مأساة قصة مواطن مع مرور الرياض !

قبل نحو اسبوعين ، هاتفني هاني للحضور إلى مقر مرور شمال الرياض لإحضار بعض الأوراق قبل إنهاء الإجراءات الإدارية نتيجة ( دقشة خفيفة 🙂 ) حدثت لسيارته مع سيارة أخرى على الطريق الدائري الشمالي ، الحادث أقل مما يذكر ولكن لإستكمال الإجراءات كان على الأطراف الانتقال إلى مكتب المرور ، ذهبت لهاني بعد المغرب وبعد خروجنا توجهنا إلى مكان إيقاف سيارته لكن المفاجأة هي أننا لم نجد السيارة التي كانت متوقفة في طريق الخدمة على الدائري وعدنا مع الطريق مرتين وثلاث اعتقادا بأن هاني أوقفها في مكان آخر .. ربما هنا أو هناك .
ببساطة لم نجد السيارة ، ولم يكن لنا بداً من العودة إلى مرور شمال الرياض لطرح التساؤل ( أين السيارة ؟) .. عدنا وتوجهنا بالسؤال إلى عسكري في الاستقبال بالداخل الذي أجاب بقوله (شوفوها منا ولا منا 🙂 .. يمكن بعد الحادث شحنت إلى حجز السيارات في لبن ) ، لم نستطع إقناعه أن ماحدث لم يكن حادثاً بالشكل المعروف والسيارة لم يحد لها شيء ويمكن أن تسير بشكل اعتيادي لكن لافائدة .

قلت لهاني (مابدهاش .. بندز لحجز لبن وأكيد أنها راح تكون هناك ) ، وانتقلنا من شمال الرياض إلى حجز لبن في أقصى المدينة في مشوار طويل ولفت نظرنا كمية السيارات في الحجز .. كان عددها رهيباً وكانت سيارات النقل تصطف في الانتظار لدخول الحجز حاملة عشرات السيارات ، كنت أقول لهاني بأن من المؤكد أن المرور وكل سيارات النقل بنقل سيارتك للحجز حتى انتهاء الإجراءات ، المفاجأة التي عاد بها حينها بعد عودته من استقبال الحجز ( لاتوجد أي سيارة بمواصفات سيارة هاني وصلت خلال اليوم ) ، عند هذه النقطة بلغت الإثارة مبلغها فيما حدث ( إذن .. أين السيارة ؟ ) .
عدنا لمرور الشمال مرة أخرى ونحن نعيد القول ( أين السيارة ) .. وأنا أقول ( شوووو الرمسة 😀 .. تذهب لإنهاء إجراءات حادث ثم تعود ولا تجد سيارتك ) ، رد الموظف مرة أخرى بمصطلح ( دوروها ترى حقين السطحات يجمعونها في منطقة معينة ويطلعون سوى صباح اليوم الثاني .. واذا ماحصلتوها أكيد أكيد انها في حجز السلي) ، يا إلهي ماذا يحدث في أنظمة البلد ؟ .. ألا يوجد شبكة انترنت .. ألا يمكن وصل جميع نقاط الحجز بحاسب مركزي يمكن البحث فيه من أي مكان .. شوووو الرمسة ياصاحبي 🙂 ؟
انطلقنا مباشرة لحجز السلي وأنا الجاهل تماماً بمناطق شرق الرياض .. كنت أعتقد بأن الحجز قريب من الدائري الشرقي ولم أكن أعلم بأننا سنكون قريبين من منطقة الأحساء 🙂 .. حسناً أنا مبالغ بعض الشيء ولكني أعتقد باننا قطعنا أكثر من 100 كلم حتى الوصول لحجز السلي الذي يقع في منطقة نائية ، الموظف بدوره أجاب ( اليوم لم تدخل سوى سيارات محدودة هذه مواصفاتها .. ولم تكن سيارة هاني من بينها ) .. ياساتر يارب .. ياعالم وين السيارة !!

في طريق العودة بدأ الاعتقاد بأن السيارة قد سرقت هو التفسير الأقرب .. اتصلنا بالمرور لطلب أي رقم يمكن أن يفيدنا بحالات سيارة هاني المختفية .. أعطونا رقماً قالوا بأنه مسؤول عن هذه الحالات .. كنت أعتقد بأن الرقم لموظف في مكان تقني ملئ بالشاشات وأمامه قواعد بيانات تحدث مباشرة بعد الحوادث ويستقبل المكالمات بجملة ( مرور الرياض .. مساء الخير كيف أقدر أخدمك ) .. لكن حلمي توقف واصطدم بجملة قوية حين كان هاني يتصل وهو واضع (السبيكر ) .. قال هاني ( الووو .. مرور الرياض ؟) .. رد الطرف الثاني بجملة (ايه .. وووش عندك ؟) بطريقة تشعر بأن قائلها متأفف و ( ضايق صدره ) هههههههههههه سألناه عن حال السيارة وقال ( ماعندي فكرة .. اصلا من اعطاك هالرقم ) ..قلت .. والله إنها مأساة .
الحل النهائي كان بالتوجه إلى شرطة حي الصحافة لتقديم بلاغ سرقة وهناك الحال لم يختلف كثيراً ولعلي أتطرق له في تدوينة لاحقة ، وضعت هاني بعد إنتهاء إجراءات البلاغ عند باب منزله عند الساعة الواحدة صباحاً بعد رحلات ماراثونية في الرياض .
صباح اليوم التالي توجه هاني لمرور الشمال للبحث الأخير فأجابه أحدهم بان هناك ( أمن المواكب ) قد يكون سحب السيارة لأنها موجودة على الطريق الدائري في طريق العودة من مطار الملك خالد ، وللإجراءات الأمنية فإنهم يحسبون أي سيارات متوقفة .. لذا فقد تجد سيارتك في ( حجز المطار ) ، توجه هاني لمطار الملك خالد وهو في الطريق كان يتلفت يمين ويساراً تطبيقاً لجملة رجل المرور ( شوفوها منا ولا منا ) .. المفاجأة المدوية لهاني أنه وجد سيارته مركونة على الجانب الأيمن في طريق المطار وقبل الحجز بنحو 30 كلم .. كيف وصلت هنا ؟ .. هل هي مشروع سرقة .. من نقلها .. ولماذا .. فتح هاني سيارته ووجدها على حالها دون فقدان أي شي .. قادها إلى شرطة الصحافة لإلغاء بلاغ السرقة .
هذه الحادثة لم تجر في بغداد أو كينيا .. أو دكا .. بل كانت في الرياض .. لذا أصبحت أدعو كل أصدقائي في حال حدوث حوادث مرورية بأن يتصلوا فور وقوعها  بصديق أو قريب للعودة بالسيارة وعدم ركنها .. حتى لا يحدث معهم ماحدث لهاني .. والله يستر كيف راح يكون عليه الحال بعد خمس سنوات 🙁
قبل أن أضع هاني طرحت عليه فكرة تحويل ماحدث لحلقة في طاش مثلا .. تسوى 🙂

24 رد على “مأساة قصة مواطن مع مرور الرياض !”

  1. هههههههههههههههههههه !!
    من جد تصلح حلقه لطاش .. .. آآآآه , ويبـ(ـن) يسقـ(ـن) بعد 😐 !!
    تخيلنا في هالحوسه .. فعلاً مأساااااة ..

    بس مسكين ربيعك يا ريّاااال .. قله يحتسب الأجر .. أجل من حجز لحجز !
    لا ومن صغر الرياض بعد !! الله يعظم أجره ..

    وبالنسبة لحلمك بوجود قاعدة بيانات في شي للحكومة كبيييييييييير , غلط يا أحمد !!!

    ضحكتني الله يسعدك 🙂 ..

  2. تسلم احمد على كل شي قلته …
    بمكن من المواقف اللي رسخت في بالي هو عدد السيارات الكبير بالحجز ” سيارات مالها والي والا وش القصة !! ” بعضها صدت وانصهرت وتفحمت ..
    وبرضوه تعامل رجال الأمن مع الشعب 🙂 ياحبيلهم رجال الأمن يقولون بك “افرد يديك وهزها افقيا” ما بقى الا يعطونك وردة ويودعونك ببوسة .. الله مير يخلف ..
    لكن كل هذا بكوم ويوم سأل الظابط في شرطة الصحافة ” تشك في مين ؟ ” استحيت اقول اشك في المرور !
    مشكور احمد على وقفتك معي مع انه في صباح اليوم التالي صدرت تصاريح حلوة من رجال الامن البواسل اكذر منها ” مسموح لك تتفرج مرة وحدة ” و ” ويمكن السوريين حاطين السيارة عندهم ” و ” وان مالقيتها تراها مسروقة ” تصاريح تدل على حنكة فريدة وتعامل راقي ..

    هاني

  3. ^
    ^
    ^
    ^
    ^
    هاني دامك اون لاين ياخي صلح موقعك .. تراك بتدخل موسوعة جينيس للأرقام القياسية في أكثر موقع مخترق .. عدل الاندكس على الأقل .. وقل لهتلر جدة ترانا صرنا حبايب.. والبلوي مشى خلاص 😀
    تذكرت لما دخلت مركز الشرطة انك ماقلت سيارتي مسروقة عشان تطلع من هالتحقيق .. فقلت سيارتي مفقودة .. احلى شي ردة فعلهم … هههههههههه جازت لهم مفقودة 😀

    nOuf.a.s :
    القصة مأساوية .. ماتضحك 🙂 ..
    بس في طاش بتتحول إلى قصة كوميدية

  4. ربك ستر واللـه .. حلووو ردك يا هاني السيارة مفقودة 😀 ههههههه (صح مسروقة قويه شوي!!ـ)ـ
    اهم شئ الحمد لله على سلامتكم بعـد مشاوير الحجز والمرور 😀 ..

  5. هناك العقلان.
    أنا أقول الله يعظم أجرنا بس
    من جد الحال من جرف لدحديرة.

    من هذا المنطلق أطالب بإلغاء جهاز المرور لعدم فاعليته (وجه يغمز)

    الله لا يحطك في هالموقف مره ثانيه ولا انا و لا القارئين.

  6. هههههههههههه
    شر البلية ما يضحك
    والله من جد تنفع لطاش
    بس يا قو قلبكم .. دوارة من الشمال للجنوب للشرق
    لو أنا كان رجعت البيت.. عساني ما لقيت السيارة
    إنت اصبر شوي لين يسوقون الحريم.. لأن وقتها احتمال كبير الأخلاق تزين
    وإللي رد على التلفون يقول (يسعد مساكم هنا مرور الرياض أي خدمة من عيوني الثنتين ) هههههههههههههه
    وبرايفت لهاني…. ألف سلامة لسيارتك وما تشوف شر.. ومرة ثانية ركب لها جي بي أر إس عشان تلقاها طوالي بدون لفلفة ( وبعد عشان ما تتعب أحمد معك 😉 )

  7. اسمع يا عم احمد
    اخوي صدم ودخل المستشفى واانا كنت اول الحاضرين
    طبعا مالقينا سيارته بعد الرجوع للموقع
    رحت للمرور وما لقوا ملف الحادث فرفضوا يعطوني ورقه تسمح لي اني اخذها من حجز لبن
    كنت اانا بنفسي ادخل الغرف وادور بين الملفات بدون مبالغه دورت في اكثر من 50 ملف كل ملف فيه اكثر من 30 حادث (تقارير طبعا)
    طبعا الكلام هذا كان خلال يومين متتاليين .اطلع من المستشفى (مرافق مع اخوي) الى مركز الشرطه بالناصريه من 10 الصباح الا 1 الظهر او بعد 2

    الكلام اني تركت السياره شهرين بالحجز الين طلع اخوي بالعافيه وجاب واسطه وطلع السياره بنفسه
    صدقني اختصرت الكثيرررررررررررر من الاحداث الي صارة معي هناك (يعني اني مختصر)

    اسف على الاطاله

  8. خخخخخخخخخخخخخخخ وقسم تحمست تخيلت نفسي بمكانكم وين راح تلقونها ونااسة اكشن 😛
    خخخخخخخخخخخخخخ وجااازت لي سيارتي مفقوده 🙂
    طيب الحين لو من البداية سامح الرجال والأخ هاني وانتهوا كان ماصار هاللي صار
    وبرضوا يمكن لو كل رجل مرور مسؤلا عند رؤيته لحادث او مشكلة مرورية فيقوم
    بمتابعتها او وطلب من يتابعها بدال كل واحد يرميها ع الثاني
    اما تعاملهم طبييعي أغلب موظفيين الحكوميية كيذا ومره مع عمي وقفنا عند نقطة تفتيش
    وااضح من تعاملهم.واجزمنا من بعدها (((ان رجل الامن كلش مو مثــقـــف)))
    وبرضو شكلهم بيكرهونكم فيهم عشان ماتعدوونها
    وصدق احسن تعاملهم كيذا عشان شبابنا يشلون هم انهم يفتحون عيونهم زيين يعني الأخ هاني
    اجزم انه الحين راح ينتبه واهو يسوق أكثر من قبل كل مايذكر هالحداثة درس يتعلمه 🙄
    وجد اهنيك أحمد ع صبرك وفزعتك كونها معروفه بهذلتهم اهو سيارته وخطاءه يتحمله بس أنت
    خخخخخخخخخ لوأنا منك كان قلت صديقي ع عيني وراسي لكن الله يستر عليك انت وسيارتك 😛
    ويالله الحمد الله ع سلامة عودة السيارة لصاحبها رحمتها من مكان للمكان وعساكم ماتعدونها 🙁

  9. والله رحمتكم .. يالله الحمدلله على السلامه و العقلان
    ثانياً .. الناس وصلت للقمر وهم يقولون روحوا للحجز الفلاني وَ للمكان العلاني ( يا إلهي ماذا يحدث في أنظمة البلد ؟ .. ألا يوجد شبكة انترنت .. ألا يمكن وصل جميع نقاط الحجز بحاسب مركزي يمكن البحث فيه من أي مكان ) … بس من جد مسخرة

  10. صح تذكرت مره حصل معي موقف مع المرور ( لا تستغرب ) .. عندما تعرضت لحادث سيارة أثناء توجهي للجامعة … مع ان سواقنا مو غلطان .. قال رجل المرور لسواقنا : انزل من السيارة وتعال معنا .. قلت له : على وين ؟ .. قال : معنا للمركز .. قلت : هذا اللي ناقص وَ الله ما يتحرك لحد ما يجي أخوي ( حسيت نفسي قوية , يمكن الاصابة اثرت فيني ) .. و لا همهم اصابتي و لا عبروني .. اقول بس كيف الحال ؟

    أحمد .. دمت محب كما تحب

  11. بسم الله
    الوضع بهـذا الوطن لايطــاق فى جميع المجالات ……………………………………. ,…………………………,………..

    اشييـأء تقهر ….

  12. شووو هالرمسه 😐 < XD

    من صجكم انتوا ..؟! ..
    انزين شاللي وداها عند المطار ..؟! خخخخخخخ قصم قصم شر البليه ما يضحك !!

  13. هدا والسيارة وهاني الحمد لله سليمين وما صار شي
    أجل لو أحد عمل حادث وكان ( يسوى ) اش يصير فيه؟!!
    ضحكني رد العسكري: ووش عندك 😀
    لو كنت مكانكم كان قلت: سلامتك بس عازمينك على العشا خخخ

    نفسي في يوم ألاقي موظف حكومي شغّال زي خلق الله!!

  14. الله يرحم حالنا بس !!

    اجل يقولون تلفت يمكن تلقاه منا ولامنا

    تذكرت مررهـ كنا رايحين نستلم سيارة السواق قبل فتره

    من احد المعارض اللي بطريق خريص “اتجاهـ الغرب” المهم وقفنا السيارة اللي معنا

    وقلنا نبي نجرب السيارة الجديد :d وبعد التجربة والدوران بشوارع الرياض الحبيبة

    رجعنا من بكرى ونبحث عن السيارة ولاحصلنا شي ! وبعد اخذ المشوره بالتبليغ قالي الوالد اسأل حقين الوكاله

    يمكن ممنوع الوقوف بغير اوقات العمل الرسمي 🙂

    عاد المضحك اني اول سألت واحد من اللي مروا من جنبي وهو طبعا يشتغل بنفس الوكاله

    وسألته ممنوع الوقوف هنا قال :لا بس اذا لك سياراة رح دور بالحارة اللي ورانا تبي تحصل سيارك

    سألته عن السبب قال انه حقين المواكب يسيرون على كل اللي بالشارع ويضفون كل المواتر

    ويجدعونها بالحرارات المجاورهـ

    لكن للامانه بعد “البحث والتحري” بالحاراة ولله الحمد لقيت السياراة :d

  15. خاطرة بيضاء :
    الله يسلمك .. وعلى قولتك ربك ستر 🙂

    majnonaha :
    المرور يبي له خصخصة .. والشركات الأمريكية والأوروبية على قفا من يشيل .. تضبط كل السيتسم وتاخذ نسبة على المخالفات بس ..

    فرح :
    في حياتي مالفيت الرياض مثل هذاك اليوم
    بس المشكلة كل ماصار شي .. زاد أمل اننا نلقاها في المكان الثاني .. وعلى كذا ماوصلنا شي ابد

    مهند :
    يخرب بيت العدو .. وش اللي شهرين ؟
    من جدك ؟
    يعني ماصار لنا انا وهاني شي ابد 🙂

    ليان :
    من ناحية أكشن .. فكان أكشن مافيه شك 🙂
    المشكلة انا ماعلي من رجال الأمن .. يمكن تعليمهم وثقافتهم على قد حالهم .. لكن النظام .. ليه كذا ، ترى راس مالها 10 أجهزة كمبيوتر في كل حجز .. وأي سيارة ماتدخل الحجز إلا بعد ماتنظاف على قاعدة بيانات رقم اللوحة لون السيارة ونوعها ، ويقدر اي واحد من برا يشيك اذا السيارة موجودة ولا لا .. بس واضح يبي لنا سنوات عشان توصل هالمستوى 🙁

    light :
    ههههههه هذي يبي لك ترفعين قضية عليهم 🙂
    بس مرة صارت قدامي وسحبوا السواق .. والعائلة اللي معه بلشوا وقفوا لموزين وسط الزحمة والناس تتفرج .. مافيه اي درجة انسانية !

    عهود :
    جازت لي ( لا يطاق ) 🙂

    roogyz :
    وهو هذا سؤال المليون .. من اللي وداها عند المطار .. وليه نزلها في طرف الشارع .. !

    asma :
    هههههههه والله لو اننا مروقين شوي كان قلنا له هالكلام .. بس وقفتها كنا معصبين على الوضع ونحش في المرور وادارته 🙂

    fares :
    من جدك ؟
    ياخي معناته ان الوضع أدج مما كنت أتخيل !!

    فهد :
    انت تقوله .. مبسط في استراليا ولا عندكم مثل حجز لبن ولا السلي

  16. سلام عليكم مساء الخير اخوااني جميعاً
    كيف حالكم
    انا الحقيقه قريت المقال كذالك الردود وانا اراء فيها شيء من المصداقيه واللي حاصل فعلاً
    لكن عندي سؤال لكم
    الان بحكم ان الاخ وقع عليه حادث ليش ترك سيارته على الدائري وعلى طريق رئيسي
    وهو يقول انها صدمه لاتكاااد تذكر..انا اقول لك احمد ربك اللي سيارتك وجدتها بدون صدمات
    لان حقين المواكب لايفرقون بين هذا وهذا انما اهم شيء السياره تتحرك من الطريق
    اما عن عن كلام الاخ احمد لما يقول محتاجين خصخصه للمرور فانا اقول اصبر فان الحوادث سوف تستلمها شركه اسمها نجم وسوف تتمنون روجوع المرور للحوادث لان هناك تجاوزات سوف تحصل على حقوق اصحاب السيارات
    واتمنى منكم وبكل صدق الدخول على موقع مرور الرياض وكتابه شكاوي لمدير مرور الرياض لانه كل صباح وعند دخوله لللمكتب يجدها امااااامه وهو من المكثرين للدخول على الموقع الرسمي لمرور الرياض

  17. هلا بك أخوي رجل مرور وسعيد بتواصلك ،،

    هاني ماترك له خيار ، الجماعة ركبوه الدورية وعلى القسم .. هذا أولاً ..
    ثانياً : لم يثبت حتى الآن أنها سحبت من خلال أمن المواكب ..
    ثالثاً : سوء شركة نجم سيصل إلى أي حد ؟ .. صدقني في حالة هاني تحديداً حدث تجاوزات تودي إلى محاكمة وليست شكوى .. ولولا أن (هاني مو فاضي للروحات والجيات) كان كبر الموضوع ، سيناريو يحبه قلبك ..

    عموما سعيد بتواصلك وآمل زيارتك للموقع بشكل دائم ..

    أخوك / أحمد

  18. هلا فيك اخوي احمد
    اولاً ياخي صديقك هاني اكيد غلطان بالحادث اولاً ولايوجد معه تأمين او لاتوجد لديه رخصه
    وللذالك اجباري على رجل المرور انه يأخذه معه للقسم لحماية حق الشخص الاخير
    اما عن شركة نجم هذي فالله المستعااان شركه خاصه والعاملين فيها سكورتيه فما بالك وهم رجال امن حقين المرور يالله يقدرون يسيطرون على مشاكل الحوادث وكثرتها فماذا يتوقع من سيكورتي!!!!!!!!؟

  19. صدقني اخوي هانيما تسبب بالحادث ، والسيارة المتسببة فعلا كان يقودها شخص مو مالكها ولا معه تأمين

    بس عاد وش تسوي ، حكم القوي

    ولا قد اعتراض ورح للمرور .. وتعال وجب ، والسالفة كلها اصطب خلفي

  20. تدري يا أخ احمد أن المرور يعانون من أمراض نفسية والسبب من القوى العاملة والمدير

  21. اخ احمد اول شي رجل المرور الي في مرور شمال يقدار يستفسر عن طريق تلفون يتصل علي الحجز ويسال المسول في الحجز بعدين الحجز فيه كميوتر مسجل فيه جميع المركبات الموجود دخل الحجز
    اما رجل المرور الي رفع الحادث شي طبيع ياخذ مع المسول في الحادث لانه مسوليه عليه بعدين قسم مرور الشمال ما يستلم التقرير لي اذا معه طرف المسوال او تامين علي المركبه بس مع حترامي الاخ هاني المفروض انه امن سيارته ما كان امن لو طلب من رجال المرور انه يوقف في اي مكان ان كان رجل المرور لا يرفض
    المعلوميه اخ احمد انا رجل المرور اكثر وحد يتعب في الميدان انت توقع كم حادث يرفعه في ست ساعات او جميع شغل على رجل المرور انت للاحظ طريق الملك فهد مزحوم ربع وعشرين ساعه
    بعدين انت تذكر عيوب ولا ذكرتو ا اليجابيات التي فعله رجال المرور عن تخفي السرعه علي الخطوط سريعه
    وشكرا اخ احمد

  22. هههههههههههههههههه ولقييتووو السيااره آآخييرا بعد العنااااء 😀 هههههههه بس اما طاش ماطاش تصلح وزوود انت عبدالله سدحان واخوك ناصر والله بتكوون حلقه مميزه … 🙂 بس تعلمتو من هالتجربه هذا اهم شي ..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *