شاهد من أمريكا

تقريباً بالأمس يكون قد مضى شهر على تواجدي في مدينة سانتا باربرا الأمريكية في الطرف البعيد من ساحلها الغربي، أو كما يصفها أحد الأصدقاء بأنها المدينة (اللي ماوراها إلا شبك ثم تطيح من الكرة الأرضية 🙂 ) ، في خلال هذا الشهر مررت بالعديد من المواقف والأحداث التي حاولت أن أنظر إليها من منظر مختلف .. غير تقليدي، أحببت أن أشارككم بعض مارصدته .. من الطبيعي أن يكون هناك اختلاف عن مدن أو ولايات أخرى لأن أمريكا قارة ضخمة .. أبلغ وصف لها بأنها كوكب آخر شبيه بالأرض .. بالفعل بلد ضخم ومترامي الأطراف كما يقولون مسافة صغيرة جدا ترصدها في (ماب جوجل) قد تقطعها بالسيارة خلال فترة لاتقل عن سبع ساعات .. عموما نأتي للمتخصر المفيد ..
* طبقاً للمدينة التي أعيش بها لاحظت بأن عامية الشعب مكون من طبقة أعتبرها دون مستوى الطبقة المتوسطة التي بالكاد تكمل الشهر بمدخولها الشهري من رواتب ونحوه، عامة الشعب لا يمكنه شراء منازل مناسبة أو حتى سيارات جديدة فغالبية المنازل رغم غلاء أسعارها مستواها في البناء متدني (أتحدث هنا على وجه العموم)، على الرغم من أن مدينة سانتا باربرا تعد من أغلى المدن في أمريكا وتوصف بأنها المكان الذي لا يعيش فيه سوى الأغنياء لكني لم ألحظ ذلك هنا، صحيح أن المعيشة فيها غالية (غالية من جد .. طفرت ) مما يشكل صعوبة على العرب والمكسيكيين والجاليات الأخرى لاسيما ذات الأصول الأفريقية من العيش فيها ..ورغم ذلك إلا أن عامة سكانها لا أقول فقراء .. ولكن أنسب وصفٍ لهم بأنهم دون مستوى المتوسط.
* رغم أني دخلت أكثر من عشرة منازل لعائلات أمريكية إلا أني لم ألحظ يوماً شاشة مسطحة أو حتى جهاز ديفيدي حديث غالبية الأجهزة لديهم من جيل مابعد منتصف التسعينات وحتى ماقبل موديلات العام 2000، لا أذكر أني شاهدت شاشة عملاقة تستحق المتابعة .. مداخيلهم الشهرية لا تمكنهم سوى من شراء شاشة متوسطة الحجم وعددها في البيت لا يتجاوز اثنين أو ثلاثة فقط !
* يخيل لي أحياناً بأني الوحيد الذي يتحدث بالهاتف الجوال، قلة قليلة فقط تراها تتحدث (وتطق حنك) في المطاعم أو المقاهي والغالبية من الشبان صغار السن، هنا استعمال الجوال مقنن جداً جداً .. ومن النادر أن تجد أحداً يمشي في الشارع وهو يتحدث (أكرر أتحدث هنا من المدينة التي أعيش بها)، .. لأفاجئكم أكثر .. هناك الكثير من مواطني المدينة لا يملكون هاتفاً جوالاً ! .. تخيلوا ذلك .. ليس لأنهم كبار في السن أو نحو ذلك بل أحدهم يحمل الماستر في تدريس اللغة الإنجليزية وهو يدرسني حالياً وعمره لا يتجاوز 43 .. لكنه يقول بأن الجوال لا فائدة له ! .. في الصباح أنا في المعهد وفي المساء أنا في المنزل وإن كنت خارجاً في مطعم أو مقهى أو سوق فلا أريد أي محادثة مع أحد لأن ذلك وقت استمتاعي .
* أكثر المزايا التي لفتت انتباهي هنا أن الشعب لا يهتم أبداً أبداً بالمظاهر، لا أذكر يوماً أني شاهدت أحداً يرتدي قميص أو جينز (ماركة) حتى في لوس أنجلوس (أستثني هنا هوليود وبيرفلي هيلز)، غالبية الملابس التي يرتدونها تصنف من الملابس الرخيصة ولا أتحدث بأسعار المحلات السعودية لأقرب الصورة أكثر .. التي شيرت لا يتجاوز 80 ريال والقميص الذي يتجاوز 150 يعتبر قميص غالي بالنسبة لديهم .. لدي زميل في المعهد اشترى جزمة جديدة بقيمة 100 دولار فأصبح حديث المدرسين في المعهد كانوا يقولون (تخيلوا هذا الطالب القطري اشترى حذاء بقيمة 100 دولار) .. بالعربي جلسوا يتمسخرون عليه لأنه فعل مالم تفعله الأوائل .. طبقاً لحسبتهم.
السيارات .. تلك قصة أخرى، نحو 30% من السيارات تقريباً (حتى في لوس أنجلوس) هي من موديلات مادون العام 90 .. من المعتاد أن تشاهد كابريس 85 أو فولفو (أبو سعد 😀 ) موديل 88 .. ناهيك عن سيارات جنرال موتورز وفورد القديمة .. ولا أحد ينتقص من قيمة سائقها بل أن البنك الذي أتعامل معه حالياً مديره يملك بيوك أعتقد أنها موديل 85 .. الحياة ماشية ولا أحد قال شي 🙂 ، 50% الأخرى دون موديلات العام 2000 أما البقية فهي سيارات جديدة فعلاً لكنها من ذوات (القطع الصغير) كما نقول هنا .. كورلا .. هيونداي .. ميستوبيشي .. هوندا .. لذلك من الطبيعي أن تعلن شركة مثل كرايزلر افلاسها لأن الغالبية هنا يميل للسيارات اليابانية والكورية والأوروبية، الفكتوريا وشبيهاتها مخصصة للتكاسي وسيارات الشرطة .
* النظام أولاً وأخيراً .. ربما أفرد تدوينة خاصة بذلك لكني أعتقد بأن أحد أسباب تفوق أمريكا هو النظام الصارم، سواء من قبل الحكومة أو من الشعب نفسه، جميع الأمور تسير بنظام شديد صحيح أن هناك شواذ ولكن عندما نتحدث بمنظور عام يدهشك مثلاً كيفية ترتيب حركة نقل الباصات في المدينة .. ترتيب دقيق بسير بالثانية، النظام الصارم في المخالفات المرورية لدرجة أن بعض الشوارع تتيح لك الوقوف مجاناً لمدة 75 دقيقة ، مرة عندما استأجرت سيارة وقفت مع أحد الزملاء في مطعم لتناول وجبة ثم انتقلنا إلى مقهى مجاور لمحادثة زملاء آخرين .. تذكرت أن السيارة قد تتجاوز مدتها القانونية .. تخيلوا عندما عدت لأقوم بتغيير الموقف قبل الموعد بنحو 5 دقائق، كانت سيارة المخالفات (المضحكة الشكل ذات الثلاث عجلات) تقف بالقرب منها .. كان الموظف ينتظر حلول 75 دقيقة حتى يضع المخالفة على الزجاج الأمامي .. ولا ويضحك بعد هو ووجهه .. عموما النظام الأمريكي سأفرد له تدوينة لاحقاً بإذن الله.
* الاحترام ملفت للنظر : لنتخيل أن شاباً في مدينة الرياض ارتدى ثوباً أبيض وشراب أخضر وجزمة بنية اللون .. كيف سيكون وضع حينما يدخل على زملائه .. طبقاً الجميع سيلقي النكت وسيكون مثار سخرية، مارأيته هنا أن لا أحداً يلتفت لذلك .. في اليوم الأول شاهدت شخصاً سميناً (جدا جدا) يرتدي تي شيرت (بودي) .. كان يسير في الشارع بشكل عادي ويتحادث مع أصدقائه ويضحك .. وقفت أتأمل .. لم يكن أحد ينظر إليه حتى .. يسير بكل احترام ، لذلك تجد هنا العجائز والسيدات كبيرات السن أحياناً يرتدين ملابس مخصصة للفتيات في سن الثلاثين مثلاً .. شورت أو تي شيرت وكاب .. لا أحد يدقق في تلك الأمور .. لاحقاً وجدت أن الخليط العجيب في لون الملابس لا أحد يعيره أي اهتمام .. في المعهد لدينا مدرس يحظر ببنطلون رسمي وتي شرت سبورت .. أو بنطلون بني وقميص سماوي وجزمة رياضية .. عاااااااااادي جدا .. لأن الناس تحترمك لشخصك ولا تعير ماتلبس أي اهتمام ، لذلك يصبح منظر الطلاب الخليجيين مضحك لأنك تجدهم بتي شيرتات ماركة وقمصان غالية الثمن .. يصبح شكلهم مضحكاً حقيقة بالتأنق المبالغ فيه (مافيه أحلى من البساطة).
* كمسلمين دائماً مانكرر .. (تبسمك في وجه أخيك صدقة) لكننا لا نطبق ذلك فعلاً، هنا يصنف الشخص الذي يقابلك سائراً على الرصيف صباحاً دون أن يبتسم في وجهك ويلقي عليك تحية الصباح بأنه شخص (مو متربي) .. في اليوم الأول لي مع العائلة كانت الأم تقول لي بما معناه (معليش ترى الرجال اللي بيقابلك الصباح عند الحديقة عنده مشكلة لأن زوجته ماتت .. الخ .. الشاهد تبي توضح لي أنه عادي ترى ماراح يصبح عليك) .. قلت لها عادي حتى اللي عندنا في الرياض بطريق الملك فهد الصباح العالم مقفلة معها .. عادي كل أبوانهم ماتوا ههههههه.

كما يقول الشيخ الطنطاوي رحمة الله .. انتهى الوووكت والسلام عليكم ورحمة الله

– ان مانزلت الموضوع حتى ولو ماكمل اليوم .. ماراح ينزل .. شيطان المدونة ماجاء معي جالس في الرياض مدري وش عنده حسبي الله عليه .. شهر ماني قادر اكتب ، يادب تعال انتظرك .. وجب معك نفر مشخول هامور .. يبككي 🙁

36 رد على “شاهد من أمريكا”

  1. أحمد

    أتمنى أن أكون أول من يرد 🙂

    بصراحة الكلام عن أمريكا شيء عجيب، لأنها بهرت ناس كثيرين جداً ، وبعضهم لا يزال متأثراً ، وبعضهم يوظف الجوانب الإيجابية في حياته …

    ولا أخفيك منذ فترة أفكر بأن أدرس اللغة الإنجليزية في أمريكا ، لذلك الله لا يهينك أبي تكتب لي تسعيرة المعهد والسكن وكم المبلغ الي يكفيني لمدة شهر .. خليك حلو أمال واحص هالمعلومات لانه فيه ناس كثير بيسألونك عنها

    أنا ما يثيرني في امريكا ان كل واحد في حاله، ويلبس الي يبي، ويعيش مثل ما يبي ، اما هنا .. لو تطلع من البيت بدون شماغ تشيل هم العالم الي يناظرونك ويستحقرونك ! علشانك خدشت الرجولة

    من زمان عنك 🙁 .. عامل الصب واي صار يحط الصوص أي كلام 🙁 هذاك الاشهب الي في فابيانو يناظرني بعين وهو يحط الكرت علشان احاسب .. و لما يقرا سلطة سيزر يمسك الشجرة الي جنبه ويصيح 🙁

    نبي صور للديره 🙂

    سي يو ليتر >> يعنني قلينزي

  2. اولا شكرا لامريكا خلتك تصحى باكرا،،ثم لك وحشة بجد،،ثم مسألة الاهتمام بالالوان والزي لاحظتها من قبل لايعيروا اهتمام لهذا .اما النظام فحدث ولاحرج ولكن حقيقة لم اتصور الى هذا الحد،قصة الابتسام ايضا استغربتها بحكم ان الامريكان كل واحد على دينه ولايهمه من يقابل ولاكيف يقابل ،مالم تربطه به علاقة،او قول حتى لو ربطته صلة قربة،،ثم دير بالك من انفلونزا الخنازير ،،اخبرا قصة التلفاز والسيارات حقا اذهلتني ،على عكس ما نشاهد في الافلام ،مجتمع غريب ومتشعب كثيرا ،.سلم على صاحبة المنزل

  3. […] “* كمسلمين دائماً مانكرر .. (تبسمك في وجه أخيك صدقة) لكننا لا نطبق ذلك فعلاً، هنا يصنف الشخص الذي يقابلك سائراً على الرصيف صباحاً دون أن يبتسم في وجهك ويلقي عليك تحية الصباح بأنه شخص (مو متربي) .. في اليوم الأول لي مع العائلة كانت الأم تقول لي بما معناه (معليش ترى الرجال اللي بيقابلك الصباح عند الحديقة عنده مشكلة لأن زوجته ماتت .. الخ .. الشاهد تبي توضح لي أنه عادي ترى ماراح يصبح عليك) .. قلت لها عادي حتى اللي عندنا في الرياض بطريق الملك فهد الصباح العالم مقفلة معها .. عادي كل أبوانهم ماتوا ههههههه…. اكمل قراءة بقية الموضوع وعلق على احمد في مدونته […]

  4. ههههههههههههههه ابشر بمشخول هامور و روبيان لاجيتك بعد شهرين لفانكوفر 🙂

    بأذبها عليك من الطيارة و انت تستلمها خخخخخخخخخخخخخخخخخخخ

    الله يعينكم على انفلونزا الخنازير و انا اخوك <<< احسه بأول طيارة راجعة للرياض 😀

    الزبدة يا صاحب القلم اجل الفلبيني اللي بفابيانو يقرا سلطة سيزر و يمسك شجرة اللي جنبه و يصيح حسستني مطعم هندي مو ايطالي هههههههههههههههههههه

    بس والله شهويتني بالسيزر حقتهم يا اخي بطلة اقسم بالله 🙂

  5. ازين مافي سفرتك يا احمد

    ان الثرثره قلت

    النظام في المجتمعات المتقدمه عموماً يبّكي

    وعندك مثلاً ابو ناصر

    طوروه شوي الكنديين

    والدليل إنه يوم الخميس صار يوقف عند الخيمه بالريوس ويدق إشاره 😀

    على طاري الدخل الشهري والسيارات

    احد العوائل اللي سكنت عندها

    كان الابو ماعليه مادياً وكذلك زوجته

    وسألته مره قلت يابيل

    قال : يالبيه

    قلت وراك ماتروح بموترك الاحمر الوردي وتدهفه إثنين ؟؟

    قال مالها سنع !

    اروح بالباص .. وأطق حنك .. ولا أقرأ جريده أوفر لي وأريح لراسي !!

    تفكير حلو .. عندهم وسائل نقل عامه تبّكي ..

    وعندهم وجيهٍ هالصبحيه يالله من فضلك .. تبّكي وتبرق !!

    فوشوله الغلب والسيارات والتركيز .. خصوصاً إنهم ناس يركزون تركيز كامل في القياده ويحسبون لها ألف حساب مهوب مثل ابو ناصر يكتب رساله لسلمان في طريق الملك فهد يقول عساك جيتا ؟؟؟ ههههههههههههههه

    بس ليش ماحطيت صوره يا احمد ؟!

    على الأقل لو صورة 65

    أهم شي صوره

    المهم ضبطت لنا سكن ؟؟

    ترى نبي نجيك ان شاء الله ونجيب ابو الوليد معنا عشان يسلم على 65

  6. في الواقع هذه المعلومات جدا فريده لكن لا استطيع ان استوعبها كماهي (as-is) كأنك تتحدث عن town وليس مدينه , نحتاج الى مثال سعودي أقصد هل هي مشابه في المساحه الجغرافيه جده ام مكه ام الطائف.
    مايحدث لك هناك هو ما يحدث للامريكي عندما يأتي هنا ويجد ان السعوديين (او سعوديوون) هم شعب غير ما يخيل اليهم هناك :):):) , لكن الوضع اختلف الان الانترنت جعلتني اعرف الشعوب واعراقهم (يمكن ان ارى ملابس اي شعب من خلال لقطات الشعب على يوتيوب, لكن لم أرى ما تحدثت عنه:):):)) لكن لم أصل اتوقع هذه البساطه , ربما انهم غير موجودين (او موجودون) على الانترنت, هل لديهم سرعات عاليه من الانترنت ؟

  7. صدقت و ربي يوم كنت في المانيا الحريم يطلعون بكشتهم كنها كدش يعني تشوف شعرها توه مبلل

    يعني الحرمه تسبحت و طلعت لدوامها يعني انا اعرف ان الحريم يهتمون بمظهرهم بس حريم الغرب شي

    بعدين صرت زيهم اطلع بأي لبس ما اعبر كنت اول أتأنق العباية نفس الطرحه و الجزمة شيك و أناظر المراية مليون مرة قبل

    لا أطلع صرت بعدين امشي بشبشبي و و أي لبس ألبسه أطلع لهم به يخب عليهم 🙂

    و تحسب انهم بيناظرون وش لابس و الا بيضحكون عليك و الله و لا يشوفونك كنك ما مريت

    يا زين حياتهم و ربي 🙁

  8. بصراحة أحمد , الأخلاق الجميلة تفتح النفس وتتيح لك أنك تتعامل مع الناس بطريقة حلوة وجميلة , وهادا الشي بحترم الشعب الأمريكي و الأوروبي كلو مشانو , شو أجمل من الأخلاق ؟ . نحن العرب كل همنا إنتقاد الآخرين , و النظر لما يلبسونه أو لطريقة أكلهم لكي تكون كل نكاتنا عليهم مع الأسف الشديد . وكذلك لا تسأل عن النظام لدينا .
    أتمنى لك التوفيق أحمد . وصدقني أنني أستمتع عندما أقرأ تدويناتك الأمريكية , وإزا الشيطان ما لحقك , إشتريلك شيطان من أمريكا يمكن يكون أصلي أكتر من اللي هون 😀 .

    أدهم

  9. يعجبني في الشعب الامريكي انفتاحيته وبشاشته واجتماعية اهله بعكس الانجليز……
    استمتع بكل ماهو حولك هناك فهم شعب العجائب ..
    تمنياتي بالتوفيق..

  10. Salam 3lekum

    it will be amazing life experience 4 u , i thought ur in US for fun , why u chose this city for study ,
    Take care from swine flu , its therein NY as i hear that people in 2 coming days will avoid going to US or Mexico , u can go back home before it 2 late may after some few days in KSA they will not enter you .
    here in uae they studing stop Mexican or any people came from us or mexico

    be carful
    yes as Mr.penamico we need some photos 4 the city
    at least we can imagine the fashionable people their (al Kashkheen

  11. هلا احمد ،

    وأخيراً أتحفتنا بهذه التدوينة 🙂 ،

    يا زين البساطه لمظهرك عندهم تحترم لشخصك لا لمظهرك وعندنا العكس تماما ً ..

    تقول النظام عندهم صارهم والنظام عندنا لا يمشي الا على المساكين الذين لا يمتلكون واو …

    ونقول ليه حنا في العالم الثالث …

    فقط تمنيت ان الوضع يصير عندنا زي ما هو عنهم …

    موفق احمد ،

  12. مرحبا أحمد

    أجل أهل سانتا بربرا عايشين في راحة بال وَ لا أحد يلتفت للثاني عقبالنا يااااارب .. أجل أختي تاخذ جوالي معها للمعهد وَ كل ما رجعت للبيت تقوللي فشلتيني انتي و جوالك الشايب كل الناس جوالاتهم جديدة ( مالنا وَ مال الناس ) .. طيب أهم شئ الهدف من الجوال

    السؤال ليش اخترت سانتا بربرا بالتحديد 🙂 ؟

  13. يارب ترجع بالسلامة وانت زي البلبل بالانجليزي … اهم شي ترجع !
    انا يا احمد ما اعرفك الا بهالمدونة اللي خسرتني وزادت فاتورة جوالي كل يوم اشيك على المدونة والقى كلش على حاله .. الين اليوم انبسطت ورحت امخمخ على هالتدوينة العلمانية….. 🙂
    الله الله بالصور وانحش عن العرب والمضغوط كانك تبي الفايدة

  14. ماشاء الله فعلآ حسيتهآ تجربة تستحق التجربة 🙂
    يمكن الواحد يستفيد من هذي الأشيآء اكثر من استفادته من الدرآسة بحد ذآتها ..!
    بس شي يحزن انك تلقى أشيآء عندهم هي من صميم ديننآ لكنهآ للأسف لها من التطبيق والاحترآم عندهم أكثر مننآ ..! 🙁
    آخر شي واهم شي اسمع كلآم اوبامآ وغسّل يدينك كل شوي 🙂
    الله يكفيكم شر هالانفلونزآ ويردكم لأهلكم سآلمين ..

  15. معلومات رائعه 🙂

    وصحيح كما قلت اجمل مافي الامر لديهم اهتمامهم بشخص دون المظهر

    وعدم ارتباطك مع المجتمع او الجماعه من حيث الاراء او غيرها مثل مجتمعنا الي ماشيه فيه

    الكل انت معهم يعني مع الخيل ياشقرا 🙂

  16. تفرض علينا أخوي أحمد أن نرفع لك الطواقي والشمغ ، تحليل متميز و قراءة دقيقة للشعب المتفوق (( الأمريكي )) ، تسلسل بارع ، بل وضعتنا في الصورة وماأجملها من صورة ، وفقك الله ،

    دمت بود
    والجني ، أنا يوم السبت أبكون بالرياض ابرسله بالـDHL

  17. ابطيت علينا الله يهديك
    امريكا ارض الاحلام ناس تحترمك وتحاول تساعدك باي طريقه كانت الا جوازاتهم معقده بشكل
    بس انشالله ترجع تكتب بالانجلش مواضيع
    شد حيلك الله يوفقك

  18. بــدري يا عم 🙂 !
    طبيعي جدا أنك تتأخر في التدوين, أتوقع أن التدوين ما خلق إلا للي عايشين في السعودية لدرجة أنك في اليوم يمكن تدون 3 تدوينات ما تقول لا ..

    عموماً بخصوص الموبايل, فصدقت الظاهر ما في شعب دولة في العالم يهذر بالجوال كالشعب السعودي, 50 دقيقة كيف الحال و كيف الوالد و الوالدة و الباقي وش سويت اليوم و وش بتسوي بكرا, عشان كذا يا رب تزيد تكاليف المكالمات ونقلبها SMS والله بيصير تطور عجيب في الدولة 🙂 يجربون على مسؤوليتي ..

    أما عن اللبس , فعادي جداً, لدرجة أنك تستحي تلبس لبس أنيق حبتين تخاف يقولون الحمد لله وش يبي مشخص العم و جاي المعهد 🙂

    وبالنسبة للسواقة أحمد ربك أنها يسار ولا لو يمين صدقني في غرامة عامود إنارة لاقطتها الكاميرا بتوصلك ع البريد 🙂 !!

    بالمناسبة حبيت الحكيم القائل
    [كل من يفكر في أن يأوي إلى الفراش قبل منتصف الليل فهو حقير]
    :mrgreen:

  19. اقتناصات رائعة يا أحمد، وبصراحة باين إنها تجربة حلوة بالنسبة لك، الله يوفقك.

    بالنسبة لي أتوقع لو تشوف مدن كبيرة ممكن يكون الانطباع مختلف، مجرد توقع بس.

    ترجع بالسلامة 🙂

  20. ابو حميد اول شي الحمد لله على السلامه .. ..

    ثانيا تراني ادمنت مدونتك << من فتره اخش واتعيجز ارد لكن اليوم تهورت

    المهم احمد لاتبطي علينا وانتبه لنفسك مع اني جاني احساس على هالمدح اللي

    مدحته لهالام الامريكيه انك بتخربه وبترجع للرياض وانت معرس عليها هههههه
    عاد خل نشوف اذا جت و شافت غبرات الرياض وزحماته وهالمكشرين
    هي تضحك بوجهك الصبح ولا تصفقك باكبر قدر هههههههه

    ترجع بالسلامه ان شاء الله ابو حميد

  21. يخيل لي أحياناً بأني الوحيد الذي يتحدث بالهاتف الجوال، قلة قليلة فقط تراها تتحدث (وتطق حنك) في المطاعم أو المقاهي والغالبية من الشبان صغار السن، هنا استعمال الجوال مقنن جداً جداً .. ومن النادر أن تجد أحداً يمشي في الشارع وهو يتحدث (أكرر أتحدث هنا من المدينة التي أعيش بها)، .. لأفاجئكم أكثر .. هناك الكثير من مواطني المدينة لا يملكون هاتفاً جوالاً ! ..
    (اما العالم الي عندنا شياب شباب مراهقين مراهقات بزارين خدامات ,كلو…)؛

    أكثر المزايا التي لفتت انتباهي هنا أن الشعب لا يهتم أبداً أبداً بالمظاهر، لا أذكر يوماً أني شاهدت أحداً يرتدي قميص أو جينز (ماركة) حتى في لوس أنجلوس (أستثني هنا هوليود وبيرفلي هيلز)، غالبية الملابس التي يرتدونها تصنف من الملابس الرخيصة ولا أتحدث بأسعار المحلات السعودية لأقرب الصورة أكثر .. التي شيرت لا يتجاوز 80 ريال والقميص الذي يتجاوز 150 يعتبر قميص غالي بالنسبة لديهم .. لدي زميل في المعهد اشترى جزمة جديدة بقيمة 100 دولار فأصبح حديث المدرسين في المعهد كانوا يقولون (تخيلوا هذا الطالب القطري اشترى حذاء بقيمة 100 دولار) .. بالعربي جلسوا يتمسخرون عليه لأنه فعل مالم تفعله الأوائل .. طبقاً لحسبتهم.

    (احنا هذا مو يتمسخرون عليه لااااااا يحطونه فوق روسهم)؛

    موفـــــــــــــق يابو حــــــــــــــــــــــميد…

  22. جميل ماكتبت هنا يا أحمد ..

    حسك الانساني عالي جداً ياصديقي .. وأسلوبك في التدوين آسر .

    بانتظارك دائماً ياجميل

  23. أحسن مافي الغرب بساطتهم..تواضعهم .. واحترامهم للشخص اللي جدامهم مهما كان مستواه.. !!
    أيام الجامعة كنا ندرس نظريات العالم noam chomsky في علم اللغة .. أرسلت له ايميل اطلب منه المساعدة في موضوع بحث في نفس المجال .. وكان الرد سريع جدا!
    دكاترتنا نطرشلهم أسئلة عن البحوث والواجبات .. ولا يعبرون احد!

    مادري شايفين نفسهم على شنو يا حظي؟

    ترجع بالسلامة،،

  24. مرحــــــــــبى

    صراحه حامه كبدي وش دعوى مافيه اهتمام باالمظهر عاد مو لهذه الدرجه نبي اخلاق ومظهر يفتح النفس(وكشخه) الدنيا فانيه مافيه اشكاليه اذا اجتمعواا

    وبعدين تصدق احسهم بخلاء مو فقراء اومااا ماعنده جوال وش دعوى

    تيك كير

  25. الله و أكبر يا أبو حميد رحتا امريكا و نسيتنا ..

    من زمان فاقد تدويناتك ! وما اشوف لك شي ! قلت الرجال يا إنه حب له شقراء ولا بعيد عنك خنزير عطس في خشته 😀

    و سالفه الجوال ! والله إكتشفت إن أكثر شركات الجوال الرابحة في العالم شركاتنا ! ولو يفكون أبو ساعتين ويقفل كان علوم من الأرباح 😀

    ربعنا وهو في السياره يرسل رساله .. و أنا أولهم أتوتر و أنا امشي ١٦٠ 🙂

    بحفظ الله يا أبو حميد ولا تطّول الغيبه و حشتنا والله ..

  26. @ صاحب القلم :

    هلا بصاحب الأول والأخير .. هلا بسري المكنون في عـ**** .. كويس نكون نعرف احد هناك .. ماتدري عن اللي جاي

    تبي تدرس في أمريكا ؟ .. شف ما أقدر اعطيك فكر معين لين أكمل ستة شهور على الأقل .. تخبر الشهر اللي راح دفعت واجد بصراحة غير روحتي للوس انجلوس ولاس فيجاس .. بس اتوقع في متوسط 12 ألف ريال شهريا شاملة تكاليف الدراسة والسكن والمصروف اليومي ، هنا أقل شقة أو استديو تحصله مايقل عن ألف دولار .. يعني حول 4000 ريال بس سكن حتى السكن مع عائلة مو بعيد عن هالمبلغ لكنه على الاقل يضمن لك وجبتين (فطور وعشاء).
    صب واي هنا الوضع مختلف .. على الأقل مافيه وجيه تسد النفس زي حقين فرع حي الملك فهد .. هنا تبسم ووجيه تبرررق .. على قولة واحد من الشباب اخاف انسى واضحك واطلب خنزير ..

    وش اخبار موضوع السفارة وش عنده ما انكتب للحين ؟ خخخخخخخ

    @ ميسي : مبروك السداسية التاريخية .. تبكي 😀 ، انفلونزا الخنازير نسمع بها ولا نراها ، هنا في هذه المدينة لا أثر لها إطلاقاً ولا نعرف إلا عند دخولنا النت أو مشاهدة التلفاز ..

    سعيد بتواصلك

    @ خوش واحد : أوووه .. تسوي خير والله .. بس عاد بتنزل قبل يعني مايمديك ..

    @ يزيد : ههههه وش دعوى والله لو اني اسولف فوق اذنك خخ
    ههههههههه أما أبو ناصر يكتب رسالة .. ياحبيبي لهالدرعاوي .. تدري مرة كلمني وهو في الاثنينية الشهيرة 😀 يعني في السويدي وأنا في الدوام بأقصى شمال الرياض ويبي نتواعد حول طريق الملك عبدالله .. أنا تخبر قريب فقلت له كم يبي لك .. قال أبد عشر دقايق خخخخخخخخخخ الكابريس يشتكي هههههههههههههههههههه من السويدي للمحمدية في عشر دقايق هذا لو أقولها لواحد هنا كان ينجلط ، يابن الحلال تدري مرة ماسك خط 3 ساعات والعالم والله انها ماتتعدى 60 كلم .. قسم بالله شي يبكي ..

    الصور واجد وان شاء الله قريبا انزلها .. 65 اموره زينة بس عاد صعبة الصورة رغم ان الصورة موجودة .. ابو الوليد والله لو يجي نص ساعة اقسم بالله ينجلط .. الحين يخق مع البنات اللي يحضرون في شاعر المليون ههههههههههه لو يجي هنا وش بيسوي ؟

    شي يبكي وزي ماقال ابو ناصر .. كل يوم والثاني أردد ( اللهم عاااافنا )

    @ daif : لا يمكن تشبيهها بمدينة سعودية طبعا من الكثافة السكانية لا تصل ولا حتى 10% من سكان مدينة جدة لكنها من ناحية جغرافية كبيرة الحجم ومتوزعة لعدم وجود مناطق تجارية أو مبان تجارية .. أي أغلب المبان هي بيوت ومساكن تقليدية .. سانتا باربرا يمكنك أن تقطعها من شمالها لجنوبها بالسيارة في ظرف يتراوح مابين 30 دقيقة إلى 40 دقيقة تقريبا لكن كما قلت هي متوزعة على مساحة كبيرة لانها في منطقة مابين الجبال .. والمحيط .
    من خلال الأشخاص الذين تواصلت معهم اكتشفت ان الانترنت لا تمثل هاجساً كبيراً بالنسبة لهم .. ايميل وحجز فنادق ونحوه ، الشاهد لم أجد شخص – حتى الان – يقضي ساعة او ساعتين على الانترنت لمجرد المتعة او التصفح ..
    جرب وابحث في جوجل عن اسمها وشاهد الصور santa barbara

    @ نوفة : ههههههههه نفس الشعور .. أول ماجيت كنت أفكر وش ألبس تي شرت ولا قميص .. ولا وشلون الجنز ههههههه قلق بصراحة .. من تالي صارت الامور تساهيل اسحب أي شي ورووح .. بس عاد مو لدرجة خبط لزق مثل مايقولون بس في النهاية تطلع بشكل مقبول .. الحرص الواجد ماراح يسوي شي

    @ adham : هههههههه حلوة اشتري شيطان .. يله بكرة طالع أتسوق لعلي ألقى شي منا ولا منا ، بس آخاف ألقى شيطان داشر .. عاد هذا مانبيه ، نبي شيطاننا السعودي المؤدب وش حليله

    @ أبرار : الانجليز من مفهوم عام لا أحب طريقة كلامهم ولا أتقبل سماعها .. لكني لم أتداخل معهم حقيقة ..
    الشعب الأمريكي رائع جدا وفرندلي بشكل لا يمكن تخيله ..

    @ sara_1982 : اخترت هذه المدينة لعدة اسباب أولها رغبة في مدينة صغيرة هادئة فيها جبال وفيها شاطئ .. وتكون طبقة السكان راقية والحياة فيها بسيطة بلا ازعاج .. ومشاورة الأصدقاء كان لها دور كذلك .. والحمد لله أعيش في سعادة لكن ذلك لا يعني بأني أنصح الناس بالتوجه إليها .. لكل له ذوقه وفكره .. بالنسبة لي أحسها كالمدينة المفصلة تماماً لأعيش فيها ..
    الصور إن شاء الله قريباً .. يوجد لدي على جهازي .

    @ خالد : اييييه ياخالد النظام هنا قصة ثانية .. النظام قوي ودقيق لدرجة أنك تود العودة إلى اللانظام مرة أخرى ههههههههه
    تدري أمس طلعنا لزيارة مكان .. المدرس في المعهد راح بسيارته وطلب من الطلاب التوجه بالباص .. ثم أبدى اعتذاره لعدم تمكنه من أن يجعل أي أحد من الطلاب من مرافقته في سيارته لأن التأمين لديه فقط على السائق ولا يوجد أن يدخل في أي مشكلة قانونية فيما لو صار هناك حادث .. خخخخخ والله اني ضحكت .. مادرى العالم عندنا لما يصير حادث يدق على خويه اللي عنده تأمين على الرخصة يجي يسوي نفسه هو اللي صادم .. عادي الامور ماشية 😀

    @ Light : هلا وسهلا نور .. من جد راحة بال وروقان بعد ..
    بعيد لك سباب اختياري من نفس ردي على تعليق الأخت سارة :
    ” اخترت هذه المدينة لعدة اسباب أولها رغبة في مدينة صغيرة هادئة فيها جبال وفيها شاطئ .. وتكون طبقة السكان راقية والحياة فيها بسيطة بلا ازعاج .. ومشاورة الأصدقاء كان لها دور كذلك .. والحمد لله أعيش في سعادة لكن ذلك لا يعني بأني أنصح الناس بالتوجه إليها .. لكل له ذوقه وفكره .. بالنسبة لي أحسها كالمدينة المفصلة تماماً لأعيش فيها ”

    @ منصور : هلا والله منصور سعيد بتواصلك .. لأوفر عليك الكلفة أنصحك بالتسجيل في القائمة البريدية على يسار المدونة .. يصلك الموضوع عندما أكتب شي جديد ..
    أحرجتني بكلماتك ومجاملتك .. بس وشلون انحاش عن المضغوط .. هنا ماعندي شي أبد ، مافيه شي يذكرني بالسعودية إلا كنتاكي وصب واي ..
    بس والله مانيب راعي رز ومكابيس .. لكني أشتهيها من وقت للثاني .. عندنا طالب سعودي كل يوم يعزمني لأنه يطبخ لكني صامد ولا رحت ولا مرة لأني داري لو أروح .. خلاص بقلبها خبيتي .. سوني ورززز وقهوة وسكري .. ماسوينا شي يعني .. الحين ماسكة على صحن قلابة من القرموشي وخبز تميس وكاس شاي حليب .. ياااااربيه

    @ Najd : المرض هنا في المدينة مالها أي أثر – حتى الآن – ولا ندري عنه بصراحة إلا من مواقع الصحف السعودية والمنتديات 🙂 .. طبعا هنا القنوات الإخبارية تتابع لكن أقصد المدينة والشعب .. محد جاب خبره ..
    سعيد بحضورك

    @ lemonh : شوووي مع الخيل ياشقرا .. حنا تندمج معهم في ظرف قياسي ويعتقدونك منهم
    رغم اني أشهب ألهب على قولة القايل إلا انه مرة عند محطة الباصات جاني واحد أشقرر أحمر – خلق وفرق بيني وبينه هههههههه – يسألني عن باص رقم كم اللي يودي لشارع مالبز .. قلت له يابن الحلال زين أعرف رقم باصي هههههههه الشاهد انه حتى مايدري انك غريب مثلا ولا زائر .. يتوقعك من أهل البلد أو على الأقل مكسيكي 😀

    @ ماجد : ياااااااخي الله يخليك ويبقيك .. شكرا جزيلاً ..
    الجني اكتشفت انه ساق موتري في الرياض .. شكله متورط لاني مقفل عليه في الكابريس .. بس ولو شكلي بحتاجه لما أبي أصدم أحد وانا هنا ..

    @ محمد : الجوازات معقدة ماينلامون وانا اخوك .. دامه 19 واحد غيروا العالم وكلهم من ربعنا .. طبيعي يدققون زود بس والله انك تتدعى المطار ولا يصير لك أي شي .. مرررررة ياشيخ كأنك في الرياض 🙂

    @ أقرب البعيد : هههههههه شفت ياحسن وانا ألمح لك من زمان ليه ماتروح أمريكا ..كنت مخطط ألاقيك هنا

    الأقوال التي تجدها تحت قال حكيم ليست صادرة مني .. وهذه الجملة تحديداً مصدرها هنا :
    http://www.elaph.com/ElaphWeb/Culture/2008/1/293279.htm

    @ ليزر : هلا والله بالشيخ ليزر .. شفت لوس انجلوس ولاس فيجاس – والعياذ بالله 😀 – بس برضه نفس الرؤية تقريبا – إلى حد ما – .. يمكن تختلف لاس فيجاس انه مافيها سكان .. كلهم سياح

    @ majed :وويييييييييين أعرس عليها .. هي إن قالوا رجل في الدنيا ورجل في القبر ، تبي الجد مو للدرجة ذي والله وفقني والام دكتورة ومؤلفة كتب .. من قدها 😀

    الحين باحل بسالفة انها تبي تجي الرياض .. بالله وش أسوي لها ذي .. وين أوديها وين أحطها .. بنطلها في اسواق حجاب بالنسيم وانحاش

    @ candy_girl : تدرين عاد لو أقول لك وش أنواع جوالاتهم ، الغالبية من الاجهزة أم الشاشات الابيض والاسود زي الفيصلية وطقتها

    والله ماربح النوكيا غيرنا .. وانا أول واحد

    @ أبو الدراري : هههههههههه غريبة أول مرة ترد على موضوع مافيه أحلام مستغانمي ..
    تدري كتابها الى الحين ماكملته من يوم وصلت 🙁

    @ كيفي كويتية : ربعنا الظاهر مو مايعبرون احد .. تحصلينهم مايعرفون الباس وورد حق الايميل

    (((مادري شايفين نفسهم على شنو يا حظي؟ )))
    هههههههه حسيت اني أشوف مسلسل كويتي .. جازت لي هالجملة .. الجملة (حقتكم خخخخخخخخ) والخليج حقنا والسعودية حقتنا ههههههههههه

    سعيد بتواصلك اخت كويتية .. وشدي حيلك في المدونة ولا شيطان الكتابة ماوصلكم في الكويت ؟

    @ غيوم الصحاري : حامت كبدك .. والله لو تشوفين لبسهم وكشختم ولو انها رخيصة إلا أنها تطلع في أحلى صورة .. السهل الممتنع .. بدون تكلف وشي مبالغ فيها وسطول من الأصباغ ..
    هنا مو بخل .. بس الأحوال المادية مو مثل مانعيش .. يعني يادوب على قولت أهل جدة .. يادوب الراتب يغطي مصاريف الشهر

    @ عبدالله أباحسين :
    هلا والله بالسديراوي .. هين الحب مابوه حب .. مانيب أعترف به .. أوكي صح كل صبح نوصل وحنا دايخين من الباص بس ولو .. ماهنا حب

    يابن الحلال أنت تتوتر .. وش تقول على اللي يكتب خبر ههههههههههههههه وماسك الدائري وكل شوي العالم تضرب فرامل ..

    بس هديت اللعب عقب فيلم ويل سميث .. خفت

  27. ولننظر في ما قاله الامام محمد عبده عن أهل

    الغرب بعد ان عاد من زيارة ديارهم: «وجدت هناك اسلاما بلا

    مسلمين، وأجد هنا مسلمين بلا اسلام»

  28. ياويل تسبدك بس يا أحمد ….

    والله يانا قريت تدوينتك أكثر من مرة وكل مرة أنقهر ويضيق صدري …

    لي كم يووم جاي من الدمام والله يانا شفت اللبس والناس اللي ودك تقشهم كلهم وتجدعهم بأحد الصحارى هناك وتنساهم …

    للأسف حنا شعوب نهتم بالمظهر وإلا الداخل بوووووووو

    تكفى كثر من التدوينات خل نشوف وننقهر …..

    على فكرة ….

    اليوم كنت مع طلابي بالفصل نتناقش عن تدوينتك وعن حياة الشعوب هناك …

    الله يسامحك بس …

    راح علي درسين وحنا نسولف 🙁

  29. عجيب انبهاركم بالغرب حتى التخبيص في اللبس عجبكم منهم
    وتخلفهم في التكنولوجيا عجبكم بعد
    لو انت رايح لدولة متطورة كان قلت برضو يازين تطورهم وانتقدت مجتمعنا انه مايعرف شي

    نلبس احسن الملابس ونواكب التطور ونعيش حياتنا ايش المانع

  30. عجيب انبهاركم بالغرب حتى التخبيص في اللبس عجبكم منهم
    وتخلفهم في التكنولوجيا عجبكم بعد
    لو انت رايح لدولة متطورة كان قلت برضو يازين تطورهم وانتقدت مجتمعنا انه مايعرف شي

    نلبس احسن الملابس ونواكب التطور ونعيش حياتنا ايش المانع

    http://al3ez.org/dlil

  31. هلا باالغالي اخوي احمد القلق
    لك وحشة ياالقلق
    الحين يخوي دايرن وداخل 10 بيوت وش اللي حادك مو اهم شي اللغة
    وش خليت لعين السيح من الطربقة انا ماعلي من موضوعك كله
    بعدين وين الصور ورى ماتنشر صور تبين هاالبيوت اللي تدخلها واساميهم والقبيلة اللي ينتمون لها
    لازم دليل ولا يكون كلامك فية ؟؟؟؟
    اية احمد وانتبة مثل ماقالت ساره من انفلونزا الخنازير واللي جايين من المكسيك تقعد تحضن فيهم ولا كل شوي سلام او من بعض الدول المجاورة طق الكمامة ولا تلطم بشماغ وشف يقولون شي ولا لا

    شد حيلك الخيمة مشتاقة لك سلامات؟
    الجية جاي انا وابو ناصر ويزيد ومسعروووووووه وشعشع
    نبي سكن راهي ومركب سياره فاخر لكل واحد سياره تبكي
    الفيزاء طلعت ابشرك
    اجلس في الضلال لحد ما نجي
    تمنياتي لك باالتوفيق
    دواس 9 صديق احمد القلق

    it will be amazing life experience 4 u , i thought ur in US for fun , why u chose this city for study ,
    Take care from swine flu , its therein NY as i hear that people in 2 coming days will avoid going to US or Mexico , u can go back home before it 2 late may after some few days in KSA they will not enter you .
    here in uae they studing stop Mexican or any people came from us or mexico

    be carful
    yes as Mr.penamico we need some photos 4 the city
    at least we can imagine the fashionable people their (al Kashkheen

  32. تنفع تكون دليل سياحي يا أحمد…
    اعطيت للقراء فكرة جيدة عن سانتا باربرا… وميزة هذه الفكرة أنها صادقة…
    نتمنى لك التوفيق…
    و شكراً لك

  33. سميي
    ادعو اللي ان تكون من السالمين من حرائقكم
    لي اسبوع واصل دي سي وأي اخبار احطها القى حرائق في ديرتكم !!
    كلها يقولون بفعل فاعل !!
    اي نظام ان تتحدث عنه انتم وبزارينكم اللي يولعون بالبيوت 😛
    امزح

    مره ثانيه
    اتمنى ان تكون من السالمين

    تحياتي

  34. السلام عليكم ورحمة الله وبركاتة

    بصراحة يا أحمد مستغرب سفرتك هذي لدراسة و لا لغة انجليزي ,,, يعني ها المره ماخليتها سياحة و أستجمام ســــــــــــــكــــــــــــن خصوصاُ بعـد روتين العمل والأوهم اليومـــــــــــة

    أنا متابع و مندمج مع ما كتبت و ياليت تكمل
    11

  35. عيشه سهله بسيطه ورائعه المفروض حنا كمسملين نعيشها لكن للاسف الأغلب مسلمين بالأسم

    أحمــد .. تدوينه رائعه

    وملاحظات حلووه

    أنتظر الباقي بشووق أمـا شيطانك أعتقد حان وقت استجمامه خخخ

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *