قوقل تفتح فرع في السعودية ..

googlesa.jpg

لوحة مثل هذه تؤكد وبكل بساطة .. بلد تجارته فيها أي كلام ، وكما نقول باللهجة العامية ( ماعندك أحد ) ، ضع ماتريد على لوحة المحل وأعلنها أمام الملأ ، سم المحل بما شئت .. ، عموما هذه الصورة التقطتها أول أمس جنوب برج المملكة تقريباً بـ 200 متر  ، ويبدو لي أن صاحبها تحايل على النظام من منطلق أن الكلمة عربية وربما يأتي بمصدر للكلمة قوقلة يقوقل أو جذر ثلاثي للكلمة وانطلق من خلالها .. لكن كيف يسمح له النظام .. ولا يخفى عليكم أن الكثير من المسميات التجارية تأخذ نصيبها بسهولة ، فندق الجزيرة بشعار قناة الجزيرة ، شقق العربية المفتوحة بشعار قناة العربية ، قبل فترة قرأت صالون الزعيم بشعار ومسمى موقع الزعيم الالكتروني .. ألا يوجد نظام .. ألا توجد متابعة ؟

16 فكرة على ”قوقل تفتح فرع في السعودية ..

  1. أحمد … حياك الله

    الموضوع هذا لفت انتباهي بالشرقية … لو تجلس هناك اسبوع فقط كان يلفت انتباهك
    حلاق باسم وشعار قناة العربية … والفروع حدث ولا حرج

    سلام يا سكره
    سلطان

  2. يقول ســــالم:

    هذا حتى إسم للمكتب ماله خلق يتعب علية و يفكر بشي جديد … أحمد إستثمر عندة شكلة ثقة وعنده خبرة من شركات الإستثمار التجاري و توظيف الأموال بمصر 🙂

  3. القهر لما يجيك شخص ويقلد شي غلط ..
    خله يتمتع بقوقل او الجزيرة ..
    لكن أنه يقلد مثلاً أحد القنوات الغنائية .!
    هنا يحسب له ألف حساب !؟

  4. يقول .....:

    أنا أرى ان هذوولي مالهم شخصية !!!

    يتوقعون هذا الاسم فني p;

    وراح يجييب زباين !!! لكن انا اول من (ما) راح يدخله (ذابحني الاستثمار)

    احنا العرب كذا ماعندنا هوية بس نعرف نقلد حتى في برامجنا !!!!

    اشين برنامج شفته مثلا برنامج الجفالي !!! على باله donald trump !!!

  5. هالمحل شفته قبل شهرين تقريباً وتناقشت مع اللي كان معي وقتها في السيارة عن الاسم ..
    المحل على ما اذكر في الحارات اللي ورا المملكة ان كاني ما نسيت ..

    بس كويس اللي ما سرق الاسم والشعـار بعـد …
    وما تدري يمكن احناا متهمين الرجال بالغلط 😀 يمكن اسم ولده ولا بنته ولا شغالتهمـ كل شي جايز !

  6. يقول مهند:

    حياك الله في مدينه العجائب

    بتلقى بكره محل جنبه اسمه (ركن قوقل)
    طبعا كلمه ركن بتلقاها صغيررررررررررررره وقوقل كبييييره

  7. ههههههههههههههههههههههه !

    يارب نحمدك على نعمة العقل 🙂
    يعطيك العافية أحمد 😀

  8. عالم من جد تعبانة ما عندها حتى استعداد تفكر في اسم عدل
    تخيل حتى عندنا في ماليزيا صرنا نشوف محلات بمسميات عربية مثل روتانا سايبر كافيه!!!

  9. والله ياأحمد المشكلة دائماً تواجهني وأنا أتجول في الشوارع ….

    أقول : والله حرام … وين الحقوق !

    وين الغرف التجارية عن هالخربطة , أو أهم شي تسدد الرسوم …

    أتوقع أنهم يسهلون عشان بكرى تطلع مطالبات و و و وهم يكسبون مبالغ بعدها …

    يعني من هنا وهناك ….

    تسلم أحمد على التدوينة 🙂

  10. يقول سليمان:

    لاحضت هالشي انتشر من فتره ….ويمكن من فتره ليست بالقصيره
    قبل عشر سنوات مع ضهور نجم زين الدين زيدان في كاس العالم 98 اتدكر ان في كثير من المحلات سمت نفسها على اسمه…وغيرهم كثيير والامثله كثيره
    لكن من وجهة نضري لاارى بانها قد تصل الى حجم ان توصف بالمشكله الكبيره التي تحتاج الى حل وتدخل من الجهات المسئوله!!

    اعتقد ان لدينا امور ومشاكل نحتاج الى نفكر ونتحدث عنها اكثر من المسميات ..وبالدات على المستوى التجاري والاقتصادي.

    سلام

  11. أهلاً أحمد.. 🙂

    أنا ودي أشوف عقل اللي اقترح هالأسم..
    هل يتوقع الناس إذا شافوا الأسم بيجونه؟
    أو بيصير على محله إقبال؟؟!!

    والله شيء عجيب، وتفكير أعجب وأغرب!!

    قلّت الأسامي ؟
    ندرت الأسامي؟
    والله الأسماء على ئفى من يشيل 🙂
    بس بعضهم يحب يتميلح ويتفلسف..
    الله يعننا بس

    شكراً أحمد ..

  12. على فكرة
    شكراً أحمد على وضعك لرابط تدويني على اليسار 🙂

    هذا من لطفك وذوقك..
    تحياتي 🙂

  13. ههههههههههـ..

    أضحك الله سنّه!

    لم تضحكني قوقل بل أضحكني أنها للإستثمار التجاري!
    أحلى مافي الموضوع إن صاحب المحل يظن إنه صايد الحركه ألحين!

    تسلم لي أحمد على هالتدوينات..

  14. سلطان : الظاهر حلاق العربية قد شفته مرة في الحسا وحتى خلفية اللوحة مخليها خلفية الاستديو .. يعني ماخلى شي ابو الشباب 🙂

    ابراهيم عبدالغني : وووووووووين يوصل يابراهيم .. صعب صعب ، بعدين وش يقرب لك حسين 🙂

    سالم : تهقى ؟ .. أجل يبي لنا نسير عليه ونشوف

    مشغول : الكبير كبير 😀
    وصلوا القنوات الغنائية بعد ؟ ..
    والله مهوب سهلين ..

    …… ، :
    هو التقليد أحياناً شي ايجابي ، والواحد لما يقلد في البداية يتطور ويتغير ويقدر يطلع أشياء جديدة ، مثلا الصناعة اليابانية كانت تقوم في البداية على التقليد .. والآن كيف وصلت ، والصين شغالة في هالمجال وبدت تطلع عندهم صناعات كويسة ..
    اللي صاير حقين سرق اللوحات مهوب تقليد إلا .. ( دلاخة 🙂 )

    أقرب البعيد : قوية شوية .. ولده اسمه ( قوقل ) .. ترى ماقد سواها إلا هذا اللي في السويد .. أما يجيك واحد سعودي واسمه قوقل .. ماتمشي .. يابن الحلال زارف الاسم زي السلام عليكم 🙂

    مهند : هههههههههههه في هذي صدقت ، والدليل شف كم محل مكتوب عليه ( السعادة ) بخط كبير وفي الاخير لما تدقق تحصل ( خياط ركن السعادة ) ، ( مطعم حدائق السعادة ) ، ( حلاق صاحب السعادة )

    أدهم : الحمد لله على كل حال .. بس مع ذي الاشكال مالك إلا تضحك وبقوة بعد

    asma: اوكيه فيه ناس تجيبها بحركات حلوة .. لكن أبو الشباب ما أضاف شي .. شركة قوقل .. يعني كأنه قاط معهم في التأسيس ..

    بدر الشايع : لا والله مهوب الظاهر اخوي بدر ، الغرفة التجارية والوزارة تدقق في الاسم وياما تنشب في حلوق العالم عشان الحقوق .. وفيه كثير من الزملاء اضطروا يطلعون الاسم باسماءهم الرباعية لين يحصلون حل ، بس عاد شركة قوقل .. شكله مشاها بطريقته الخاصة

    سليمان : إلا يخوي سليمان مشكلة ، لازم يكون فيه كنترول على هالشي وحط في بالك ممكن هالامور تخلي الشركات الكبيرة تبعد عن دخول السوق السعودية لأنه صار كنه حراج ، يعني مثلا تخيل بوفيه عادي بيض وفلافل اسمه بوفيه مايكروسوفت .. ولا حلاق انتل وبالانجليزي بعد .. صدقني بتعطي سمعة دمار .. وبنصير كننا دولة متخلفة مافيها أي تنظيم ..

    محمد : لا هو بياخذها من ناحية تكوين اسم في السوق .. يعني لو أقول لك ( شركة الاستثمارات العربية المتحدة ) ولا ( شركة قوقل ) .. الاسم الاخير راح يترسخ في ذهنك ويمكن يسوي لك دعاية غير مباشرة ، وعلى كلام واحد من الشباب صاروا حقين المكاتب اللي ورى المملكة يوصفون من لوحة ( شركة قوقل ) لأنها صارت معروفة ..

    حياك الله ويسعدني تواصلك

    تركي : ههههههههه يابن الحلال زين ماحط اللوقو .. عشان تكمل 🙂

  15. يقول العتيبي:

    السلام عليكم

    ليه تستهزؤن بالناس من جد انتم الي تفكيركم مدري ايش اللهم لا شماته كل شخص وله فكره بس ما توصل انه كل واحد فيكم ياكل لحم الرجال كما قال الرسول عليه الصلاة والسلام( ايرضى احدكم ان ياكل لحم اخيه حي فكرهتموه ) وبعدين تبغون تصلحون الخطاء لا تصلحوه بالمثل ولا تفضحون وتشهرون بالناس كنمام اذهب عندة واجلس جلس رجل صاحب مدونة وخذ افكره واقواله بخصوص تسمية محله بهذا الاسم وبعدة اكتب مقالك بالشي المعقول دون التطرق بالاستهزاء او التقليل في الناس وبعدينا لو نظرنا على محتوى عقولكم لوجدنا انكم تنظرون على امور اعتبرها شي عايدي وتتركون امور تستحق النقاش فمثلاً موضة طيحيني الي نص الجنز طايح ليه ما تتناقشون فيه وكذلك تقليد الشباب للقصات الاجنبية والمغنين ولا هذا شي يشرف وعظيم والرجل مسكين فاتح محل يترزق الله وامكن احسن مني ومنك عند الله واغنى مني ومنك بمكانته وماله وامكن عنده الاستطاعة يشتري قوقل واي شركة يتمنها المهم ارجو ان يكون كلامك بحدود التقيد في عدم الاستهزاء وتوجيه النصائح التي تفيد كل من يقرا مدونتك والسلام عليكم

التعليقات مغلقة.