وأخيراً .. بعت الدب

في وقع الأمر ، أنا من النوعية التي تحرص كثيراً على التدقيق والتمحيص حين شراء أجهزة جديدة ، جوال .. فيديو .. تلفزيون .. لابتوب .. حتى السيارة ، لذا لم أندم مطلقاً على مشترياتي السابقة ولله الحمد ، أبحث عن أي معلومة في الانترنت وخبرات الآخرين في المنتديات والمواقع المختلفة ، وسؤال الزملاء والأصدقاء خارج إطار الانترنت حول المنتج ، إضافة إلى التثبت الشخصي حين اتجاهي للسوق ودخول أكثر من محل قبل اختيار السلعة .
فقط في جوال N80 كان الأمر خلاف ذلك ، فللمرة الأولى أستعجل في استبدال هاتفي بآخر ، وللمرة الأولى أيضاً أنتقل لجهاز دون الاستماع لخبرات الآخرين وانتقاداتهم ، في حقيقة الأمر استعجلت الشراء قبل أن أترك الرياض لمدة شهر كامل في شهر يونيو الماضي ، لذلك فلم يكن الخيار مطروحاً أمامي بالبحث والتروي قبل اختيار جهاز جديد ، فأنا أرغب في استبدال هاتفي القديم قبل أيام من الرحلة .
اشتريت الجهاز وأنا سعيد بمواصفاته رغم سعره المبالغ فيه ، شعرت ببعض الندم للوهلة الأولى وأنا أضع هاتفي في بنطلون الجينز قبل دخول المطار ، أدركت كم أن حجمه كبير ووزنه ثقيل بشكل لم يكن مسبوقاً لي ، مع مرور الأيام كرهت تقنية فتح الغطاء لضغط الأرقام ، لم تكن مريحة ولا عملية ، هذا أبسط تعليق .
عقب عودتي حاولت التعايش مع الجوال لشهرين إضافيين ولكن لا فائدة ، حينها قررت الطلاق بشكل رسمي وبيعه في أقرب فرصة متى ماكان هناك جهاز في السوق يستحق الشراء ، وبالفعل اتجهت الاسبوع الماضي لمحلات الاتصالات .. وتخلصت من عبء هذا الجوال الثقيل ، ووالله كان الأمر في المحل أن الجوال كأنه دين قمت برده إلى صاحبه ( بالعربي افتكيييت منننننه ).
في نفس اللحظة قمت بشراء جوال N73  وشتان مابين الجواليين ، هم يتفقان في كل تقنية وفي كل شيء داخلي باستثناء عدم توفر الوايرلس في الجهاز الجديد ، والأمر الأهم أن الجهاز الجديد خفيف الظل والوزن .. والروح ..، هو لا يبدو أنيقاً من الوهلة الأولى ولكن أحسست بشعور مختلف تجاهه ، كأن هذا الجهاز فد فصلت أدواته لي تماماً ، عملي وأنيق وذو شاشة كبيرة وفيه كل المواصفات الداخلية المميزة وفوق ذلك خفيف .. خفييييييييف

20 رد على “وأخيراً .. بعت الدب”

  1. مع انك هلالي وانا نصراوي الا انه نفس التفكير 😀 ..

    كنت ناوي اشتري هالاطخم اللي فوق لكن يوم شفته قلت معليش اخذه وغيرت نظرتي لـ N73 واليوم ان شاء الله رايح اشتريه 🙂

  2. أي هلالي يابن الحلال

    هذاك على قولة الكويتيين مال قبل 🙂

    الحين حنا مع هنري ورفاقه

    بالتوفيق مع الجوال الجديد ..على فكرة راح تحصل الشاشة مغطاة بشعار نوكيا ، أنصحك لا تشيلها الا بعد مرور يومين أو ثلاثة حتى تتاكد من ان الجهاز سليم

    هاردلك الخروج من البطولة .. كنت معزم احضر النهائي لو تأهلت .. بس ماكتب الله

  3. هلا ابو حميد ..

    تصدق عاد اذكرك اول ما جيت من المانيا يوم تسمعنا اغنية ام كلثوم بجهازك الدب 🙂
    بس تصدق عاد انا شريته وتحمست يوم شريته .. وللحين معجبني الجهاز وما يهمني
    الحجم ( الله يذكر اريكسون بالاخير ) .. بس العله في السوفت وير الجديد اللي احتريه
    لأن عيبه الوحيد بنظري التعليق وقت المكالة وما تصير معي الا كل ثلاث ايام ..
    بس ابارك لك بالجهاز الجديد بصراحه للحين وضعه سليم ومحد اشتكى .. مع ان شكله
    طويل شوي وشاشته تخوف والخط كأنه خط القصيم بس يعتبر حليو نوعاً ما ..
    والله يستر من نوكيا واجهزتها اللي تخلينا غصب نغير موب برضانا ..

  4. 8
    8
    8
    8
    لوووووووووول حلوه خط القصيم
    أستاذي صالح ولايهون الاستاذ أحمد قلت له قبل هالكلام
    نوكيا أحس انها تبي تدحدر وبيرجع عز السوني أريكسون ماادري ليه

    على البركه أحمد على الجهاز الجديد تقطعه بالعافيه
    والله انك صادق بكلامك دب ومنزلق

  5. صالح .. هو انته .. والله ماكنتش عارفك ..
    شوف الجهاز ممتاز مافيها كلام ، بس لولا عيب انه دبدوب ومنزلق على قولة سعد .. ، والتعليق ماقد مر علي أبد .. ،
    بالنسبة للجهاز الجديد .. مالك لوااااااا .. طوله طول مثل الثمانين وأحلى مافيه شاشته وخطه ممتاز جدا ههههههههه وش رايك بالعناد ..
    من جد اول مالفت نظري في الجهاز ان شاشته كبيرة وخط الرسايل رايق وجديد ، السالفة أذواق في النهاية يمكن مايجوز لك .. بس يجوز لغيرك .. ، وتبي الجد .. نوكيا لاعبة بحسبتنا لعب ، ولا لما وصلت ألمانيا وحاولت أشتري شريحة ألمانية ، تخيل اللي كانت تبيع في المحل بفرانكفورت اول مرة تشوف الجهاز لانه مانزل عندهم ، لدرجة قامت وجمعت خوياتها من المحلات الثانية عشان يشوفون جهاز نوكيا الجديد ، مع اني لما شريته كان مضى عليه شهر في الرياض ، وهذا يؤكد مقولة ان نوكيا تنزل الاجهزة في الخليج أول .. وتطلع بلاويها ثم تطرحها في أوروبا ، الشاهد ان المحل امتلى بهالحريّم اللي كل وحدة أطول من الثانية وكله عشان يشوفون نوكيا الجديد …والنكتة ان الجهاز كانت القوائم فيه بالعربي طبعاً .. لذلك الاخت داخت تبي تدخل على القائمة ولا قدرت
    *************

    سعد .. حلوة استاذي ذي .. ذكرتني واحد أول حرف من اسمه ( هاني ) قد طاح فيها طيحة .. الله لا يوريك .. خطر انه يتصل على ( التي بوي ) ويقوله استاذي .. جيب شاهي ..
    شوف .. مع اني داري ان نوكيا تلعب فينا لعب .. ولاقيتنا بكل يوم جهاز جديد .. بس اخوك في الله ماقد طلع برى هالشركة .. تقول لي ليه .. بقول لك ما ادري ..

    عموما الثنائي شرفتونا ولا يهون النصراوي المحارب .. وصدقوني انبسطت لما شفت مداخلاتكم ..
    وفي النهاية أقول لكم ( ان تتتبشررر ) ههههههههههههههه

  6. سعد .. اشهد انها رمية من غير رامي
    اخجلت تواضعنا بأستاذي .. يا أبو شعاع قصدي ابو نواف
    ( امون على الرجال 🙂 )

    أبو حميد .. عاد شف اللي تعود على الN80 بيحس ان الخط حق N73 كنه
    كبير شوي .. بس هذا شي ما يعيب الجهاز بالنسبة للناس بس بالنسبة لي احس اني
    لازم افصل لي نظارة بعد نظر مدري قصر اللي هو .. بس المهم اننا نحس انه صغير
    على طاري هاني .. ترى الرجال طلع بالقناة الثالثة امس في برنامج فوانيس بصراحه
    اهنيه على سكبة الغترة احس الغترة خلقه جايه كذا 🙂

    لا تبطي علينا بموضوعاً جديد

  7. مبرووووووووووووووووووووووووووووووك على حهازك اليديد

    ما شاء الله .. هالأيام صعب تختار موبايل بمواصفات مميزة خاصة إنه الخيارات زادت و ما ننسى الشركات الثانية المنافسة لنوكيا إنها قامت ألحين تظور من أجهزتها و اتضيفها تقنيات يديدة هب موجودة في أجهزة النوكيا

    بالنسبة لي هالأيام أفضل الهواتف النقالة هي من شركة sony Ericson مميزاتها رائعة و يكفيك اسعارها اللي إذا قارنتها بنوكيا راح اتلاحظ الفرق الكبير.

  8. مبرووووك ابوحميد الجهاز الجديد ويتربى بعزك (:

    بس من جد النوكيا متعبينا كل يومين مطلعين جهاز جديد والله مشكلة

  9. خلوا عنكم وش حليل الواصل n6680
    بسم الله عليه كله حلا ……….
    اما بالنسبه للسؤال والبحث عن مواصفات جهاز اهم بشرائه فماعمري مريت فيها لان وبصرحه غالبا الاجهزه تجي هدايا …
    سبحان الله حتى الجوال الدب مااحد يرغبه!!
    ………………………………………….
    برايفت صالح…….
    خل عنك سكبه الغتره شوف الثقافه ماشاء الله:)

  10. استاذي احمد >>>>
    خخخخخخخخخخخخخخخخخخخ

    اقصد ابوحميد بصراحة نوكيا ماتخليك تفكر 🙁 كل ماجزمت على نوع طلع واحد جديد وغير الفكرة والمزاج، لفت نضري التعليق السابق ل fatooo بتسميتها الواصل n6680 لأن وحسب خبري ان الأسماء اندثرت عقب الفيصلية والمملكة!!

    راعي الغترة البيضا 🙂

  11. 777
    لا عادي حنا عندنا بالقصيم الى الان يسمونها كذا:)
    ……………………………
    من جد لم تتداول معرفات الجوال بالارقام الا بعد n70 و n90 ووووووو

    >>>تحس انها تهزئت:(

  12. والله صراحه انا اخر انسانه خبيره بالجوال لكن ههههههه ضحكت على الله يرحم اريكسون

    بصراحه انا شريت n90 تندمت مرة مرة مرة مرة حنيت لموتووو حقي القديم يعني الواحد صراحه مثل مايقولون ( نديمك قديمك ) ….

    وعلى البركه أحمد منك المال ومنها العيال …..

  13. ********
    صالح
    ********
    انا كنت اتوقع بتقول خطه كبير ، صار العكس 🙂
    أما طلعة هويني كانت غريبة والرجال ماعطانا خبر بس فاتتني تشخيصة الغترة ..

    ********
    إيمان
    ********
    الله يبارك فيك وانا فرحان بجهازي ( اليديد 🙂 ) ..
    سوني أريكسون له عشاقه ومحبيه ، بس للأسف الى اليوم عجزت اني ممكن اتعايش معه .. يمكن في موديلات جاية ..

    ********
    سلوم
    ********
    الله يسلمك .. وفعلا النوكيا مو متعبينا وبس .. إلا لاقين ناس يلعبون عليهم 🙂

    ********
    fatooo
    ********
    لا يكون مسمينه الواصل على اسم رئيس نادي النجمة .. مهوب بعيدة تسوونها يالقصمان
    كويس تجيك جوالات هدايا .. ترى فيه ناس اغلى شي جاهم كبك ابو 15 ريال 🙂

    ********
    هاني
    ********
    هلا كوكتيلووه .. قصدي استاذي كوكتيلوووه ، تدري سليمان اخوي يقول ان خويك هاني اول شخص في حياته خاطبه بكلمة ( استاذي ) ، كان تذكر عند مكتب فرسان ايام السفرة العام ..
    المهم ياولد القويفلي 🙂 .. نوكيا جالسة تلعب في الساحة على قولة الكويتيين .. بس وش نسوي حنا كذا جايين شد بلد ، منتهين ..
    المهم خلنا نشوفك يبووو

    ********
    سديم
    ********
    الجوال يمثل جزء كبير في حياة الشخص ، مو مثل الكمبيوتر او السيارة ، لانه مرتبط فيك طوال اليوم لذلك الشغلة مايبي لها ندم .. حتى ولو كان فيه خسارة ..

  14. والله صرت اقرأ في موضوعك وانتظر ربما المشكلة اكبر ،ولكن،،يااخي ماكنت تفتك منه من الاول مدام حجمه غير مريح .

  15. يازين السوني اريكسون

    أنا من عشاق هالشركة ولا يمكن أغيرها

    وفعلا السوني أريكسون زبائنه خاصين ولا يدورون إلا عليه

    وبعدين الأخ اللي يقول أن الشركات الثانية بدت تطور بأجهزتها

    أقوله أن اللي يصير هو العكس ، النوكيا هي اللي تطور عشان تتبع الأخرين

    أكثر تصاميم النوكيا والسامسونج مسروقه من شركات ثانية

    وأكثر التقنيات اللي تنزلها النوكيا تكون متوفرة من قبل بأجهزة الشركات الأخرى

    أذكر أن أول شركة نزلت جوال بكاميرا عندنا بالسعودية هي السوني أريكسون في بداية تأسيسها .

    نزلو كاميرا 2 ميجا بكسل في جهاز K750 وبعد سنة نزلت النوكيا الإن 70 عشان ينافسه

    ..

    الزبدة ،،، سوني وبس

  16. بسم الله الرحمن الرحيم
    السلام عليكم ورحمة الله وبركاته …. وبعد
    المهم وبصراحه شديده انا من رواد مدونتك الرائعه فيها اشياء كثيره تجذبني
    ودائما ما ازورها- اهنئك على لغتك البسيطه بطرح السواليف تجذب القارئ
    بطريقه مختلفه عن المعروف
    المهم انا تجرات وقررت اردممكن تقول خطوه فيها جراه منى
    —– —– —— ——- ——
    تعقيب على ان 73 بصراحه انا اشتريته عقب مانزلت موضوعك
    بس الى الان ماعندي المرونه بالتعامل معه اخاف احوسه ولا اخرب شى لا
    قدر الله بس الاكيد ان ازين من الدب
    والله يستر من جديد النوكيا
    —– —- —– —– —- ——
    يالله فى امان الله وسوري على الاطاله
    لى عوده لسواليفك الاخر *-^

  17. *******
    هناء :
    *******
    كنت اقول يمكن يمشي الحال وأقدر أتكيف معاه ، بس للأسف ماقدر

    *******
    ياسر :
    *******
    عشاق السوني متعصبين له بشكل كبير ، انا ماراح اقول هذا صح ولا غلط لأني ماجربت السوني ، بس دام الموضوع جايز لك .. نصيحة لا تغير وخلك على السوني لانك بتدخل في متاهات لا أول لها ولا آخر .

    *******
    نوران :
    *******
    شكراً لزيارتك ودخلت الموضوع وقريته بس ماقد صارت لي مشكلة من اللي قالوا ، والناس تختلف في طريقة تعاملها مع الاجهزة ، مثل السيارات برضه ، يعني يمكن الواحد يمشي حال الجوال معه سنة والثاني سنتين وبعضهم ثلاث ..
    حياك الله

    *******
    عهود :
    *******
    مرحباً بك في رد الأول اخت عهود وأتمنى مايكون الأخير ..
    شكراً على مجاملتك للمدونة ، بالنسبة للجهاز فما اشوف انه معقد بل بالعكس يمكن يكون أحد أسهل الاجهزة اللي طرحتها نوكيا خلال السنوات الخمس الأخيرة وخصوصاً مرونة العصا والقدرة على التنقل بين القوائم والأسماء ، أزيدك من الشعر بيت .. الحين عندي جهازين N73 الأول جهازي والثاني جهاز الدوام .. وكله عال العال حتى ساعة كتابة هذا الرد 🙂 ..

    حياك الله وياهلا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *