتسوقت يمكن سنة ونص
    اللهم عند الخياطين اطول بس
    وسلملي على تعويذتك محمد
    سلام

  2. يقول ابو عبدالله:

    المشكله ليست هنا , صحيح سأخرج عن موضوعك قليلا لكن دعني اتحدث..
    حاولت قبل اسبوعين تقريبا من دخول عدد من الاسواق للبحث عن ساعة معي رقم موديلها من ماركة معروفه
    اممم الساعة كانت تقريبا 9 مساءً .. حاولت دخول المملكه في الاول وقال رجل الامن ممنوع!! رجل لوحدك ممنوع!! لم اخذ واعطي في الكلام لاني سأصل لنتيجة لن ارضاها ولا هو يرضاها ذهبت للفيصلية وقال رجل الامن ايضا ممنوع!! طيب اذا ممنوع ليه فيه محلات رجاليه بالداخل!! قال هذا النظام!! ذهبت لصحارى ونفس الطريقة .. ذهبت لرويال مول.. ولم انظر لرجل الامن دخلت .. جاء خلفي .. لو سمحت ممنوع .. قلت امنعني ومشيت في طريقي ووجدت الساعه وقمت بشراءها وخرجت .. ومشت الامور بسلام.. المغزى من حديثي .. ان العرف عندنا ان المرأه يجب ان يكون معها محرم لكن للاسف انقلبت الاية .. اذا كانت لي حاجة في السوق لا استيطع الدخول الا بمحرم!!

  3. يقول مهند:

    السلام عليكم
    يا استاذ احمد كوني شاب في الرياض الحبيبه يعرضني لنفس المشاكل الي تتعرض لها في دخول جميع الاماكن العامه تقريبا ، ساعه اقول يش كذا كل شي ممنوع ما يصير …..الخ
    لكن من الناحيه الثانيه اذا طلعت وشفت بعض المراهقين وسواياهم في الشارع اقول حتى الشوارع كثير عليهم
    الموضوع شوي معقد واللله حتى انا محتار مدري وش الحل

  4. يقول شذى:

    أبو عبد الله وهذا ماحدث معي أيضا أخي كان يريد شراء حذاء في عيد الفطر الماضي
    طلب مني الذهاب معه
    مضحك جدا أن يتطلبني حتى يستطيع الدخول
    ذهبت معه بعد محاولات الترجي لي
    واخرتها صاروا رجالنا مايدخلون مكان الا بحريمهم 🙂

  5. يقول إيمان:

    يحليييييييييييييييييييييييييله …. 20 ريال بس حق الرصيد …. يستاهل !! 🙂 …. زيده

    أصعب شي إنك تتجنب نظرات الناس و أفكارهم اللي مالها أساس من الصحة …. عندي اقتراح … ليش ما اتسوي معارضة عشان يخصصون على الأقل يوم في الأسبوع يكون السوق مفتوح للرجال فقط ؟؟
    يعني حلوة الرفجة في السوق … لكن بعد أحيانا أحلى اتسير السوق اروحك.

    على فكرة …. اتوقع عيال أخوانك الثانيين يطالبون بالعدل و إنك اتشلهم كلهم معاك المرة الياية 😀

  6. يقول .....:

    الحمد لله دولتنا الحبيبة سكتتنا بالاسواق هي المكان الي نقدر ندخله لحالنا
    والا خلني ادخل مطعم زي سبواي مثلا لحالي والا بنك قسم رجالي
    كلن يقوم من مكانه عشان يطردني كأني ذبانة

    لكن احسن مافي الموضوع انك لقيت مشترواتك.. محمد ولد اخوك كله بركه ماشالله D:

  7. و زيد على هذا ان راح تكون بينكم ذكريات مشتركة جميلة
    يعني هالطلعة مكسب من جميع الجوانب
    شكرا اخوي احمد على البوست 🙂

  8. خذ عندك .. انا مستحيل اتسوق مرتاح بالرياض ..
    احس كل العيون تناظرني .. أشك بنفسي (اها بس) ..
    بس تعال وش قصة الكاميرا .. تراني متحطم ابي كاميرا جديده 😦

  9. يعني ما في شي ببلاش ؟؟؟
    توتل قيمه الطلعه 5 دينار
    ما في افضل من التسوق الانفرادي لا تضايق احد ولا يضايقك احد
    لكن بظروف مثل ظروفك يصعب الامر

  10. أبو العبد : سنة ونص .. واجدة يابو العبد ..
    محمد محتل غرفتي الحين عشان الـ DVD معه فيلم يشوفه .. نشب لي

    أبو عبدالله : وش رايك اني ليومك ماطبيت المملكة 🙂 .. ومرة جربت أخش الفيصلية وقالوا عوايل وديورت ..
    تدري ملاحظتك يبي لها موضوع مستقل .. فعلا الحين الرجل صار هو اللي يبي محرم 🙂

    مهند : شف .. سالفة انك تمنع وتوقف وترفض بسبب تصرفات فلان وعلان ولا مراهق .. هذا مو حل .. أجل وبهالمبدأ لازم نقفل الدايري لأن هالمبزرة يسيئون القيادة فيه .. مو حل أبد أبد .. ياخي شف الدول الثانية وشف العالم كيف يمشي .. اسلوب التقفيل والرفض والمنع ماراح يجيب نتيجة .. بالعكس راح يكون نتائجه عكسية .. انت سن نظام وطبقه بحذافيره وجازي من يتجاوز النظام سواء مراهق ولا غيره ..

    شذى : سالفة المحرم حركة 🙂 .. يبي لها طاش ماطاش ذي

    إيمان : اي والله هذا طموحه .. لأن رصيده فيه 100 والرجال يعني مو متحمس كثير يعبي زيادة 🙂
    هو العادة أنا (أسير 🙂 ) السوق بروحي 🙂 .. بس برضه ترى التسوق متعة وأخذ ورد .. مو واجب الواحد بيحله ويخلص .. والدور ان شاء الله جاي على الباقين 🙂

    …. : على كذا نبي نسوي مطالبة بوجود مول رجالي فقط .. مالنا إلا الحل 🙂 .. ولا نقسم الرياض لقسمين .. نص حريم والنص ثاني رجال .. وطبعا راح نطلب النصف الشمالي

    بحرينية : عفوا 🙂 .. وأكيد بيكون بينها مكاسب .. يكفي محمد صار يقلدني في حركاته 🙂

    مشغول : أبد .. رحت طقيت كاميرا جديدة لسوني الحجم الصغير 12 ميجا .. وكاميرتي عطيتها سليمان اخوي .. ياخي كبيرة وبحلت بها ..بعدين أحس أنها أدت رسالتها وخلاص 🙂

    ليال : اي والله طلع التوتل بـ 5 دنانانناااناير 😀 ويستاهل محمد أكثر من كذا
    هو التسوق الانفرادي على قولتك ممتاز وهو اللي اسويه دايم .. بس أحياناً الواحد لازم يستعين بحلول أخرى

  11. تسوق مع أطفال!!
    يمكن محمد (كم) هادئ وما عنده طلبات كثيرة
    لو رحت وعملتها انا مع اولاد اخواني بلاقي نفسي راجعة بكرتون حلويات وفوق هذا نكد وكل شوية عشطان يا خالة جعت يا خالة يا خالة امشي بسرعة اش بك ياخالة متى تخلصي ييييييييييييييييييييييه موال طويل عريض 😀

    احلى شي عندك بروح السوق وحدي
    امشي براحتي وارجع وقت ما ابغى 😀

  12. يقول .....:

    لاتكفىى مانبي نقسم ولا شي
    ماصدقنا بدوا يخفون نشوي نجي نقسم

    كن الاختلاط فيه شي في السوق (|في عهد الرسول ماسمعنا بأسواق مقسمة الحرمة كانت تبيع زيها زي الرجال)

    لازم شبابنا يتعودون ويتأدبون وبناتنا ولا يصيرون مشفح كنهم ماقد شافوا شي

  13. يقول Abdulrhman:

    السلالالام علييكم …

    أهنييك على هالمواااضيع والسوالف الحلوة ..

    ولاتخلـينا من تحديث هالمدووونة ..

  14. بالصراحه تنرحمون لازم يلقون لكم حل
    طيب ليش الاسواق ما يخلون ابواب المحلات الرجاليه على برا يمكن تنحل الازمه شوي

  15. يقول مهند:

    دام ان عندنا شباب مراهق يعتقد ان من حقه يتكلم على العمال او يسبهماو حتى يمد يده عليهم فالقوانين ما راح تجيب نتجه ولو بعد 40 سنه

  16. يقول نوره:

    شوفولكم حل يا جماعة، شو اللي خلى شباب السعودية غير عن باقي دول الخليج غير هالتصرفات .. خلوا كل واحد يعيش حياته بطريقة ، ليش يلزمون أفراد المجتمع على شي معين ، ياربيه ….

    الله يحفظ لكم محمد ووصل له سلاااام مني وقوله زيد الأجرة ياخي..

    ويا بنات فشلتونا قالوا عنا مشافيح .. عقلوا اشوي يه 🙂

    بعدين يا أحمد خل عنك الانانية .. تبي مرافق لك ولا تبيه يتسوق .. بس يوقف يناظرك
    مثل اليوم رحت مرافقة ويا ربيعتي بعد ماطلعنا من الدوام وبالأخير قامت تتصل فيني تدورني 🙂

  17. يقول ليــان:

    يحليله شكله يسمع الكلام
    مااحب أخذ احد معي غير شغلتنا خاصة اذا كنت ابي شي معين وبس
    ولا اروح مع ميمتي ولاخواتي بس بشرط من دون عيالهم…
    أقول ماتعطيني اياهـ بس اسبوع وارجعه لكم
    وتشديد بدخولكم للمجمعات وحتى حنا للمطعم صدقيني بس بالرياض
    ولا عندنا بجدة مثلا عاادي ياكثرهم للدرجة في بعض الاسواق مااحب اروح لها من كثركم..
    يعني اذا تبي تتسوق يااحمد تعاال عندنا
    وثانكس

  18. أسماء : من ناحية هادي .. فهو هادي ومؤدب جداً .. حتى في المطعم ، أحس انه رجال 🙂 ، فعلا في هالجانب ماعمره تكلم .. حتى لما مرينا بجنب الدونات في اكسترا .. قلت كانك تبي قلي .. لا تستحي .. ومع ذلك رفض 🙂

    …. : كلامك صحيح .. بس من يسمع 🙂

    عبدالرحمن : الله يسلمك ولا تخلينا برضه انت من الزيارات الحلوة 🙂

    مذهلة : شكلنا بنرجع على المباسط 🙂

    مهند : لو فيه قانون ولا نظام .. محد قدر يرفع صوته ..لكن الشكوى لله

    نورة : ماراح يكون فيه حل من هالجوانب في المستقبل القريب على الأقل .. ويمكن لسنوات طوال
    بعدين السالفة مو أنانية .. أنا لما اخاوي أحد للتسوق أبيه يونسني .. واستشيره من هنا ومن هنا .. ومافي مشكلة لو خلصت مشواري يروح وين مايبي وانا بمشي معه عادي .. لكن مسألة أننا نتفارق من يوم ماندخل .. وش الفايدة 🙂

    ليان : ايه محمد متربي ويسمع الكلام مرة .. والله يعجبني انه مؤدب يعني ماتخشى ولا 1% انه ممكن يسوي شي غلط ولا يطيح شي ولا يروح منا ولا منا 🙂 ..
    وجدة تستاهل الزيارة .. زمان والله عنها

  19. يقول SaDeEm:

    هلا وغلا .

    مشكلتك تقريباُ نفس مشكلتي لما أروح لـ إكسترا اصير وحيده ..:( اهتماماتي غير عن اهتمامات الوالده أو خالتي أروح لازم اسير ع أجهزة الجوالات والاب توبات والاستديوهات والكميرات أما الوالده العزيزه تفضل قسم الغسالات والخلاطات وإلخ من معدات المنزل .
    ولازم نجري إتصال وينك فيه ..! لـ درجه صرت الآن لو أروح لـ حالي لإكسترا الأمر عندي إيزي وافضل اروح لـ حالي علشان ماارتبط بـ اللي معي لأن الله يهديها أمي لـ دخلت محل والله العظيم أطلعها منه بـ الغصب ماتمل لأهي ولا خالتي 😀 والمصيبه والأدهى من هذا يطلعونك من إكسترا ويودونك سوق أخر ويطلعون من ÷ت السوق ويرحون لـ سوق ثاني ..! والله العظيم اذكر مرة بغيت انجن رحنا لـ سوق طيبة بـ الاول علشان محلات الذهب ثم رحنا لـ حياة مول ونقزنا لـ صحارى نكمل بقية المشوار ..!

    بـ عكس لما أروح مع اخوي إهتماماتنا واحده نروح لإكسترا ونتشاور وشف هذا وشف ذاك وتعليقات ونقاش لأ يمل لكن مانقدر نطلع مع الأخ كل شهر يمكن مره فـ السنة 😦 لـ ظروف أخي —-> الود ودها تطلع كل شهر معه 😀 .

    ياااه حمودي كبر ..! صار عمره 10 سنوات الله يـ الدنيا ، تسوقك مع حمودي فكرة جيدة 🙂 لكن الغريب أن حمودي ماقالك ” عمي متى نطلع !! ” 😛

  20. يقول SaDeEm:

    نسيت اعلق ع قضية شبابنا والأسواق 🙂 ، ع الرغم من التشدد الأمني بـ الاسواق عدم دخول الرجال إلا بـ وجود محرم 😀 إلا أن للاسف اشوف قدامي عينات من الشباب حالهم مؤسف جداً ..
    اتذكر أن سوق المملكة إستحاااله ادخله إلا ومعي أحد ودائماً كل مادخلناها يعترضنا واحد من الشباب عند الباب ويترجى أمي أو خالتي علشان يدخل معانا وكالعاده يتم الرفض 😀 .

    بـ النسبه لـ تسوقكم يـ شباب فـ الاسواق اسمحوا لي اقولكم فـي اوقات معينه لكم لـ التسوق فمثلاً عندك سوق الفيصليه مفتوح صباح لـ التسوق ، رحت الصباح لسوق الفيصليه واشوف والله كثير شباب يتسوقون لـ حالهم وتحسونهم محترمين 😀 وإذا كان وقت المسموح لكم مايناسبكم فيه محلات ع الشوارع وش كثرها يمدحونها غير كذا اتذكر أن تم إفتتاح اول مركز تجاري رجالي يحتوي ع ماركات و ع ماأظن انه بشارع الوزارات … الشهادة لله مادخلتها هالسوق 😐 لكن اسمع فيه 🙂 .

    وبـ النسبه لـ حال فتياتنا للاسف أشوف عينااات كثيره من الفتيات اللاتي تتراوح اعمارهن مابين 25-12 سنة ويكون اول إهتمام لهم لفت الانظار & التعرض ع الشباب أتذكر رحت لـ حياة مول فـ صالات المطاعم انتظر الطلب وجلست ع احد الطاولات انا وخالتي نشوف الاوضاع نطالع بنات والله العظيم توهم فـ المتوسط حاطه لك الطرحه ع كتفاها ومطلعه لك الشعر المجعد واقفه مع 3 بنات في نفس العمر ماغير ينظارون هـ الشباب اللي رايحين وجااين وفالحين بس يدورون :@ وتصارخ هالبنت قدام الدنيا ” آآآه ياخذون العقل” اقول في نفسي ياليت يجونك هـ الشباب السمر اللي كنهم احد العصابات ويتوطون بـ بطنك علشان تعرفين كيف تصارخين .
    عاد خالتي الوضع ماعجبها الود ودها تقوم تأخذ هالبزارين وتوديهم لاهلهم لأن جد رحنا وشفنا بـ اسواق كثيره حالات بس بحياة مول بصالات مطاعمها حالات عجيبه وغريبه والاعجب والاغرب انهم نفس الاشخاص يتكررون لان شفتهم مع خالتي وشفتهم مره ثانيه يوم رحت لـ سوق مع بنات خالي ..!

  21. يقول سلطان:

    وضعت يدك على الجرح

    الصراحة إن الشباب خربوا على بعضهم … يعني إني انحرم شي معين بسببهم

    مره كانت رايح لـ ( ميلانو ) في المملكة أبشتري لي غرض وأطلع
    لكن ذلوني الأمن قالوا معصي تدخل .. إلا بعائلة .. قلت طيب أهلي أجيب على شان
    غرض ما يسوي المشوار علشان تدخلوني … قالوا هذا النظام
    والمشكلة إن أبو شكيب والفنوس يدخلون ولا أحد يقولهم شي … يعني الخراب بس بالسعوديين
    ولا هم منزهين … لكن بالأخير نشبت لهم 😀 … صرت كأني سكيورتي عند الباب
    وهبلوا فيني إلا أمشي .. قلت والله ( يجدون ) خل المشرف يجيني وأنا أتفاهم معه

    المهم وبالأخير دخلت …. مبروك 😀

    ونفس المشكلة في سايتك بالخبر … العزاب ممنوع يدخلون بالعطلة الصيفية بس
    وغير ذلك مسموح

    لكن مهما يصير … تحيا العزوبية 😀

    سلام يا جميل

  22. يقول nOuf.a.s:

    طموحك يقتصر على تعبئة رصيد جوالك بـ 20 ريال >>> 10 سنوات ؟؟

    محزن 😥 !!

  23. اولا ….. اهنئك على هذه المدونة الرائعة واسلوبك الاكثر من رائع في الكتابة
    ثانيا … كنت دائماً اغبط الشباب على طلعاتهم و جلساتهم في coffee shop احس انهم يستمتعون لكن بعد كل اللي قلته من جد رحمتكم

    ثالثا ….. اذا كان الرجل اللي يتسوق لوحده يناظرونه و يشكون فيه , طيب البنت اللي تطلع مع اخوها كيف ينظرون لها الناس

    دمت سالما

  24. سديم : والله مداخلتك وإضافتك موضوع بحد ذاتها لو تسوين عنه موضوع في مدونتك راح يكون شي كويس لأنه حرام يكون مجرد رد فقط ..
    الحريم غالباً فكرهم واحد .. ولا يخون عليك طبعاً والوالدة – الله يطول بعمرها – مايحتاج .. تحصلينها مسنترة عند الخلاطات ولا عند أشياء ماتطلع إلا في العزايم بس 🙂

    التسوق حق الشباب مالنا إلا المحلات اللي على الشوارع .. والحمد لله الرجال مايحتاج له ( فزلكة 😀 ) معروف وش بياخذ .. يعني ياجزمة جديدة .. ياشماغ .. يالبس رياضي .. وكله في المحلات .. مايحتاج مولات .. لا فيصلية ولا بندرية ..

    سلطان :والله انك كفو 🙂 .. بس والله سالفة ان الواحد المحتاج مايقدر يسوي شي وحنا في عصر مثل هالعصر .. عشان ممنوع ولا عوايل ولا غيره .. ، منت عارف تسوي كنترول على السوق مو انك تمنع العالم من الدخول .. هذا دليل فشل ، الحين فيه كاميرات وفي أساليب تقنية تسهل ادارة السوق وتمنع حقين المغازل بسهولة .. بس ذولي مايبون وجع راس

    nOuf.a.s :مو طموحه طموحه عاد .. بس على ايامنا كنا نفرح ترى لما احد يعطينا ريال 😀

    light :
    أولاً : شكراً لك 🙂
    ثانياً : وش وجه المتعة بالله .. راس مالها هو تشوكلت ولا كبتشينو
    ثالثاً 🙂 : ان كانت لابسة زين .. والله محد يقول شي ..

    أبو ريناز : هذا اللي هامك بس 🙂 ؟ هههههههه

    أدهم : الله يعافيك 🙂

التعليقات مغلقة.