عالم الجوال .. بدون اتكيت

دأبت في العامين الماضيين ، على عدم الرد لأي أرقام هاتفية جديدة تظهر على شاشة جوالي ، سموني ماشئتم .. ( مصلحجي) .. ( أناني ) الخ ، فأنا في الحقيقة يهمني في يومي أمرين ، حينما أكون في الدوام .. تهمني بالدرجة الأولى أرقام هواتف أبي وأمي واخوتي ، وحينما أكون في المنزل .. يهمني رقم واحد ألا وهو رقم ( الجريدة ) ، وبالطبع في الدرجة الثانية تأتي الأرقام المخزنة في ذاكرة الهاتف سواء أقارب وأصدقاء ، لذا .. حين يظهر رقم جديد غير مخزن اعتدت على عدم الرد مالم يرسل صاحبه رسالة قصيرة ، فسبب عملي في الجريدة ترد الكثير من الاتصالات المتعددة سواء من قراء يريدون تعليقاً ولا يهمهم لو تحدثوا ساعة كاملة أو حتى من الجهات الأخرى التي تريد من الصحفي الحضور للتغطية .. لذا درءاً لـ ( وجع الراس ) أصبحت لا أرد على الأرقام الغريبة إلا في أوقات الفراغ أو حين أقود السيارة ، أحياناً أجد صاحب الرقم الغريب يعاود الاتصال لأكثر من عشرين مرة في وقت وجيز وكأن الأمر حياة أو موت ، كلما عاود وكرر اتصاله تزيد لي القناعة بعدم الرد .. يتحول الأمر إلى ( عناد ) ، لذا أحترم كثيراً من يرسل برسالة معرفاً بنفسه في حال لم يجد تجاوباً مع الاتصال الأول أو الثاني ، وفي الواقع بالنسبة لي أصبحت أرسل رسالة بأسمي وجهة عملي في حال أن الطرف الأخر لم يرد على اتصالي وغالباً ما أجد التجاوب .. ربما ليس لاسمي ولكن لاسم الصحيفة التي أعمل بها .
قبل يومين احتجت رقم مسؤول لمحادثته لكن أحد الزملاء أملى على الرقم خطأ ، فحين الاتصال لم يرد الطرف الثاني .. بسرعة أرسلت اسمي واسم الجريدة إلى الرقم المذكور ، بعد دقائق جائني الرد ولكني تفاجأت بأنه ليس الضيف المقصود حيث كان صوت شاب صغير السن ، نعم ماذا تريد ولم ترسل لي اسمك .. قالها لي بشكل ينم عن غضب ، وبسرعة أجبت : آنا آسف ، لقد اخطأت في الرقم كنت أريد رقماً آخر ، لكن صاحبنا رد وبعنف هذه المرة : ( وين أصرفها آسف ذي .. قلي من عطاك الرقم .. قل .. هو خالد الشمري ؟ ) .. أجبته : يخوي غلطان لا شمري ولا يحزنون .. وبعد شد وجذب ولأول مرة أجد فيها شخصاً يرفض الأسف مقابل الاتصال الخاطئ .. اكتشفت بأني أعطيته مجالاً للسب فأغلقت الخط وهو لا زال يواصل تهديده لي .. ولخالد الشمري لأنه أعطاني الرقم ..لا تسألوني من هو الشمري هذا .
كان بجانبي أحد الزملاء وأخبرته بما حدث ، نقل لي قصة مشابهة له حيث أخطأ في رقم ثم اعتذر بعد سماع صوت الطرف الآخر ، بعد لحظات الطرف الآخر اتصل على صاحبنا مجدداً وهو يحذره ( يخوي خلاص لا عاد تتصل .. البنت تزوجت وراحت .. لا تتصل ) ، رغم أن صاحبنا فقط أخطأ في الرقم .. ولكن تأملوا الحالة النفسية التي يمر بها الطرف الآخر .. لقد أصبح يعتقد أن كل اتصال خاطئ هو لمحادثة البنت والله يعلم ماذا يدور من تفاصيل حول تلك الحكاية .

12 رد على “عالم الجوال .. بدون اتكيت”

  1. السلام عليكم
    من زمان يا احمد عنك 🙂
    حنا للاسف مجتمع شكاك ودايم يسبق الشر في تفكيره وحكمة على الاخرين ، فما بالك في شخص ما يعرف الا صوته بس .
    اتصور ان رفيقك الي اتصلت عليه ضحية مجتمع لا تلومه 🙂

  2. أولا : كل عام و إنت بألف خير .. في ناس لليوم معيدة و ناسية إنه مضى على العيد أكثر من أسبوع 😉

    ثانيا :

    تجربة عجيبة الصراحة :D:D

    يعني مصمم إنك متصل عشان تزعجه

    1

    أحيانا يجب علينا أن نعذر الطرف الآخر .. فنحن لا نعرف بما مر فيه ليتصرف هذا التصرف ، بالرغم أنني أعارض هذا التصرف تماما خاصة و إنه دائما يوجد هناك احتمال كبير بأن المتصل قد يكون أخطأ في الرقم.. لكن في النهاية أقول : اتخذ لأخيك و لو سبعين عذرا

    2

    للأسف في هذه الأيام نسي الناس معنى الأسف و كيف أنه يعتبر أسلوب حضاري جدا في التعامل مع الآخرين …فتراهم عندما يخطئون لا يعتذرون … و إن اعتذر لهم الآخرون يرفضونه بحجة كالتي ذكرتها .. و هل كانت هذه الكلمة في يوم من الأيام تصرف في غير الصفح و العفو؟؟!!

  3. مرحبا …..

    صراحه ضحكت على قصتك لان المشكله احيانا عند الخطأ مرة واحده تهون :))

    المشكله اذا اتصل فيك برقم غريب ورديت طلعلك شخص قالك انا غلطان اسف .. وتقفل السماعه وبعدها تنام وتلاقي 20 اتصال من نفس الرقم !!!!!!!!!!!!!

    هنا وش العمل …اما تبتسم او تبكي ……

  4. ******
    مهند
    ******
    مو لازم يكون ضحية مجتمع وليس احنا نبحث له عن عذر يامهند
    قل فيه مرض نفسي .. فيه خلل بمخه .. ممكن
    عموما تفاجأت اني لما أسولف باللي صار لأحد ثاني أحصل عندهم مواقف شبيهه
    ياكثر المنتهين أجل

    ******
    إيمان
    ******
    هلا وسهلا وانتي بخير اخت ايمان ..
    ممكن البحث عن أي تبرير لأي شخص فيما لو قام بتصرف غير طبيعي ، لكن شخص تخطي بالرقم وتقول آسف ويرد يقول ( وين أصرف آسف فيه ) .. هذي تؤكد ان فيه إن ..وبصراحة لما سكرت رحمته على هالمستوى اللي وصل له .. يعني كيف يعيش يومه في الدوام .. في الشارع .. مع الاقارب .. مشكلة كبيرة ..

    ******
    سديم
    ******
    اتوقع انه اتصل اكثر من مرة دام ان الطرف الثاني صوت انثوي .. وربعنا مايحتاج ، لو الوحدة تسلم عليه وتقوله السلام عليكم .. يمكن يقول البنت حبتني :)!

  5. هلا بالصقيق احمد 🙂 ..

    والله صحكتني بهالسالفة اللي صارت لك بس تصدق فيه ناس للأسف تعتقد انك متصل
    تستهبل او تدور على بنت ( شف وين وصل تفكير بعض الناس ) !!

    انا حصل لي موقف شبيه لك وهو انه صار يتصل علي شايب على الساعة 12 بالليل او وقت متأخر
    احياناً .. ويعتقد اني صديق ولده ويقولي وين فلان .. ليش ما جا للحين للبيت !!..
    اقوله يا عم من تبي بالضبط يقول فلان مو صديقك قلت لا ما اعرفه .. قال باللهجهة القصيمية
    ( اقطع واخس الا صديقك بس ان تنصب) !!..
    والظاهر ان ولده معطيه رقم غلط وطاحت فوق راسي ..
    لين الله فرجها علي وغيرت رقمي وارتحت من الشايب هذاك 🙂 ..

    ربك يعين يا أحمد ..

  6. تبي الصـدق سالفتك صعبة مـع ” خالد الشمري ” 🙂

    صارت لي نفس السالفة مرة طلعت منها بتحقيق عن اسم اللي تبيه واسمي الظاهر ما باقي الا اسم سواق الجيران 🙂

    بالنسبة لسالفة الارقام الغربية اتوقع انه في تقارب كبير بيني وبينك من هالناحية

  7. عفوا ربما يكون فهمي خطأ ،ولكن كأنها دعوة عامة للمتصلين بك للتعريف بانفسهم ،هدا من ناحية ،ومن الناحية الاخرى ان الناس صارت ضيقة الصدر لاي خطأ قد يحدث ،ودائما سؤ الظن وارد، والله يوسع صدرك ياعمي أحمد خاصة بحكم مهنتك الشاقة ،

  8. ******
    مشغول
    ******
    زينة ان جات على هالشويب .. أحسن لك مايطلع لك حرمة لسانها يوصل ترينداد وتوباغو ويرجع يديور مرة ثانية ، بعدين جرب امسك خط مع الشايب وقل له مثل حقين القناة الأولى ( كيف كان العيد أيامكم ياعم 🙂 ) .. ياربييييييه ان جاك عوض مدري معيض القحطاني ههههههه

    ******
    أقرب البعيد :
    ******
    من جد خالد الشمري هذا ورطني حسيت ان فيه ازمة بين صاحبنا وهالشمري .. مدري وش بينهم .. السالفة فيها بلى وبس
    حياك وياهلا ومسهلا .. بعدين خل الكسل عنك واكتب دايم ولا قفل المدونة يخوي 🙂

    ******
    هناء
    ******
    أهلاً هناء ، في الواقع أنا أتحاشى الاتصالات التي تصلني وقت العمل ويبدأ صاحبها بالاستخفاف بالدم على شاكلة ( ماعرفتني ، صوتي ماسبق ومر عليك ) .. وألغاز وحزازير حتى أوصل لمعرفة من المتحدث ، في الحقيقة ( ماني فاضي ) ، لذا أحب الاتصالات الاحترافية .. اما التعريف أولاً بنفسه أو على الاقل من رسالة ، أما عمل الجريدة فيوجد لي تحويلة ثابتة يمكن التواصل خلالها ، من خلال الهاتف الجوال قد أكون بالخارج أو مع الأهل أو حتى نائماً .. الجوال هاتف شخصي في نهاية الأمر ..
    شكراً لتواصلك

  9. مرة بنت ااختي الصغيرة خذت جوالي وارسلت لصديقتها ايام الشهادات
    (تراي بكرة رح اروح المدرسة الساعة 8 )
    وصدفت انها غلطانه بالرقم وهي ماتدري وانا بعد ماكنت ادري
    وكل يوم اشوف هالرقم يدق ولا ارد محسوبكم انا موسوسة ومالي في وجع الراس هذا

    بعد شهرين تقريبا جاني اتصال من هالرقم الفجرية لاشعرويا من الخوف رديت على بالي احد فيه شيء
    اثاري صوت حرمة يلعلع ياللي ماتربيتي تواعدين رجلي وتمهوين تكتين مدرسة ورازة اسمك ( ثم تقول اسم بنت اختي الصغنونة )بعد هذا رقم رجلي وياويلك ان ارسلتي له وكلام اعوذ بالله حاولت اتفاهم مع هالنسرة وماقدرت وبالنهاية عطيت الجوال لامي تتفاهم وتوضح ان المسج من طفلة
    قامت هالمحششة تقول لامي انتبهي على بنتك تراها راعية رجال وتلعب عليك !!!!!!!!!!!
    تخيل وين وصلت السالفة شهرين وبسبب رسالة خاطئة من طفلة وواضح من مضمونها انها لحضور مدرسة وش سوت فيني
    مااقول الا حسبي الله ونعم الوكيل

    تدرون وش صرت اسوي هالحين اذا جاني رقم غريب
    ارفع السماعة واسكت خخخخخخخخخخخ ان طلعت الو انثوية رديت وان كانت الو ذكورية سكرت
    وان تكرر الاتصال فوق 10 مرات ارسل السلام عليكم ورحمة الله وبركاته من المتصل جزاك الله خيرا
    علشان ان صار راعي لعب مايدق بيقول ذي ملتزمة خخخخخخخخخ
    فكرتك مرة حلوة في التعريف بس صعبة نعملها يالبنات
    مهوب كني قرقرت واجد خخخخخخخخخخخخ
    بس والله من شر مااونس

  10. اخت موسوسة قصة مثيرة بصراحة ، مدري كيف هالعالم عايشين

    معقولة هذي أمراض نفسية ولا مشاكل مستعصية ، وش السالفة بالضبط

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *