وين الملايين

 

حينما أتأمل حال رجال الأعمال في المملكة وهم يدعمون الأندية ويشترون عقود اللاعبين بعشرات الملايين دائماً ما أتساءل .. كم تبلغ نسبة الدعم المقدم إلى ثرواتهم الإجمالية ؟ .. فرئيس نادي الاتحاد السابق منصور البلوي تجاوت قيمة صفقاته نحو 200 مليون ريال ورئيس الهلال الحالي الأمير عبدالرحمن بن مساعد عقد صفقة واحدة فقط بقيمة 50 مليون ريال ورئيس الشباب خالد البلطان يقدم دعماً لا يقل عن 50 مليون سنوياً، والآن آخر الداعمين برز عضو شرف النصر الأمير فيصل بن تركي الذي قدم مالا يقل عن 40 مليون ريال في سنة واحدة ويقود توجهاً الآن لشراء صفقة لاعب محلي بقيمة تتجاوز 25 مليون ريال.
كنت أقول .. من يدعم نادياً رياضياً بـ 200 مليون فمن المؤكد بأن قيمة الدعم لا تتجاوز 1% من الثروة الإجمالية .. إذن ثروات هؤلاء تتجاوز المليارات بلا جدال (الله يزيد ويبارك).
لن أكون مثل المطالبين بأن يحول هؤلاء أموالهم للخير والمعروف و .. و .. الخ، فهي أموالهم وهم أحرار بذلك رغم علمي بحرص بعضهم على القيام بواجب الخير وبحكم عملي في الإعلام يصلني عبر أكثر من زميل بأن الأمير عبدالرحمن بن مساعد هو أحد أكثر الشخصيات التي تسارع لتقديم مساعدات في الحالات الانسانية التي تنشر في الصحف ويكتفي باسم (فاعل خير) .. لكني أعود وأقول بأن فعل الخير مرتبط بالشخص وحده ولا يمكننا مقاضاته أو انتقاده لأنه يفعل كذا وكذا.
لكني أفكر بين حين وآخر .. إذا كان هؤلاء أو غيرهم من داعمي الرياضة يملكون عشرات المليارات في أرصدتهم .. لماذا لا يعيشون حياتهم كما ينبغي ولماذا لا يفكرون في مشاريع خيرية أو تجارية أجدى من دعم ناد أو شراء عقد لاعب، تخيل أنك تملك 100 مليون ولديك حاشية وطائرات خاصة وقصوراً ملكية في أجمل الأماكن السياحية .. قل لي بربك مالذي يدعوك للبقاء في مدينة مقيتة مثل حال مدينة الرياض والالتزام بحضور تدريبات النادي ومبارياته طوال الأسبوع والدخول في معارك إعلامية و (وجع راس) لا أول له ولا آخر.
لا يمكننا القول بأن الهدف هو الشهرة والإعلام لأن ذلك يأتيك وبسهولة من خلال شراء صفقة واحدة للنادي سنوياً وتعد أمراً كافياً للتواجد الإعلامي المكثف، بل هناك أمور عدة غير الرياضة تجلب الشهرة والجاه والإعلام للشخص دون قلق الرياضة ومشاكلها التي لا تنتهي.
أذكر هنا الأمير الوليد بن طلال كان أحد أكبر الداعمين لنادي الهلال قبل سنوات الاحتراف ويعد أحد أغنى أغنياء العالم لكنه في الوقت نفسه ترك مساحات كبيرة لنفسه ليعيش كما يريد حتى في رحلات البر، وفي الوقت نفسه استثمر ملايينه في صفقات وعقود تجارية أفتخر وأنا مواطن سعودي بأن أجد تواجداً له في كبرى مدن العالم سواء اتفقت مع توجهه التجاري أو اختلفت إلا أن الرجل يمثل واجهة حضارية اقتصادية اعلامية للبلد.
هل للعمل في الأندية وإداراتها لذةٌ لا نراها أو نشعر بها ؟ .. وهل فعلاً مايقال ويتردد بأن عشرات من ممن يصنفون تحت مسمى (ملياردير) ..وليس (مليونير) .. كما نقول بالعامية (مايعرفون يديرونها صح ؟) .
قبل أن أختم تعالوا على ذكر أحد من حمل مسمى (أغنى رجل في العالم) السيد العظيم (بيل غيتس) الذي أنشأ مع زوجته مؤسسة تعنى بالأعمال الخيرية قدمت حتى الآن نحو 30 بليون دولار أمريكي في أعمال خير مابين محاربة الأمراض أو تقديم منح دراسية منها بليون دولار لتمويل الطلاب من (أصل أفريقي) .. كما لن أنسى رجلاً عظيماً آخر وهو رفيق الحريري عندما ذهبت لبيروت ووصلت قبره هالني بجانبه هرم هائل من الكتب علمت بعدها أن كل من درس من خلال مؤسسة الحريري الخيرية وتخرج بالماستر أو الدكتوارة جاء ليضع رسالته أو مؤلفاته من الكتب بجانب القبر .
نريد أن نرى نماذج خيرية براقة .. لا نريد قراءة إخبار إنقاذ المجرمين من أحكام الإعدام لأن فلاناً دفع 10 ملايين وعلاناً 8 ملايين ! .. وهذه قصة أخرى 😦

يارب ارزقني 10 ملايين ريال .. وطيارة خاصة 🙂

< << عز الله اللي مهوب جاي للرياض إلا عشان يسلم على أهله ويمشي 😀 .. لا نسيت بعد أجي أضرب بواري قدام بيت عبدالله أباحسين بعد الساعة 12 من كل يوم <<< إرميييييييي

17 فكرة على ”وين الملايين

  1. يشرفني أن أرد عليك في هذا الصباح

    كلام جميل، وأعتقد أن دفع مبالغ طائلة على لاعب هو من التبذير، لكن لو استثمر هذه المبالغ في مشاريع استثمارية داخل النادي، أو تفعيل النشاط الثقافي والاجتماعي ( النايمين في العسل! ) والتي لا تتعدى نشاطاتهم سوى زيارة بيوت الشباب ومصنع ديمة وعصائر الربيع !!

    وأتمنى لك 10 ملايين بدون ولا نسبة لي 🙂 >> علشان تعرف انني صديقك الصدوق وأكون في بالك لو بغيت لك خوي أو حاشيه ههه

    بس الطيارة الخاصة ما راح ادعي لك فيها ، لانك من النوع الفاسق الي ممكن تمسك معك الصبح ومع زحمة الطريق وتركب الطيارة وتروح للدوام فيها هههههههه تسويها يا ابو حميد ، والا اذا شفت نفسك فاضي بين العشاوين لقطت درقسون الطيارة ويممتها لدبي يا بعد حيي 🙂

    >> ملاحظ يا احمد اني معامل الطيارة على انها اكسنت خخخ

  2. اللي عنده فلوس زايده .. يحني ******

    إسأل ابو ناصر عن المثل أعلاه

    كــُـــــلـــّـــــــنـــَــــــــا عـــِـــــيـــال ( قــــِــــــيـــــــريّاه )

    إرمييييييييييييي

  3. الشغف ياأحمد 🙂

    عندهم شغف بهالأمور فيسخرون لها بعض مما يملكون لأن هالشي يمتعهم ,
    زي مثلاً انت وش لاقي فالصحافة ووجع الراس ؟
    يعني لو انك مدرس وتاخذ اجازات على كيفك مب أحسن ؟ 😀
    اتفق معك بالنسبة لسوء الإدارة ,
    اللي يشوف الرياض قبل عشر سنين ويشوفها اللحين مايحس الا بتغير طفيف لا يذكر ,
    كان من الأجدر إعمارها بشكل يتناسب مع مكانتها وايضاً ايجاد مشاريع استثمارية وخيرية
    تعود بالنفع على التجار نفسهم وعلى مجتمعهم ..

  4. يقول الفاصل:

    باختصار ..

    محد لآقيها الآ اللآعبيـن

    أجل تصرف رواتب شهريه للمحترفين بحدود الـ 250000 ريال شهريا

    بمعنى كل اربع شهور مليون ريال …… أح …….

    أدري أنه ماندفع ولا ريال من جيبي لكن شي يقهرر ويحز بالنفس ..

    لكن حتى لو مادفعو بننقهر برضو لأنهم ماجابو محترفين < هي كذا ولا كذا القهر فينا فينا

    🙂

    لكن ماقول الآ .. الآ ليت الزمان يعود يومآ ..

    مدونه رائعه مثل صاحبها

  5. أحمد ..

    تبي الصدق عاد .. بعد ما دخلت مجال البنوك مروراً بعالم الصحافة
    قدرت اخلط مابين رجال الأعمال الكبار والعملاء الكبار عندنا ..
    ياخي تصدق فيع ناس ما احد يدري عنها وعندهم من المليارات ما تتصور ..
    وفيه عملاء فيه خير لا جاء وقت رمضان تشوف الشيكات تملى البنك تبرع منه
    واذا جاء وقت الحج .. يسوي حملة لهم بالمجان .. ويا كريم ..

    نادراً ما تلقى احد ما يسوي عمل خير خصوصاً من التجار البسطاء ..
    لكن الهوامير اللي يدورون ورى الشهرة سلم لي عليهم وخاصة اللي يترززون
    ورى اللاعبين والإعلام الرياضي لأنه اسهل طريق لدخول مجال الإعلام والشهره ..
    وبعضهم يعتبر دخولهم تسويقي وبعضهم فضاوه زي ربعنا ! ..

    أحمد .. لو تقرأ عن شي اسمه غسل أموال يمكن تغير نظرتك شوي
    عند الناس اللي تركض ورى صفقات اللاعبين .. ما اقول كلهم
    بس بعضهم ..

  6. الله يرزقك العشر ملايين وَ فوقهم سياره وَ بيت .. مثل ما رزقك غيرك ” محمد نور ” وَ مثله وَ شرواه 25 مليون ” ما شااااااء الله ” قيمة عقد لمدة خمس سنوات وَ بيت وَ سيارة وَ لااااا مش أي سيارة << تراني محتره وَ ضايق صدري ع الأقل يعطيني سماوة 🙂 وَ هذا أضعف الإيمان

    تدري لو انا عندي هالمبلغ ( 25 مليون ) و الله لأشتري جزيرة و اسكن لحالي فيها << توم هانكس على غفلة 😀 .. بس السؤال هل في جزيرة بهالمبلغ ؟؟؟؟

    تحياتي .. دمت بود

  7. يقول nOuf.a.s:

    تبي عشرة ملايين ؟؟
    يا سهلها .. اشترك في القوّة العاشره 😀 ( أبيخ برنامج عربي ) !

  8. الرياضة و أنا أخوك في كل مكان فيها فلوس ، و لو تلاحظ يا راعي البواري أن اللاعبين يعتبرون من أغنى المشاهير.

    أما اللي يضيع وقته في ملاحقة تدريبات ، فهي للشهرة و البحث عن الظهور الإعلامي ، يعني إذا أنت تاجر و رئيس نادي معين ، بتلاقي إنك تطلع في تدريبات الفريق ، و في صفقاتهم و في تصاريح ما بعد المباراة ، وكل اسبوع عندك كم هوشه بتطلع فيها.
    يعني بإختصار بتطلع أكثر من هيفاء وهبي على الشاشه !

    وهذولا يدورون هالشي ، و أيضا العشق و أنا اخوك مشكله ، مثل الهلال لو معي فلوس بأصير رئيسه و بحطك النائب و أخليك تكشخ بعد ، بس الجود من الموجود 😦

    تبي نصيحتي .. أترك عنك بواري آخر هالليل و تمرن في النادي ، بس المشكله إنك شايب اللي بعمرك الحين يدورون الإعتزال 😛 <— إرميييييييي

    شكلي بصير لاعب وأحطك مدير أعمالي 😉 زي القرون جاه مليون وهو بس مدير أعمال 😉 موافق ؟

  9. يقول ابو ناصر:

    والله يا موضوعك فيه من السماجه اللي تيزي ربعها !!!!

    وراك خربتا فكرة الموضوع وحستها تسذا !! وين حكيك من اول ومشروع تطوير المجتمع – خلاص طورتا عزيز وحمود التفتا للمجتمع كله – !!! ولو ما تنتخلى لحالك انت … يبي لنا نعيد الايام الخوالي ! ولا ممكن تنطرد باحمر اذا استمريت بهالمستوى !!!

    نشوفك قرييييب …. ارمييييي يا مايسترو انت !

  10. @ صاحب القلم : يشرفني حضورك 🙂 ..
    شف في الدوام ماعندك مشكلة لانه مافيه معاناة .. بس حلاتها تكون معك طيارة كذا ضايق صدرك طالع الساعة 12 .. شغل طيارتك وروووووح حتى ولو لجدة .. أي مكان فيه بحر 🙂

    سعيد بتواصلك

    @ يزيد : هلا بك أخوي (أبويزيد) .. انضبببببببط اشوى انك حاط نجوم ولا كان علوم
    أبو ناصر يتحرى المطر والبراد عشان المطامر .. مهوب فاضي لي الحين

    @ ريم : لاقي الصحافة انها المكان الوحيد اللي ضافني .. بعدين بعيد الشر .. مدرس ؟؟ .. لا والله الحمد لله والشكر .. الحين وش حليلي موظف متى مابغيت اسافر اروح .. آخذ اجازة اي وقت .. أنام 🙂 .. أتأخر الوقت اللي ابي .. لا وش مدرسه

    @ الفاصل : أولاً أرحب بك كونها زيارتك الأولى وأنا سعيد بحضورك 🙂
    ماشاء الله اللاعبين مايحتاج بس برضه ترى حياتم قصيرة ماتتجاوز 10 سنوات وعادة هم يلعبون بالفلوس لعب وقت الشهرة واذا كبروا .. انقلبت الدنيا عليهم والامثلة واجدة

    @ مشغول :
    اوووووووه كلام كبير هذا غسيل أموال .. يبي لنا كورس ياسي مشغول .. ع الأقل تطورنا
    بالله دور لنا منا ولا منا شف لنا حساب أبو سعد كم فيه 😀

    @ light : هين هي لو تجي 10 مليون الواحد يمدي يشغلها في تجارة ولا مشاريع كبيرة وتفتح الدنيا له ويمديه يوصلها 25 .. ليه لأ .. وبدال الجزيرة جزيرتين .. وفيه جزر بالمبالغ هذي لكنها بعيدة مرة وخطها رايح جاي ( واحد مايعرف ينصب) ..

    @ nOuf.a.s : اشوى اني مدري وش القوة العشرة بس ولو .. حامت تسبدي ما احب برامج المسابقات

    @ عبدالله أباحسين : لا والله وش هالعشق اللي بصرف من مخباتي عليه .. اوكي احب الهلال واتابعه ويمكن ادعمه بس مو أدفع ملايين .. ماصارت .. إلا عاد اللي ماتعب فيها ويدعم زي مايبي هذا مالنا علاقة فيه .. الله يوفقه 😀

    من ناحية شايب فصدقت والشيب لعب لعبته ..

    @ ابو ناصر :
    لا تقعد تهايط يابو ناصر وانت داخل بقوة كأنها دخلات كريمر في ساينفيلد
    الموضوع اللي قد سولفنا فيها مابعد طرحته وهو بعيد عن الفكرة هذي ..

    بعدين أنا أصحح لك العبارة شوي .. صح أنا طورت عزيز وقدمته للملاعب بروح جديدة مبدعة خلاقة .. لكن حمود ما طورته .. حاشا لله .. أنا (حفزته) وفيه فرق بين المفردتين وأتوقع تحفيزي اللي بدأ من إجازة الصيف قبل لا تبدأ الدراسة جاب نتيجة في الآخر

    المهم ذكرني أجيب الهارديسك لو بمسج ..؟
    ماقلت لك
    طحنا على كنز عند واحد من الشباب عنده مليون تيرا الظاهر .. شي ولا في الأحلام والله العظيم لدرجة أننا في الدوام شرينا هادريسك واحد تيرا ولا كفى ههههههههههه ومرتب ومصنف .. شغل نظيف نظيف بحاول افضي اللي هارديسكي ولا اشتري واحد ثاني

    إرمييييييييييي ياشؤشؤوووووووو

  11. مدري اذا نواديكم فيها قمار زي بقية النوادي أو لا؟
    بعض النوادي ومباريات الفروسية أو حتى المصارعة بيكون فيها مراهنة مثلاً على أحد اللاعبين أو الفِرق.. وهدي غالباً يشترك فيها الناس اللي عندها فلوس زايدة وماهي عارفة فين ترميها :S

    الـ(هوامير) على قولتكم وأصحاب الملايين هم كمان بشر يا أحمد وأي واحد عنده فلوس مو حاسس بقيمتها بيصرفها من غير تفكير، لا تنسى طبعاً الميول الفردية على قولة عبدالله.. نفس الشي انت تحب السفر وكل ما حوّشت لك قرشين سافرت 😀 عاد غيرك بيقول عليك ما تعرف تدبّر نفسك وصارف فلوسك في السفريات والوناسة لو انك مثلا معمّر بيت والا مسوي عمل خيري بيكون أصرف لك.. الفرق انهم شغالين على مبالغ مالية كبيرة ونحن حدّنا ٣ أو ٤ أصفار وبس 😀

    أما موضوع اللي عنده ملايين وقصور وجالس في الرياض؛ اش درّاك انه مو عامل زيّك مايجي الرياض الا يسلّم على أهله ويمشي؟ 😛 لا تكون شغّال في المخابرات والجريدة عاملها ستارة بس؟ 😛

  12. قبل فترة قرأت مقال تكلم عن الدكتور عبدالرحمن السميط ومن ضمن الحديث ان الدكتور السميط يؤكد أن 70 % من الاعمال الخيرية التي أشرف عليها كانت من أموال الطبقة المتوسطة في الخليج !!

    غالب الاعمال الخيرية عندنا مكررة في الافكار ومع ذلك ماتحس انها كافية لان فيه سوء في الادارة والتنظيم

    ورجال الاعمال الذي تعودنا مشاهدة أاسمائهم في التبرعات تتكرر أسمائهم سنويا ومن القليل ان تجد اسما جديدا يضاف للقائمة

    نحتاج لرجل الاعمال اللي يحمل فكر ومال أو يتعاون مع أشخاص ذوي فكر حتى ينشئ مشاريع خيرية مفيدة

  13. يقول ميسي:

    اولا بحكم انك صحفي العنوان كان يوحي باشياء كثيرة وفجاءة ادرت دفتك نحو محتوى مختلف تماما ،،ثم ياصاحبي هناك شيء يسمى الهوس بالرياضة وبشراء اللاعبين وشراء الاندية ،وكثير من الاندية تحت راية احد أمراء الخليج ليس السعودية فقط ،ضف على ذلك هناك مجد اعلامي كبير تستطيع ان تطلق عليه ايضا حمى الظهور الاعلامي ،فعندما يذكر الفريق او اللاعب الاوذكر اطال الله عمره سمو الامير شيخان أيا كان شيخان هذا؟؟من ناحية اخرى ماسر نقمتك على الرياض ؟!مسكينة ماتستاهل منك ،حملتك وتحملك على ارضهاوالان تركلها بكلماتك؟ام هي مداعبة المحب؟.اما بيل غيتس فهو حكاية سمعت له تصريح مرة يقول فيه لكي تشعر بالسعادة عليك ان تتبرع بنسبة من اموالك ،وكما لايخفى عليك “الصدقة عندنا كمسلمين” اخيرا ،عندما كنت اشاهد برنامج طن اوف كاش ،كان المقدم يقول عند تهاية كل حلقة انو يكون عندك فلوس دي حاجة وانو تعرف تتصرف فيها دي حاجة تانية خالص

  14. أحيانا نشوف ناس مهووسين بحب شيء معين .. مثل شراء الكاميرات أو كل موبايل يديد أو حتى السيارات!! شنو اللي يمنعهم مادامت المادة متوفرة .. وأشوف بعد ان اللاعب مثل “الموبايل” أو “الكاميرا” 😀 الفرق إن أحلام الفقراء تختلف تماااااااما عن أحلام رجال الأعمال! 😀

    صفقات اللاعبين ومهما كان اللاعب ناجح مؤثر في الفريق الا اني اشوفها صفقه فاشله لرجل الأعمال فقط!! عيل أحد يقط ملايينه في بحر عشان كوره ؟؟!! 😀

    دمت بخير،،

  15. انا اتذكر في احد اللقاءات التلفزيونية مع احد امراء من اعضاء شرف نادي النصر كان يقول انه 2% من دخله يروح للنادي الي الظاهر كان 20 مليون !!

    الله يزيده ويبارك له , بس سؤالي ليش فيه فقراء في السعودية ؟ الظاهر لأنهم ما سمعوا بالكورة !

التعليقات مغلقة.