مذكرات شخص صحى باكراً في الرياض

أتذكر قبل سنوات .. ربما حين كنت على مقاعد الدراسة الثانوية، قرأت يوماً للكاتب في جريدة الرياض عبدالله الجعيثن  قرأت له مذكرات يوم راجع فيه كتابة العدل بمدينة الرياض في الثامنة صباحا .. وذكر في مقاله أنه منذ أن تقاعد عن عمله الحكومي منذ سنوات طوال وهو لم يعتد على الخروج في معمعة السير في صباح الرياض .. أذكر أنه كتب مشاهداته ومدى اندهاشه للازدحام الكبير في شوارع الرياض عند السابعة صباحاً، حقيقة وأنا في ذلك الوقت كنت أقرأ له وأنا أغبطه لأنه لا يضطر لأن يصحى قبل السابعة مثلنا .. بل ينام حد الشبع .. (ويتبطح 😉 .. لين يقول بس) .. كما نقول بهلجتنا النجدية.
دارت الأيام والسنون .. وأصبحت وظيفتي ظهرية – إن جاز التعبير – فاليوم الذي أخرج فيه قبل العاشرة صباحاً هو بالنسبة لي يوم باكر جداً وأكافئ نفسي فيه بوجبة إفطار .. لذلك لم أحس ولم أتخيل كيف يكون عليه حال الرياض مع دوام المدارس.
قبل نحو اسبوع تأملت رخصة القيادة الخاصة بي فاكتشفت أنها على مشارف الانتهاء .. ولأني انسان نظامي (:D ) فكرت بتجديدها مباشرة وعلمت لاحقاً أن من شروط تجديدها هو إصدار الهوية الوطنية الجديدة .. فقررت في نفسي بأن أختار يوماً أصحو فيه باكراً مثل بقية المواطنين وأقوم بمراجعة إدارة الأحوال المدنية بمدينة الرياض .. أو بمعنى أصح في قلب مدينة الرياض.
قبل أن أدخل في تفاصيل القصة أذكر بأنه لا تربطني بالدوائر الحكومية أية علاقة وبالكاد خلال السنوات العشر الماضية دخلت مبنى المرور لتجديد الرخصة ومبنى الجوازات لتجديد الجواز ومبنى (أحوال ثادق) لتجديد البطاقة .. لذلك فأنا – ولله الحمد- أهنأ براحة البال والسعادة على الدوام ! .
أعود لتفاصيل القصة وأقول بأني خرجت من المنزل عند السابعة والنصف .. وتفاجأت بأن إزدحام طريق الملك فهد يبدأ أقصى شمال الرياض !! .. وتحديداً بالقرب من هايبر بندة .. أول كلمة قلتها في نفسي (ياااااااساتر) .. أنا أتذكر أن الازدحام يبدأ من نفق التحلية أو في أسوأ الأحوال من نفق العروبة .. لكن أن يبدأ التكدس من أقصى الشمال فهذا أمر غير مسبوق بالنسبة لي .. كنت في البداية أعتقد بأنه مجرد حادث مروري لكني وحين دخلت المعمعة .. علمت بأن هذا هو حال الطريق يومياً .. فحمدت لله كثيراً وشكرته على نعمه التي لا تعد ولا تحصى (وأكرر هنا .. يالله لك الحمد والشكر) .
لم أكن لحظتها أعيش بمزاج (رايق) لكوني لم أعتد على الخروج والقيادة في مثل هذا الوقت .. لكن الفرح والسعادة بدت تتسلل إلى داخلي منذ أن بدأت أتأمل حال الناس (المقفلة معها) .. منهم من (دق اللطمة) .. واعذورني على ميلي للحديث باللهجة المحلية هنا 🙂 .. ومنهم من لا يمكنه التركيز في القيادة فأخذ بالسرحان والتنقل دون علم بين مسارات الطريق .. يمينا ويساراً .. وبقية قائدي السيارات الغاضبين يعملون جاهدين (بعصبية) لتنبيهه .. بدأت حينها أميل لفتح شباك السيارة رغم الغبار ..وأتأمل حال السيارات وأضحك .. في البداية كنت أخبئ ضحكتي وراء يدي .. لكني لم ألحظ أن احداً يحس ببقية السيارات فأصبحت أتأملهم وأضحك .. عيني عينك ! وأنا أعلم بأن هناك من يشاهدني ويستائل (وش هالسكران اللي مروق على الصبح) .
مر الوقت بسرعة واقتربت من وسط المدينة، بحثت عن مواقف مؤمنة لأوقف سيارتي فيها لأني أعلم (بدوشة) منطقة وسط البلد وزحماتها الكبيرة .. لذلك لن يضير إيقاف السيارة في أي مكان وإكمال المشوار بسيارة تاكسي أقلها أضمن بأني سأتوقف عند بوابة الأحوال الرئيسية دون هم البحث عن موقف .. والأمر لن يكلف سوى 10 ريالات ، بمجرد أن أوقفت السيارة وقف بجانبي تاكسي (كامري) يقوده سعودي بدوي خمسيني أو ربما (ستيني) .. فتحت الباب دون مشاوره وقلت (اطلع ياسطه على الأحوال ) ! .. من جدكم بقول كذا ؟ (الأحوال الله لا يهينك) 🙂 كانت عبارتي الأولى .
الضحك والسعادة كانت حاضرة في هذا التاكسي .. السائق كان يستمع لإذاعة الرياض التي كانت تبث البرامج والفواصل الموسيقية بذات الطريقة التي كنت أستمع إليها في طفولتي حينما كان شقيقي يوصلني للمدرسة، نظرت للرجل المتعب وهو يتحمس لمتابعة المرايا الجانبية كي يتجاوز السيارات المتكدسة أمامه ويده اليمنى تجيء وتذهب بناقل الحركة اليدوي .. كان مظهره يوحي فعلاً بالتعب والأسى .. يكفي أنه كان يضع شماغه مطوياً على كتفه وهو يردد (هالغبار متى يحل عنا ؟) قلت له وأنا أضحك .. بل أفضل .. لعله يزيد .. لأنني أتفائل دوماً بإذن الله أن مصير أهل الرياض الجنة إن شاء الله .. لأن رحمة الله واسعة فهو لن يعذب أناساً بالعيش في مدينة الرياض وعواصفها الرملية التي لا تنتهي .. وفي الآخرة يعذبهم بالنار .. أجابني بسرعة (استغفر يابن الحلال .. مايجوز هالكلام) .. أجبته (تعرف الشيخ الكلباني؟) .. أجابني .. نعم معروف ، قلت له أن الشيخ الكلباني كان سعيداً عندما اختير لإمامة الحرم المكي وقال في لقاء تلفزيوني (أنا سعيد لأني أعلم بأن الله لن يعذب شخص أم المصلين في الحرم ) .. فأنا أقول مثله أيضاً .. سكت لوهلة .. ثم صرف الموضوع بعبارة بعيدة عن حديثنا .. (الظاهر برجع أجيب العوال من المدرسة .. فيهم ربو) .
وصلنا مبنى الأحوال وجلست أتأمل المدخل وعشرات (كتاب المعاريض) يتناثرون مؤكدين تخلف واقعنا في المؤسسات الحكومية .. ولا ألوم من يلجأ لهم حقيقة لأن من يدخل المبنى فسيضيع حتماً لعدم وجود إرشادات .. الأمر لا يستحق عناء السؤال والبحث وتعبئة الاستمارات دامك ستضيع مزيداً من الوقت وأنت بحاجة إلى كل دقيقة لإدراك أرقام التسجيل .. عدت لكاتب المعاريض وأنا أتخيل المشهد أمامه (صحفي يعد نفسه مثقفاً – رجل طاعن السن سبعيني – سيدة لا تعرف القراءة والكتابة – شاب صغير بالكاد عمره 15 يود استخراج بطاقة للمرة الأولى) ، كاتب المعاريض كان في أزهى صوره .. أسمر كسمار خالد مسعد .. يرتدي نظارة شمسية (أم 10 ريال) رائحة معطر الحلاقة (عطر الليمون) تفوح منه .. في قمة الأناقة راسماً تشخصية بنت البكار .. كاركتر مدهش بحق .. وفوق ذلك كان يبتسم ويتضاحك مع زبائنه .. حتى أني عندما قلت له أن يكتب مسمى المهنة (صحفي) .. ضحك وقال (الحين انت صحفي وجاي تصف .. ماعندك واسطة 🙂 ).. !
دخلت الصالة الكبيرة وسحبت رقماً .. كان رقمي 711 والرقم المعروض في الشاشة 502 .. التفت يميناً فوجدت عشرات الأشخاص متكدسين بشكل غير منظم في كراسي الانتظار .. والتفت يساراً لأشاهد ثلاثة موظفين فقط يعملون في الخدمة فيما بقية النوافذ التسع لا يتواجد فيها أي موظف .. أخذت نفسا عميقا.. وعرفت بأني أمام المهمة المستحيلة .. وأيقنت حينها أن المؤسسات الحكومية هي التي تفشل في سن الأنظمة وتنظيم العمل .. ببساطة مارأيته هناك هو (قمة الفوضى) .. ربما أعود بعد حين .

  • الصورة مقتبسة من موقع شجاع .. مع خالص التقدير لشخصه الكريم .

27 فكرة على ”مذكرات شخص صحى باكراً في الرياض

  1. و الله اذا أحد جاب طاري الاحوال اجلس اضحك .. لأن عشانها اخذت يومين اجازه يوم راح ع الفشوش وصلت هناك تسعه ونص مشخصة (بسبب جهلي بأنظمة الدوائر الحكوميه ) و أشوف العالم و الطاولات اللي بالشارع من جد تنحت زود ماني متأخره .. المهم دخلت قسم النساء الله يوريك بس ( كلمة حوسه قليلة ) الفوضى وَ الوساخة من جد الموظفات كيف متحملات … طبعاً اليوم الأول لم يسعفنا الوقت لأننا أصلاً خرجنا نجر أذيال الخيبة وَ الفشيلة .. اليوم الثاني وصلنا هناك 7 أنواع الزحمة وَ الفوضى وَ أنواع المضارب كله عشان تاخذ الرقم وَ اللي تعطي الرقم ما غير تقول اللي ما معها جواز خلي ولي أمرها يسوي البطاقة عند الرجال ( و لا 20 الف مره تعيد الموال ) بس طبعا الحريم ما يستغنون عن السؤال حتى لو أنهم فاهمين ؟؟

    المضحك أني أنا وَ أختي كانت ارقامن 442- 445 .. جتنا وحده قالت لو سمحتوا انا اوراقي ما اجهزت ورقمي 425 عطوني ارقامكم و خذوا رقمي ( رديت قلت هاااه لا لا .. قالت أختي شوفي رقم واحد ما نبي .. عندك رقمين ناخذ 🙂 ) عطتنا الأرقام .. 10 د الا جا دورنا ( الحمد لله و الشكر ) بس مع ذلك أنبني ضميري لأني تعديت ناس في دورهم ( حسيتهم أحقدوا )

    طبعا بعد ما انتهينا قالت أختي : البطاقة بعد كم سنه تتجدد ؟؟ قلت 10 سنين . قالت : أشوى 🙂

    >> ما أدري ليش أحس أني قلبت التعليق تدوبنه .. يعني ثقلت العيار من زود الحماس 🙂

    على فكرة أظن مذيعة البانوراما علياء القيسي لأني ما أخبر باتريسيا تطلع الصبح

    آسفة ع الإطالة .. دمت بخير

  2. نفسي أفهم اش لزمة الناس اللي برة يعبّوا لك الاستمارة ويكتبوا عن الواحد معاريض؟ يعني لازم نكتبها بالآلة الكاتبة!! وياريته بالكمبيوتر لااااااااااااااه بالآلة الكاتبة القديمة اللي من زمن جدي!! قد كدا خطوطنا ما تنقري؟
    كل كوم واللي يبيعوا الشيكات كوم تاني! هدا كله عشان يغروك تدفع ٢٠ ريال زيادة ومايحتاج تصف طابور عند البنك!! طبعاً هدا في قسم الجوازات أيام تجديد الاقامات مدري عن الأحوال جهتكم 😀
    ما أحلانا هنا نروح الأحوال مانشيل معانا غير شهادة الميلاد للبطايق الجديدة والتجديد تروح ومو لازم تشيل معاك الا اصباعك عشان البصمة الالكترونية والتصوير عند الاحوال نفسها وتطلع لك البطاقة ممغنطة كمان 😀

  3. اهم شي يفتحون إداره للأحوال المدنيه في الدرعيه

    عشان الواحد يطلع لها من عند ( خـ *** ) الباهلي ويخلص اموره في دقيقتين

    ويطلع من عند فلل السوسن ويروح لبيتهم عاد

    هههههههههههههههههههههههههههههه

  4. نفس قصتي تمامً عندما ذهبت لكي أصدر رخصة قيادة , مع الأسف لايعرفون شيء يسمى نظام ,, بإختصار جداً الدور للأقوى والأقل أخلاقاً .. هذا بالنسبة للمراجعين , أما الموظفين فلا تسأل 🙂 ,,,
    يسلموا أحمد .. وكان الله في عونك ياعزيزي 🙂

    أدهم

  5. يقول ابوالدراري:

    كل شئ الا مها سعود..

    ماذا سيقول صديقي ابوعواض وهو الذي يهرب من كلاس الواحده ظهرا ليخلو بصوت مها سعود!!

    لا ألومك فالرياض مدينه قاتله .. حتى مها سعود لايمكنها إضحاك ملايين شارع التحلية الغاضبين ..

    لم تجرب متعة صوت الخليج بعد.. لذا أدعوا لك دائماً بأن تعيش سنة على الساحل الشرقي لتعرف معنى أن تتأخر على الدوام لأن أسماء المنور تغني حصرياً على صوت الخليج ..

    أحمد لك الله .. سننتظر عشر سنين أخرى لتغير رأيك في مها سعود .. كم سيكون عمر ابوعواض حينها؟؟!

  6. كنك داري انك بكتب هاليومين عن الاحوال المدنية والمرور
    هذا يوم واحد وطلع منك موضوع .. اجل لو تداوم يومياً
    وتمر على طريق فهد وش تقول وش تكتب ؟

    صبراً يا عم

  7. آآآآه يا أحمد 😦

    حاولت أنا قدر الإمكان أن أكتب عن هذا الموضوع وما استطعت ، حجم الألم والحقد أكبر من أي تدوينة

    كيف الأحوال يا أحوال الرياض 😦

    زحمااات ولا فيه مواقف ، وعسكريين ثنين ، وواسطااااات ولافيه موظفين ونفوسهم في خشومهم

    بس الحمد لله انها كل 10 سنين

    بس فيه ملاحظة على الرد الأول

    أما علياء القيسي !! كأنها قديمة مووو ؟

    بانوراما طايحين الصبح في ابتهال ومحمد .. حليوين بس لا يفلوها واجد 😀

  8. يقول لولو:

    خاربه البلد بقوه!!!!!!
    بالله ذي حاله بلد من اغنى بلدان الكره الارضيه!!!!
    شي يقهر
    وش مصبرنا بالوجود هنا الا اهالينا وبس
    كل شي اشوفه يزداد حنقي على وضعنا!!!!!!!!!!!!
    لا ولا تذكرت ان لبنان طلابها باحسن مباني ببلدهم ودراستهم من الى على حسابنااااااااااااااااااااااااااااااااااا
    الله بستر

  9. يقول ابو ناصر:

    ما اقول الا ان عز الله البدوي انه يستاهل جائزة على صبره عليك لين وصلك للاحوال !!!! مسيكين الرجال شايلن هم ” عواله ” لا يذبحهم الغبار وانت قاعدن تخثرق خثاريق مالها سنع وتجيب برابيس الكلباني على هالصبحيه !!! يا احمد ارحم ترحم !!!

    المهم عطنا اللي عندك قبل لا يسنعنونك الكفار !! لانه واضح انك ان شاء الله بتتحسن اذا رحتا لهم .. لاني وكما ذكرت سابقا فلن يكون اسوأ من هالمستوى شيء !!

    فبنفقد احمد الاصلي لذلك اشبعنا منه قبل 24 الجاي !! هع هع هع

  10. يقول ام متعب:

    آآآآه على هلبلد لين متى واحنا في تخلف الدواير كل مكان يتطور الا احنا.انا نفس شعور “لولو”.بس لا تزعل يا أحمد مع انه الدواير الحكوميه نفسها بس العيشه في الشرقيه أهون مية مره من الرياااااااااااااااض .

  11. يقول majnonaha:

    صدقني أحيانا ما اقدر أتكلم عن الأحوال من قوة القهر اللي جواي.

    أنا شايل هم تجديدها مع أن باقي سنه ونص على انتهاء اللي عندي.

    ما هي صعبه ان المسأله تكون منظمة ومرتبة.
    بس الظاهر أن اللي صاير معجب البعض.
    أتوقع بإمكانهم التطوير بس ما يبون.
    عجيب يابلدي

  12. يقول Najd:

    آآه بس يالريآض وزحمة الريآض 😦
    اليوم بالذات طلعت من 6 ولا وصلت الجامعة الا 8 وثلث !!!!!!!
    سيناريو الزحمة أعيشه كل يوم 😦
    كل مكان زحمة وكل وقت زحمة !!
    الله يعين على هالدنيآ بخير !
    قصدي الله يعين على هالرياض بخير 😦

  13. أنا أعتقد أنك إذا أردت أن تدعو على أحد تكرهه ، فادعو عليه أن يكتب الله له معاملة في أحد الدوائر الحكومية و خاصة الأحوال المدنية . أضف إلى هذا القيادة في مدينة الخرسانة حبيبة أهلها الرياض.

    لم أعد أقود سيارتي في شوارع الرياض إذا زرتها بل أكتفي بأن أوقفها عند منزل والدتي رحمها الله و أخبر ربعي ، و هم على كل حال شخص واحد فقط ، أنني في الرياض فيأتي إلي جزاه الله خيراً و يكفيني مؤونة التحفز و العراك في شوراع الرياض .

    الرياض أصبحت تختلف عن أي مدينة أخرى في مجرة درب التبانة ، أستطيع أن أطلق عليها مجموعة مدينة على غرار مجموعة إنسان ، إنما في الجانب المثير للرعب و الدهشة و ربما الضحك مثل ما أصاب أحمد.

    أعود إلى الدوائر الحكومية لأقول إنني على استعداد لأذهب إلى آخر الدنيا – كثادق مثلاً أو المجمعة – حتى لا أضطر لإنهاء معاملة لا تتطلب سوى تناول (بيالة) شاهي.

    أخوكم

  14. @ light : القصة اللي صارت جوا الأحوال لسا ماذكرتها .. لكني متأكد انها ماراح تختلف عن اللي واجهتوه جوا .. ويمكن اشد ..
    غالبية مذيعات البانوراما كما يقول صاحبي ( كفوو) .. وأغلبيتهم كفو
    سعيد بحضورك الدائم واضافتك القيمة 🙂 ..

    @ asma Qadah : لا مش آلة كاتبة .. خط يد عادي بس يعبي الابليكيشن بس هم يعبونها ويدبسون الصور والأوراق بنفس الطريقة اللي يبيها الموظفين اللي برا ، لما وصلت شفت كيف الناس متخلبطة واللي مدبس الصور واللي حاطهم في صفحة ثانية والموظفين كل شوي يردون واحد .. سوا كذا وحط كذا .. في النهاية قلت لي وش لي بوجع الراس والتهزئ .. خلني أصف مع المواطنين برا عند حقين المعاريض ..
    تحمدوا ربكم على التقدم اللي انتم عايشين فيه بماليزيا .. عقبالنا ان شاء الله

    @ يزيد :
    ههههههههههههه والله يايزيد اني ضحكت ضحك غير طبيعي .. كنت متوقع ابو ناصر بيجيك ماشي مليون بس خاب ظني ..
    فعلا حنا بانتظار فرع الدرعية .. واليوم قريت تصريح للحنايا يقول خلال اشهر بينتهي حق الدرعية وشرق الرياض بعد ..

    بس ماعنك وعن الدخلة مع (خفـ**) الباهلي .. لانه لازم تدخل الدرعية من الجهة الثانية اقرب للمرور والأمارة

    @ adham : يابن الحلال والله ان الرخصة اهون .. على الاقل فيه اكثر من جهة تصدر رخصة بالرياض والعالم متوزعة .. لكن الاحوال كل الرياض في مكان واحد فقط ..

    @ أبو الدراري : جربت صوت الخليج اعتقد كنت اسمعها في دبي .. بالفعل اختيارات ساحرة ومواد طربية من الدرجة الأولى ..
    مع تقديري لصديقك أبو عواض إلا أني عندما أستمع لمها سعود أحس بأنها إمرأة سطحية .. اعتذر عن هذا الوصف الغير لبق .. ولكن لا أدري لماذا ينتابني هذا الشعور .. صوتها يعكس فكر إمرأة ضعيف من الداخل مرتبكة .. غير خلاقة .. ضعيفة وعلى نياتها 😦 .. سوري مها سعود إن كنتي تقرأين هذه الأسطر .. فلربما أكون على خطأ ..

    @ Amalia : هههههه وهذا جزء من كل .. الباقي أدهى وأمر ..

    @ lemonh : هههههه تعليقك اضحكني 🙂

    @ مشغول : والله الله يكون في عونك .. شي غير طبيعي والله .. واعتقد وقت الخروج أكثر زحمة

    @ صاحب القلم : يابن الحلال .. العسكري اللي واقف قدام الشبك يشيك على الأرقام .. تطاق 4 مرات خلال 45 دقيقة فقط .. صح انها ماوصلت للأيدي بس والله اني رحمته لان المشكلة ماهي فيه بقدر هي في التنظيم السيء .. وإلا هل يعقل حشر 200 مراجع في صالة واحدة .. بأي عقل يحدث ذلك ؟
    من الضروي وجود صالة آخرى على الأقل يكون دورها (تشييك) قبل الدخول للصالة النهائية .. ومنها يتقسم العدد ويخف على الصالتين

    @ لولو : فعلا شي يقهر .. ويرفع الضغط بعد .. وللأسف الإعلام يقف موقف المتفرج في مثل هذه المواضيع ..

    @ أبو ناصر : يادب .. الحين ماخذ هم البدوي ولا خذت هم خويك .. المهم عجلوا علينا بفرع الدرعية ياولاة الدرعية .. ودي ادخل واصرخ بصوت عالي (تراني جاي من طرف أبو ناصر ) ..
    الكفار أنا اللي بسنعهم واطورهم .. وأحفزهم بعد .. مايخفاك .. وقدامك نماذج مثل عزيز وحمود .. نماذج أعتز بتقديمها هههههههههه

    @ أم متعب : والله عاد وش نسوي .. المشكلة عاد انتم ياهل الشرقية دايم ترفعون ضغطي لما تدخلون في مقارنات .. عاد الشرقية ولا تزعلون علي ياهلها بس ماتجي عند أدج حي في الرياض .. حفر وشوارع صغيرة .. الشعب بس هو اللي أحلى

    @ majnonaha : شف .. نصيحة من قلب .. لا تروح إلا وانت مدبر واسطة .. وسيب عنك المثاليات .. واسطة ولو سكيورتي تكفيك جوا ..

    @ صاحب القلم : لا ماكبه .. أبو ناصر لماح يعطيك طراطيش كلام بس .. ذيبان

    @ Najd : ياساتر يارب .. يالله سترك .. من جدك ؟؟؟
    يارب وين الرياض رايحة ..

    @ القاضي : ثادق ياصاحبي لاتبعد سوى 150 كلم شمالاً .. ليست في آخر الدنيا ، كنت أفكر بالذهاب إليها للتجديد إلى أن علمت مسبقاً بأن الأوامر الجديدة تطالب كل المحافظات بإرسال البطاقات للرياض ثم تعاد إليها لاحقا .. لتصبح مدة المعاملة اسبوعين ..

    بالفعل .. إذا أردت أن تدعو على أحد ادع عليه بأن يعيش في الرياض ويراجع دائرة حكومية وسط البلد

  15. اييييييييه ما اقول إلا يا اخوك غلطان وربي ياشيخ لأروح اطلع بطاقة الأحوال من ثادق و الرخصة من مرورهم اريحّ لي “طبعاً عشان مايستقعدون مرور الرياض ويقولون احوال قديمة و مدري وشو مع انه احساسي يقول احوال ثادق بدوا بالجديدة الحين”

    ههههههههههههههههه احوال الرياض و ما ادراك ما احوال الرياض

    الحين اللي يبي يطلع بدل تالف وش يسوي <<<<مبتلش وده يروح احوال ثادق و يطلعها بسرعة بس يخاف يضرب مشوار على الفاضي 🙂

  16. على طاري الدوائر الحكومية …

    اجمل تعريف قرأته عنها في كتاب الحكايات الساخرة “بيل و نبيل” للكاتب / نبيل بن فهد المعجل “أبو فيصل”

    يقول في صفحة 18 من كتابه في مقاله الأول بالكتاب و الذي بعنوان “بيل و نبيل” :

    وصلنا سالمين إلى إحدى الدوائر الحكومية و سألني “يقصد بيل” عن السبب في تسميتها بالدوائر فقلت له اصبر و ستعرف بعد قليل . بعد عدة ساعات من اللف و مراجعة جميع أقسام الدائرة الحكومية و اخذ توقيع هذا و تكرار طلبي إلى العشرات من الموظفين خرجت من هذه المعمعة بنصف منتهي من المعاملة و عندها سألت بيل إن كان عرف الآن لماذا سميت بالدوائر و لم يجب , فرأسه الدائر كان جوابا كافياً !! فقلت له (مشي حالك يا بيل) فمشى حاله !!!

  17. طيب وش رايك بالي مسك خط للمجمعه منحاش من احوال الرياض وفي الاخير فاجأه الموظف بطلب شاهدين (مع ان السالفة تجديد) :mrgreen: ؟!

    عموماً لقيت اثنين جزاهم الله خير وشهدوا لي .. على فكرة انا داخل عندهم 11 ونص واخذت البطاقه بعد الصلاة مباشرة .. شي مستحيل يصير في احوال الرياض 🙂

  18. يقول دواس9 صديق احمد القلق:

    والله مالقاها الا انت
    ياالقلق
    تصاريح وبعد بعضها يبرق
    ا هههههههههههههههههههههها

  19. اخ دواس

    انت تعرف خف** الباهلي ؟؟

    ادهف موترك 2

    وتلقاه على طول

    بالماريه انه يبرق ويبكي .. هكذاااااااااا

    هكذاااااا

  20. يقول butterfly:

    الله لمن يفوتِك الباص وتطيحي على مقال من هالنوع شي كشخه

    بالله أحمد ما تعرف متى حـنسوق >> برآ

    ماشاء الله عليك كاتب ممتع بصدق الحين حسيت بقرف الأحوال من قلب ><

  21. يقول عبدالكريم:

    الوضع مأساوي عندنا في الجهات الحكومية ..
    إذا ما عندك واسطة في أحد هالدوائر ما راح تمشي أمورك إلا بـ الغثا ..
    طبعاً ما أقصد بكلمة واسطة مسؤول كبير أو شي زي كذا لا ..

    أقصد أي موظف ممكن يمشي أمورك ..

    عاد تصدق أيام الصيفية الي راحت طلعت بطاقتي الجديدة بظرف اسبوع
    وكان الفضل لله ثم للواسطة ..

    لان الاحوال عطوني موعد التصوير للبطاقة بعد عشر أيام!!! ..

  22. قمة الفوضى لأن أغلب الموظفين هناك هم من يخلقها حتى تفتح لهم نوافذ الواسطة لاستغلالها في اماكن أخرى تعج بالتخلف ..

    هنا تستورد حاضنات للواسطة حتى يتمكن البيوقراطيون من الاستمرارفي الاستغلال والتمكن ..

    غلا من جد عجبني استفسار الأسمراني معقول صحفي وما عنده واسطة 🙂 ؟

  23. يقول سعود:

    لو بتنحل قضية فلسطين
    مابتخف زحمة الرياض 😦
    الأحوال بالذات مدري متى يخلصون مراجعينها
    حشى والله لو أوراقهم تنتهي بيوم واحد !
    بس تدري عاد
    يازينها بزحمة شوارعها

  24. يقول عبدالرحمن:

    الاحوال اسواء دائره حكوميه من جميع النواحي
    تلاشي النظام.. تفشي الواسطه .. هيئه الموظفين وتعاملهم الجاف
    اذكر يبوحميد السنه الي راحت رحت اجدد بطاقتي كان فيه حرمه كبيره في السن تترجى موظف وابوالشباب معطيها اشكل لدرجه انها جلست على الارض ورجعت تكلمه واخيرا تفضل يرد عليها : وانتي جايه هنا وعيالس في بيتوهم راقدين . . هي بنبره حزين وقتها انا تكدرت : ماعندي عيال وزوجي في البيت مريض
    مااقول الا الله يعين بس

التعليقات مغلقة.